ضوء القمر

الضوء السابع

قراءة ممتعه ❤️‍🩹...

مااحس الا مي اجه بوجهي وخلاني اشهك اخذت طرف شال وامسح بيه وجهي واني اكح احس بلاعيمي راح يطلعن
مسحت وجهي بالشال وبعدني اخذ النفس بالكوة رفعت راسي واشوفه واكف ومبتسم ابتسامه جانبيه وبيده كلاص المي
عصبت كلش وكلت بصوت ناصي
: ماتستحي .
: اي اني ماستحي انتي شعليج.
باوعت عليه بحقد وهو واكف جامد بمكانه ماعرف ليش بقيت واكفه مادخلت رغم اول مره اوكف وي رجال وحدنا
اكثر رجال غريب تكلمت وياه من بعد الدكاتور مالي ... وهو اخذ ميانه بسرعه نوب شكـد منحط كبر كبره تذكرت من كال
اريدج...! شكـد منحرف وماعنده اخلاق واجن كل شياطين  راسي بهل لحظه وتذكرت شلون بكل عين صلفه حجه هيج
وكفت بسرعه وشالي بيه مي وبلل دشداشتي من فوك باوعت منا منا ورجعت باوعت
: شبيج تباعين هيج؟ مضيعه شي ؟
حجة وهو يدور براسه يمنه ويسره ...اني سكتت ماجاوبت  رجع كال
: ها گطنه بلعتي السانج؟
صكيت على سنوني وتقربت منه بكل جرأة ووكفت قريب منه مايفصل بينه بس طبلة جان عليها نفاضات وقواطي
وكلاصات ببسي وشرابت ...هو جان لابس قميص ابيض وبنطرون اسود ...
ركزت بعيونه وهو ركز بعيوني صح صابتني رجفه بسبب نضراته بس بذيج اللحظه جان موقفه هو الي كدامي
بدون تفكير شلت كلاص شربت ورشيته على وجهه وبقيت واكفه...
هو ماسوه شي بس مغمض عيونه وايده قبضها ...فتح عيونه واجت بعيني بلحظتها حسيت ووعيت اني شسويت
شفته شلون بارد كلش بارد وعيونه حمر واكو شراين بكصته طلعن ...اني من الخوف طاح الكلاص من ايدي بالكاع وانكسر
وركضت بسرعه جوه للمطبخ وركض لغرفتي بعد ماشفت محد موجود بالحولي همزين...
رحت للغرفه فتحت شال وكعدت افرك بصدري اختنكت كلش  وين يلا ارتاحيت شوي
رحت باوعت من الشباك ماموجود... تنهدت وتمددت على جربايه ودشداشة كلها مي ...
كمت نزعتها وبدلت ورجعت نمت ...اريد انام ماكدر بقيت للفجر صليت ونمت بسبب تفكير
الان الي سويته عيب رغم كلشي بس هو واحد ادبسزز ماعده اخلاق مايخاف على عرضه ماعرف كلشي تذكرت وياه
وشسوه ...نمت بطلعان الكلب وثاني يوم كعدت ب تسعه بسبب صوتهم وهوستهم رحت غسلت وجهي ونزلت عيوني يحركني
الان مانايمة رحت للحولي واخواني مجتمعين ويسولفون
طراد : ولكم بارحة شفتو غيهب والله امره عجيب.
امي سالت باستغراب
: شبيه يمه شكو؟
كال محيسن : يمه كال راح اطلع شويه واجي وهو راح واحنه اطشرنا بين مايجي ومن رجعننه لكيناه
واكف ومتروس شربت من فوك ليجوه وكلاص مكسور بالكاع.
من حجه محيسن هيج احس رجلي نملت من الخوف كبر كبرني شسويت اني بس هدئت من كال جابر
: والله يا يوم احنا استغربنه كلنه هذا شماله الان كال طاح العصير علي وراح بسرعه.
طراد : بس هي ذيج مبينه وين اكو واحد يطيح الشربت على شعره ووجهه كله .
امي كالت : يايمه شعليكم بيه هسه عوفوه خل يولي. انتو هواي تحجون بيه شمالكم يمه
محيسن : يمه هو ينحط بالكلب كلش حباب وهم عنده هواي واسطات بلكت يعين جابر
اني هزيت شفايفي من كال حباب.
طراد: اي والله يايمه مؤدب واخلاق وشيم وصوت وحتى شكله مرتب ومثقف هم .
امي : اي يمه الله يحفظه لشبابه.
نوره ضحكت بسكوت وشاورتني
: لج هذا ياشباب حتى شعره مشيب !
خزرته وضحكت عليها هم الان مبين شكله هو صغير بس تعبان ومشيب يمكن عمره يجي نهايه العشرينيات
وبدايه الثلاثينيات  ... مر يوم طبيعي وبالعصر مثل العاده اجت ام تماره وياها بتها كعدو بالحولي واجتمعن نسوان اخوتي
ونوره يمهم واني هم كعدت على واهس جان تكول ام تمارة
: داده ام طراد جايتج على شغله اني .
امي : تفضلي خيه تفضلي شرايده!
: احم...اريد اخطب لوليدي غيهب.
من حجت هيج تماره ملامحها نصدمت شويه وبقت بس ترمش ونوره كامت تضحك من جوه الجوه مدري شبيها
امي : اي خيه بالخير نشالله
ام تمارة : اي داده واريد وحده من معارفكم يعني من منطقه لو من العائله.
امي : خيه تدللين بس اريد اسال وخاف تاخذينه بغير شي.
: لا داده شنو هذا الحجي احجي عيني احجي.
امي: ليش جاي تسالين على وحده غريبه ليش موش من كرايبكم ؟
ضحكت ام تماره وكالت
: يا ام طراد هو بس عندي اخت وحده وبتها بكد تماره وهو يريد وحده واعيه قريبه لعمره
ومو بس هيج ابو غيهب هم مايقبل ياخذ من عمامه الان كلهن محجوزات وبس الصغار بكد سناء باقيات ما محجوزات.
امي : ها هيج سالفه خيه واللله ويدلل غيهب ادورله خوش مهره تلوكله.
ام تمارة : اي بس هذا الحجي بيني وبينج داده ترى هو مايدري ...واخذي راحتج شكـد ماادورين دوري.
امي هزت راسها وبدن يتناقشن ونسوان اخوتي كبل دخلن نفسهن بسالفه ...تمارة بقت ساكته ووجها نكلب ماعرف ليش
ونوره اجت يمي تضحك
: لج عود كلت بلكت ازوجه واخلص من سوالف العشيرة مالتنا ...نوب اذا هو الي بكدج يكول جاهله لعد
اني يمكن اطلع رضيعه عنده.
كتلها : لج ماتسكتين نوب تفكر بالزواج من هسه امداج
: علساس انتي ما تفكرين ٢٤ ساعه انتي ورواياتج تفترين علينا
: هي قصص اكضي وكت بيهن .
عوجت حلكها وسكتت ماحجت ...باوعت لتمارة صافنه عليه جان ابتسم الها وهي رجعت ابتسامه مرتبكه
ماتاخرن وراحن بسرعه ورجع البيت هوسه ومشكله ابوي طول بالغيبه ومحد يدري وين .
مر اسبوع ثاني وهذا الاسبوع كله رجعنا لحياتنا قبل وحتى ام تمارة مااجت علساس عدها شغيله ببغداد وراحت
و ابوي هم مابين وزاد قلق اخواني كلش وكالوا اذا تاخر بعد يومين يرحون يسالون عليه وياخذون عمامي هم
واني كاعده مكابله كتب السادس اريد افهم شي منها افهم شغلات بسيطه و كاعده اقره بس اسلاميه خلصت فصل كامل
وعربي قريت الحفظ بس والباقي كلشي ماكو ...بس اتذكر وراي سنتين شوي ماضغط على نفسي ولاعلى اخواني
علمود يخلوني ادرس يم مدرسة بالمنطقه ادرس بالبيت مالتها وتاخذ الف باليوم
بنهايه الاسبوع رجع ابوي وكل عاده محد يساله وين جنت من نسال يكول يم اصدقاء .
نوره : اكلج يمه خاف ابوي يطلع متزوج عليج وانتي كاعده ورجليج بالشمس.
امي سكتت شوي وصفنت هم بعدين حجت
: والله يايمه خلي يزوج شسويله .
حجت نوره : افاا يمه هذا ابوي ورجلج وابو جهالج وابو بيتج نوب عادي يتزوج ؟
امي هزت راسها وايدها وغمت نوره
: يمه قابل شمحصله منه اني لو ماخاف الله جان من زمان اطلكت و تزوجت بس انتو بين عيوني واصلا هو ما هاويني .
اني حجيت بسكوت
: ما تحبينه وهو مايحبج وخلفتي منه سته لو تحبينه شكـد تخلفين.
وماحس الا نعال جاي على ظهري خلاني اصرخ واكمز ونوره ماتت ضحك وامي ترزل
: ولج هاي هيج تحجين عليه يا طايحه الحظ ولج شجاج جنتي صوتج مانسمعه شمالج هسه حسج يلعلع.
اني وافرك ضهري واهز براسي
: يمه مادري يمكن هرمونات .
وماحس الا نعل ثاني وترزل بيه
: لج ادبسزز نوب تحجي بالهرمونات والله لو مامريضه جان عرفت شلون اادبج.
نوره بحسره : اي يايمه ...لج سناء الله سترج بالمرض ماتعذبتي مثلنا
جان امي تجيبها بنعال صار بنص وجهه وتكول
: انجبي لجج هسه اني طلعت معذبتكم فلك فلكج كون وين وحده مثلي مدللتكم دلال فوك ماتجين تبوسين ايدي
هيج تكولين امده خلفتي اي والله جا ياهو ابوكم اكيد اطلعون عليه امداكم وامداه.
وخلت وراحت وهي دردم على نوره واني ميته ضحك عليها واحرك بحواجبي.
وهي وجهه صار بيه طبع مال نعال وعيونه دمعت وخلت وكامت وهي تصرخ هههه صدك ضحكتني.
على عشه اجتمعنا كلنا وابوي مترأس الكعده ويباوع ويركز على الكل وكلنا ناكل بهدوء حتى جهال ساكتين
يخافون منه الان مره ابن طراد كام يضحك هو وابن جابر على اكل بوكتها حبسهم بالحمام ساعتين وماخلاهم يطلعون
يلعبون مده اسبوع وانطه كل واحد لوية أذن حتى لايعيدوها .
كملنا العشه الخانك بسرعه ونضفت المواعين عليه واجت مرة محيسن ساعدتني وخلصنا والكل طش وره شرب الجاي
وثاني يوم مر نفس الروتين وابوي موجود والكل هدوء بس جهال شوي هوسه ومر اسبوع كامل بدون اي تغير
حتى عائلة ام تمارة ماكو بعدهم ببغداد والجمعة راح الكل للعزيمه واني بقيت بالبيت واجه يمي محيسن
وابوي طول هذا الاسبوع يطلع ساعتين لو ثلاث ساعات ويرجع مايطول الكل مستغرب من وجوده وحتى الكل متقيد
بس شنسوي قابل ... مر اسبوعين هدوء بس خنكة وضوجة الان ابوي موجود كل مره من هو ماكو اطلع باليل
اكعد بالحديقه هسه ماكدر...
اجه اسبوع ثاني ورجعت ام تمارة وراحتلها امي هي ونوره ومرة محيسن وجهال
مرة طراد يم اهله ومرة جابر طلعت وي جابر مدري وين والولد كلهم بره وابوي هم برة محد موجود بالبيت بس اني
ودنيا عصريه وحاره بس هوه خفيف مال سموم رحت كعدت بالحديقه جوة شجرة ولازمه روايتي والحجل برجلي
وشال شامرته على جتفي ودشداشه عريضه شوي ودلعتها عريضه وقصيره مو كلش طويله لون ازرگ فاتح .
كاعده اقره ومندمجة بالروايه واسمع دك الباب رفعت راسي بجفله اشوف شعر شخص من فوك الباب
كلت فلك هذا شطوله ! بقيت واكفه اروح اشوف منو لو اغلس وادخل جوه ...
الباب اندك بقوه بعد رحت تقدمت شويه على باب وصحت
: ياهو على باب؟
ماكو رد وانكطع الدك بقه هيج دقايق واندك من جديد صحت بصوت اعلى : ياهووووو؟
ماكو رد نوب بس اني خفت كلش وبقه يندك الباب...تقدمت كلش صرت وره باب وصحت : ياهوو؟
اجه صوت خشن يمكن عرفته كال
: الولد موجدين ؟
كلت بصوت ناصي ومرتبك : لا ماكو.
جان يتحمحم ويكول
: بس افتحي الباب اريد ادخل امانه من الولد.
اني ارتبكت شوي من عرفت صوته بس مدري عقلي شكلي وفتحت باب وصرت وراه
مد راسه وشفته هو وعيونه التخنزر وشمس عاكسه عليهن مبينه لونهن دخل كراتين اثنين كبار و يدخل الثالثه
ومديت راسي عبالي راح واشوفه واكف ومكتف ايده اني انخلست جاي اسد باب وخله قدم رجله بنهاية
ماخلاني اسده وقدم نص جسمه بحيث سدني سد وانخلست وكلت هسه يجي واحد ويشوفه هيج جان تقرب بوجهه عليه
وكال بمكر : ها محد بالبيت مو ؟
اني سكتت بعدين حجيت : لا ابوي موجود جوه!
هو ابتسم مستهزأ يمكن عرف جذبتي الان تقرب اكثر وكال
: هسه اذا سويت شي محد يعرف مو ؟
من كال هيج دفعت الباب عليه بكل قوتي وهو شوي رجع ليوره واحس جسمي كله بده يرجف وعيوني صارن حمر
مديت راسي وحجيت بحركه
: يا حقير شلون ابوي واخواني مأمنين عندك!
وجاي اسد الباب واشوف ابوي جاي من بعيد وعيونه براسه وملامحه مايكصهن السيف اني من شفته هيج
كلت الج الله يا سناء...!

يتبع.....................