اللهم إني أسألك نفسًا مطمئنة
تؤمن بلقائك وترضى بقضائك وتقنع بعطائك ♥️♥️.
_______________________________________________________
صحت الهنوف بدري وهي ماتدري اصلا كيف نظام العائله بس قامت وتجهزت تحسباً لأي شي وهي اصلا ماقدر تنام ابد
أندق باب غرفتها وفتحت وطلعت الجوهرة
الجوهره : صباح الخير
الهنوف : صباح النور
الجوهره : امي وابوي تحت ويقولون تجين تجلسين معهم
هزت الهنوف راسها بموافقه ونزلت لهم
اخذت نفس قبل تدخل عندهم وابتسمت وهي تتقدم وتسلم عليهم وتبوس رأسهم
الهنوف : صباح الخير
ابو سعود وام سعود : صباح النور والسرور يبنتي
ابو سعود : عساك بخير ومو ناقصك شي؟
الهنوف : لا يعمي الحمدلله بخير مو ناقصني شي
ام سعود : مرتاحه عندنا؟
الهنوف بتوتر : اي والله ماقصرتو جعل بيتكم عامر
ام سعود : اذا احتجتي اي شي علمينا
الهنوف : ان شاء الله
ابو سعود : بيجي الشيخ الليله ان شاء الله ونكتب الكتاب ونسوي عزيمه عائليه ونزوج ونخلص بما ان الوضع مستعجل ومافيه وقت نجهز
الهنوف سكتت واكتفت تهز راسسها
كانت تحلم بزواج مو كبير هي أحلامها دايم بسسيطه كانت تبي زواج تبي تخلد لحظه زواجها بعقلها كانت تبي تلبس الفستان الأبيض وتصير عروس زي باقي البنات بس تدري انه حلمها ذا مستحيل بالنسبه لوضعها
وطبطت عليها ام سعود : كل شي بيتحسن يبنتي لاتشيلين هم
وجات الجوهره تعلمهم ان الفطور جاهز ابو سعود راح لعياله وهم راحو لغرفهه الطعام كانت مجهزه الجوهره الفطور هناك
وهم قبل كانو يفطرون مع بعض بس الحين الجوهره موجوده بيصيرون الرجال لوحدهم والحريم لوحدهم
ماقدرت تاكل زين وخلصوا وشالو السفره وكانت الهنوف تساعد الجوهره بالمطبخ وصافنه
الجوهره : هنوف شفيك يعمري؟
الهنوف : لا يعيوني مافيني شي
ماحبت الجوهره تضغط عليها بالسؤال رغم واضح عليها فيها شي
جا ماجد يركض عند الهنوف
ماجد : انت الهنوف؟
الهنوف وهي تقرص خدوده : اي انا
ماجد : سعود يبيك
الهنوف : وينه؟
ماجد : بالمقلط
الهنوف : زين بروح له الحين
وراحت للمقلط وهي تشوفه قاعد على جواله
الهنوف : سعود
سعود : لبيه
الهنوف : تلبي بمكه يارب ' ناديتني؟
سعود : اي تعالي اجلسي بقولك!
الهنوف : وش؟؟!
سعود : كلمك ابوي؟
الهنوف : اي
سعود : موافقه؟!
الهنوف : هل فيه مجال أرفض؟؟
سعود بضحكه : لاا
واكمل كلامه : طيب قومي البسي واطلعي لي برا بنروح مكان
الهنوف : وين؟.
سعود : مكان بيعجك يله
قامت وهي تروح تلبس عبايتها وتطلع لسعود الي كان ينتظرها بالسياره
والجوهره طلعت من بعدهم مع سعد وهي تبي تروح تشتري كل شي ممكن تحتاجه الهنوف لليلتها
