فصليتي القبيحه

ليث .

أحب عيونها .. واحب شكد حلوه هي .. احب شخصيتها
احب نضوجها واحب طفوليتها احب شكد افكارها مامألوفه ابد احب تميزها عن غيرها بحيث حتى لو تكون من بين الف بنيه راح اختارها مره ومره ثانيه ومرات متنتهي .. احبها كلها ! واحب هاي اللحظات الي بيناتنا
مثل كل يوم اوصلها لدوامها لازم ايدها ومشغلين اغنيه " تناديك "
هي تحب هاي الاغنيه لان على اسمها واني احب هاي الاغنيه لان على اسمها

" تناديك رغبات المقابيل من الأرض وأنت بالمجرة
تهادي على غصنٍ من الليل وتمادي على القلب ومقره
وتمونين يا ريم المكاحيل على القلب في خيره وشره
إذا جيتي أستاهلك بالحيل وإذا كان ما تبغين حره
فديت الوسيعات المظاليل رماح الهلاك المستشره
وخطواتك اللي بالخلاخيل لها في الصدر والقلب جره
وسواليفك بكل التفاصيل وصوتك بها لله دره
أبي منك ما ينهد لي حيل على شي ما يسوى المضره
وسواليفك بكل التفاصيل صوتك بها لله درهw
أبي منك ما ينهد لي حيل على شي ما يسوى المضره "

بس اريد اعرف شبساع الوقت وياها يكضي؟ واني صافن افكر بجمالها وبلطافتها ماوعيت ع نفسي الا من كالتلي

ريم : حبيبي ترا عبرت الدائره مالتي
- شحلاة حبيبي من لسانچ؟ جعلني مانحرم منها ابد
"خجلت ونزلت عيونها وشكد احبها من تخجل وتنزل عيونها احب انوثتها الي تختلط ويه جمالها بطريقه تخليني اذوب "
-ريمَتي انتبهي على نفسج احبچ كلش ❤️
ريم :تمام حبيبي من يخلص دوامي انت ترجعني مو
- اي عمري وراها نروح نتغدى سوى
- ماشي حنتظرك حياتي
" رحت واني افكر شوكت الوقت المناسب حتى افاتحها بموضوع الخطوبه لان كلش طولنا اني وياها صارلنه من ايام الكليه سوى وهسه هي متوظفه واخاف احد ياخذها مني وخصوصا انو ابوها معروف بالبصره والكل يتمناها بسبب حسبها ونسبها وجمالها الي مينوصف عيونها الخضره وبياضها الي يعادل المرايه ورشاقتها لازم اخطبها لان كافي اسمع كل يوميه سوالفها عن خطيب جديد ترفضه علمودي .. قاطع تفكيري واني راجع للبيت مكالمه من عمي ياستار عمي مايخابر الا شغله قويه "
- ها يابه
- انت وين ليث
- بالطريق راجع للبيت
- اخوك انكتل !
" اني هنا الدم جمد بعروكي ! اخويه الوحيد ينكتل وهو على باب زواج وماباقي لعرسه الا كم شهر ! ماستوعبت الصدمه "
- شدتحجي عمي ؟
- متعارك ويه واحد من بغداد بالسوك وصايره بالسچاچين والقامات وهسه احنه رايحين للمغيسل نغسله وندفنه ونروح لبغداد نفصل عمام چتال ابننا تعال بسرعه
" سديت الخط بلا مااحجي اي شي مستحيل اصدك اخويه الي اليوم الصبح تريكنا اني وياه وضحكنا وتشاقينه وراها بساعتين انكتل من وره عركه بالسوك اخويه الوحيد الي من لحمي ودمي يروح دمه هيج ! شلت حقد بداخلي مستحيل احد راح يفهم شكثره ودست سرعه 200 حتى الحك عليهم وماهمني شي غير انو اشوف اخويه قبل مايجفنوه "