بين الحلم والقدر

البارت الثالث

بين الحلم والقدر

للكاتبه أنو أنو

لاتعشـگ وجـوه
#ٲعشـگ_گلـوب ٲنـظـاف
الـوجـه فـانـوس فـتره ويـنطـفـي ويـعـتـگ

_طلعت امي واني سديت الباب وراها باوعت عليها كاعده على الجرباية مثل هيج موقف شلون واحد يتصرف حتى خبرة بالحياة ماعندي

اصلا اني مو من الشباب الي عندي تجارب أو علاقات ما أحب هالشي اصلا عيني ما ارفعها على ابنيه بس هسه شلون احس روحي متورط واني واكف بمكاني جامد

اخر شي شجعت روحي وتقدمت عليها اول وتالي هي بركبتي اليوم باجر بعد سنه هي بعد صارت زوجتي

رحت وكفت كبالها رفعت البركع من وجهها جانت مدنجه مديت ايدي ورفعت وجهها عليه صارت عيني بعينها

تفاجات هاي منو هيه لو مبدليها العيون عسلي فاتح مرسومه بالكحل و الخشم قلم والوجه ابيض ولشفايف مرسومه بلون احمر

ساعتها ظليت صافن كلت هاي مو مريم يمكن غيرها معقوله شايله هذا الجمال الوجه ابيض تمنيت لو يبقى هذا وجهها هيج بدون مكياج

بس من نزلت عينها صحيت على نفسي بساعتها وخرت ايدي كلتلها

غياث: الف مبروك يا بنت عمي من هالساعه انت صرتي زوجتي وعرضي مثل ما الج واجب عليه اصونج واحميج واحافظ عليج واحترمج انتي هم واجبج تحترميني وتصونيني وتحافظين عليه بوجودي وبغيابي

  وشنو اللي يصير بيني وبينج بهاي الغرفه ما يوصل بابها ولا يتعدى ربي يقدرني اني اكون الج الزوج الصالح واسعدج

_ ما حجت شيء بس اتهز راسها بالموافقه

صح جنت احجي بس اني جانت اعصابي مشدوده ومتوتر ما اعرف شبيه جان الجو بارد بس اني محتر واحس الدنيا بوخه من كثر التوتركلتلها 

غياث: كومي غيري ملابسج حتى نصلي ركعتين

ابويه وصاني بيها وعلمني عليها صدك شفتها كامت طلعت ثوب ابيض كالت

مريم:  دير وجهك اريد ابدل

_صدك انطيتها ظهري كتلها اخذي راحتج

اني هم نزعت سترتي ورباطي فتحت القميص احس روحي مختنك شويه وكالت كملت

درت عليها شفتها لابسه ثوب بسيط ابيض اني هم اخذت دشداشة نزعت القميص ولبستها وبعدين نزعت  البنطرون 

باوعت عليها كتلها يله نصلي تتوضين كالت لا متوضيه كيفت لان اذا تتوضا لازم تشيل هذا المكياج وانا ما اريد اشوف وجهها القديم وانصدم

خليها بهذا الوجه فرشت مصلايتي وهي فرشت مصلايتها صلينا ركعتين وراها التفتت عليها وخليت ايدي على راسها وحجيت الدعاء ودعيت بكلبي الله يسهلي هاي الليله