فصليتي القبيحه

ريم .

تعبانه من حياتي .. هواجيس .. قلق وافكار .. كل يوم اكعد الصبح ب8 على كعده اخواني واشوفهم يتجهزون كلهم يروحون للكليه ماعدا اختي الي عمرها 15 بعدها صف ثالث متوسط واختي الجبيره  الي عمرها 22 شكد تكشخ وتلبس وتتعطر وتركب اضافر وتشسور كأنو رايحه لعرس بس لان خطيبها هناك اما اخوي الي عمره 21 مكضيها يسوي نفسه رايح للكليه بس هو يفلت يديح ويه جماعته ويسافرون لاربيل او للبصره  حتى مرات
فـ بذاك اليوم قررو هو وجماعته يروحون للبصره وطلعو من ال5 الفجر جنت اني كاعده اقره روايه على الواتباد واسمع اغنيه
چذاب ابن چذاب اليكلك انسه جرح الاكول يطيب يرجعلي نفسه
واجه سلم عليه قبل مايطلع وكتله انتبه لنفسك ولتتعارك ويه احد وكاللي تدللين يانور عيني احب اخوي اكثر من خواتي البنات لان هو الوحيد الي ميحسسني انو اني قليله او محلوه على عكس خواتي الي دائما يذكرونني اني محلوه ومستحيل اوصل لجمالهم ومدري عليمن طالعه بس اني مقتنعه بشكلي واحبه لان اني اشبه والدي المرحوم وامي دائما تكلي انتِ مو مثل خواتج انتِ ريحه بقت لي من ابوچ فماضوج ابد وماكره شكلي بس اتمنى اضعف واعالج الحبوب البوجهي واني مقتنعه انو هذا عيبي الوحيد فقط .. بس شسوي حاولت ومافاد وماعدنه فلوس علاجات احنه يادوب اكلنا يكفينا .. بس طول عمري تمنيت اعيش مثل البنات قصه حب واحد يحبني واحبه ويهتملي بس للاسف من حاولت احب انخذلت كل الي شافو شكلي تركوني او ضلو ويايه ويعايروني بهلشي بأقل عركه تصير وضليت اطب واطلع من علاقات الا ان تعبت من هلشي واقتنعت انو ارضى بقسمه الله وانتظر الله يبعثلي شخص يتقدملي من الباب ونعرس احلى عرس .. اخذتني هواجيسي ماحسيت بالوقت الا وهي صايره ب5 العصر فـ فكرت اخابر اخوي اسأله وين صار بس ضليت ادك ادك وماكو ميجاوب وضل بالي عليه بس ماحبيت اشغل بال امي بيه رغم هي هوايه سألتني وين اخوج وليش لسه مارجع لان كتلها اني اخر شخص شافه .. بعدين خابرني اخويه وكال اني يم عمامي لان تعاركت ويه ولد وكتلته بقامه وهسه اهل الولد جايين يفصلونا ..
"اني هنا صفنت؟ هذا صدك يحجي لو يشاقه؟"
- علي صدك تحجي ؟
- ريم احلفج بالله طمني امي وكليلها بس تنحل السالفه ارجع للبيت ولتخاف
- تمام علي من ترجع نتفاهم

" في جانب ليث "
دگيتها بجي مثل الطفل من شفت اخوي بجفن وهو عريس جان وردت ازفه بيدي وضليت اصيح واصرخ ويسكتون بيه وماكو خسرت صاحبي واخوي واعز بشر الي مادري شسوي بعده .. بعد ماچفناه ودفنناه رحنه لبغداد علمود نفصل الولد واني جان بودي اكتله وتصير الدم بالدم بس ابوي وعمامي هدئوني وكالو منرتاح الا نفصلهم فصل يأذيهم .. اني صحت ياصبر ايوب بس شسوي مابقالي احد غير ابوي وعمامي امي متوفيه وهسه اخوي هم راح ! من وصلنه لبيت چتال اخوي شفناه بيت متواضع مو مثل قصرنه بالبصره بس احنه اتفقنه قبل ماندخل ماناخذ اقل من 500 مليون فصل لان الراحلنه مو هين واحنه عشيره الها مقامها والك يحترمنه من دخلنه شفناهم عدد قليل الظاهر ماعندهم هوايه واكو بيهم جانو لابسين رسمي اما احنه طبينه بشماغاتنه وعشيرتنه كلها جايه جان فـ بدا عمي بالحجي لان هو شيخ العشيره وجبير مالتنه " 

- سلام على من يرد السلام
- وعليكم السلام
- احنه جايينكم اليوم وكلوبنه مچويه وخاسريلنه شي جبير واكيد انتم تعرفون
- اي اكيد واحنه حاضرين وبالخدمه
- احب ادخل بالموضوع گبل ومااطول احنه دمنا الراح مايتقدر بفلوس ونريد منكم فصليه لابننا ليث
- اي مبلغ تأمرون احنه حاضرين
- لا فهمتني غلط مثل ماراح وليد من عدنه احنه نريد بنيه من عدكم فصليه انت الكتلت ابننا عندك خوات حسب ماسمعت ؟
- خواتي خط احمر !
" حاولو عمامه يهدئوه ويقنعوه بالفكره لان اذا مانحلت هيج تكبر السالفه "
- نريد منهم بنيه تنطونا لو تصير غير شغلات انتو في غنى عنها

" ليث هنا صارت الصدمه صدمتين لان اني جنت متوقع ناخذ فلوس وتنتهي السالفه بس شنو عرس شنو فصليه وليش اني ازوجها واني احب غير بنيه واريد اخطبها !! "

عم علي :- لا عيني هاهيه احنه حاضرين شوكت ماتريدون گبع واخذ
" علي جان مامقتنع بالفكره لان يحب خواته وميريد الاذيه لوحده بيهن بس مضطر لان هو ماعنده اب وزحمه يرادد عمامه "
بعد ماطلعو عمام ليث صارت مناقشات ويه علي على يا اخت ينطيها وقنعوه ينطي اخته ريم لان هي مبطله من المدرسه والبقيه يدرسن واخته الجبيره مخطوبه وفعلا بعد ملحه اقتنع واخذ عمامه وراحو لبيتهم يقنعون ريم ويصارحوها بالفكره بعد مااتفقو ويه عمام ليث على موعد عرسهم