إعتدلت أميرة فى جلستها وبدأت تحكى: كان عمرى 15 سنة لما إتقبض على يحيى فى جريمة قتل واحد صاحبه وهو كان بيحلف إنه برئ بس ملقيناش دليل وبعد ما اتنفذ حكم الإعدام ظهرت حاجات جديدة وبابا قدر يثبت براءته وإتقبض على المجرم الحقيقى.
ظهرت الصدمة على وجه مروان وقال: يعنى أخوكى إتعدم وهو برئ؟؟؟؟
للأسف أيوه.... يومها أنا قررت أدخل حقوق وحلفت أنى مش هاسيب قاتل يبقى حر ولا برئ يموت...
أنا آسف, آسف قوى يا أميرة ...
نظر مروان فى عينيها وظهر على وجهه الندم وشعرت أميرة بالإضطراب كانت نظراته تحمل الكثير من الحنان و حاولت السيطرة على نفسها ولم تعرف لماذا أخبرت مروان بحكاية يحيى وقالت: من فضلك مش عايزة نتكلم فى الموضوع ده تانى....
سؤال كمان, هاتدافعى عنى ليه وأنا قاتل؟؟
المتهم برئ حتى تثبت إدانته و كمان لأنى لسه موصلتش للحقيقة, لو إنت قاتل فعلا هاجيب لك الإعدام بنفسى لكن لو برئ مستحيل هاسيبك تتسجن
وإعترافى؟؟؟
إعترافك مش كفاية ومالوش قيمة, فيه ناس كتير قوى بتعترف بجرايم وهى معملتش حاجة لأسباب مختلفة.
تنهد مروان بتوتر و قامت أميرة بتشغيل التسجيل مرة أخرى وهى تقول: نيجى بقى للسؤال المهم اللى إنت منتظره, ليه قتلت سيد؟
عندك ال...
قاطعته أميرة بسرعة: متقولش إقرى المحضر والتحقيق أنا هاسمع كل حاجة منك وجها لوجه.. إحكى لى بالتفصيل...
بتقرى الوجوه؟؟
أيوه بأقرأ الوجوه والعيون .
العيون بتتقرأ؟
أيوه العيون مراية الإنسان بيبان فيه كل حاجة مهما إتحكم فى نفسه بيبان فيها الحب والكره والصدق والكدب والحزن والفرح... إتفضل إحكى.....
ظهرت إبتسامة خفيفة على وجه مروان, كانت أميرة تجذبه بشكل كبير وتجعله يفكر فيها , أخذ نفسا عميقا وهو يذكر نفسه أين هو وماذا يكون بالنسبة لها وقال:
جه الحفلة زى ماقلت فى التحقيق وأنا أخدته بره علشان ميعملش مشكلة وإتخانقنا وبعدين حصل اللى حصل..
وأخوك مخرجش معاك ليه؟
كان معانا بس سابنا بعد شوية ورجع للحفلة أنا اللى طلبت منه كده.
كانت إيه طبيعة الخلاف بينكم؟
سيد كان بيشتغل فى شركتنا وسرق مننا فلوس ورفدناه ومرضيناش نسجنه خوفا على سمعة العايلة
وبعدين؟
بدأ يروح لمعارفنا ويشتكى ويحكى حاجات قديمة .
YOU ARE READING
أرواح ممزقة مسابقة M.A
Romanceقصة رومانسية وحب فى ظروف مستحيلة ومواجهة بين العقل والقلب
