الكسار (سلاسل الغوث)

الكسرة الاولى

طاحن بالخريف اوراقي گلت تهَون
تانيت الربيَع وطاحت الشجره .

قراءة ممتعة
............................................................

عام 2006....
بأحد ازقة بغداد المتهالكة الساعة التاسعة صباحاً...

:امشي واجر بجنطة المسواگ والشمس سطرتني سطر ومن العطش والتعب الهث

وصلت للبيت تركت المسواگ بالطرمة وركضت اشرب مي وكع الكلاص الستيل من ايدي من اجة صوتها تعلچ

:هاا جبتي المسواگ؟

ابتسمت ببراءة ورديت على سؤالها
:اي جبتة حبابة سويلنة تبسي دجاج

تخوصرت وبينت انحنائات جسمها
:لعد وينة شوكت تبطلين هالسولة ليش تتركين المسواگ برة وانوب اكو دجاج هسة تجي القطة تاكلة

نزلت راسي ورديت بهمس
:لتعصبين ماما اجيت عطشانة هسة اجيبة

شمرت شعرها لورة كتفها
:يلا بسُرعة قبل ليجي ابوج

ركضت برجليناتي الصغار والترفات للطرمة اخذت الجنطة وخليتها بالمطبخ صارت تطلع المسواگ وتفحص واني انتظرها تتأكد حتى احصل على ربع دينار دقايق والتفتت مبتسمة طلعت ربع وخلتة بصدري

كالت وهي تعلچ ومبتسمة
:اييي عفية هذا ربع اشتري بي

طرت فرح مديت ايدي اريد اطلعة من صدري وفززني صوتها

:لاا داده لاا خلي بصدرج تعودي من هسة

كالت هيج وضحكت بصوت عالي تركتة بصدري فرحانة طلعت من يمها وهي سوت مثل كل يوم فتحت اغنية  وبدت تتمايل على انغامها وتطبخ

جنت احب اشوفها ترگص بس اليوم جنت فرحانة بالربع ركضت يم اختي واخوية اغورهم بالربع شفتهم ديحجون رفعت الربع وحجيت بدلع

:شوفو شوفو شنو عندييي

خزرتني اختي واخوية ما اهتم اختفت ضحكتي ورحت كعدت بصفة لزمت ايدة بحنية

:الزم هذا الك

ابتسم ورفع ايدة يمسح على راسي
:خلي الج اني باجر هم اشتغل وانطيج انتِ واختج كل وحدة 5 الاف دينار

رفعت راسي اباوعلة بفرحة هجمنة عليه اني و فرح اختي نحضن ونبوس بي ونتشكرة ابتعدنة عنة وهو نزل راسة يضم بوجهة

اضوج من اشوفة هيج عمرة 17 سنة وصارلة 3 سنوات من يطلع يغطي وجهة

رفعت تيشيرتي عن ضهري وكلت بهدوء
:شوف اني هم مثلك لتزعل وهيب حباب

ابتسم بكسرة واردف بصوت يرجف
وهيب:بضهرج مو بوجهج الاطفال تخاف مني وحتى اصدقاء ماعندي