اخترت الهروب عن المواجهة..لإنني اعلم ان قلبي سيضعف امام اي كلمة تنطق بها..
..................................................
ريتال....
وصلت لأول مكان خطر علي بالي إسكندرية خبطت علي الباب وفتحت ليا إلين
وقالتلي"ريتال حبيبتي اتفضلي أدخلي"
دخلت ومعايا شنطتي قولتلها بإحراج
"انا اسفه لو أزعجتك يا طنط إلين بس ملقتش غيرك اروحله"
قالتلي بعتاب "ده كلام تقوليه طب ده انتي اول ما قولتيلي انك جايه انا انبسطت جداا عشان زي
ماانتي شايفه قاعده لوحدي..يلا ادخلي غيري هدومك لحد ماانا أحضر الأكل"
عملت زي ما قالتلي وغيرت هدومي ومسكت الموبايل بعت رسالة ل بابا قولتله إني قاعده عند عمة مريم يومين أغير جو وقفلت موبايلي عشان محدش يكلمني...قاعدين انا وإلين في البلكونه وقدامنا البحر وبنشرب شاي حكيت ليها عن اللي ليلي قالته ليا وهي اتصدمت وقالتلي
"لا مش مصدقه ان يحيي يعمل كده اكيد في حاجه غلط ايه اللي يخلي ليلي تقول الكلام ده عن يحيي؟..يمكن قاصده تبعدكوا عن بعض عشان بتغير عليه وشايفه إهتمامه بيكي ف عملت كده عشان يحصل بينكوا سوء تفاهم "
"يا طنط وهي هتجيب الكلام ده كله منين هي قالتلي ان يحيي هو اللي قالها ما انا ممكن اروح واواجه يحيي ب اللي هي قالته ليا ولو كلامها غلط هو هيقطع علاقته بيها ومعتقدش هي هتبقي عايزه كده"
إلين قالتلي وهي بتشرب الشاي
"طب ما تعملي كده واجهي يحيي واعرفي الحقيقه"
قولتلها وعيني علي البحر
"لا مش هواجهه...كلامها صح او غلط مابقتش تفرق معايا انا خدت قرار إني ابعد عن يحيي مش عايزه اكون سبب مشاكله مع ليلي..وبصراحه انا عذراها لإني لو مكانها كنت هضايق لما اشوف خطيبي بيقضي وقت اطول مع واحده تانيه حتي لو مفيش بينهم حاجه..انا اتعودت ابقي لوحدي من زمان.. وانا الفتره دي مش عايزه اتوتر عشان أفتتاح المعرض قرب وعايزه اركز في الرسم وبس عشان كده جيت أقعد معاكي هنا"
حطيت إيدها علي إيدي وابتسمت وقالتلي
"انتي بتحبي يحيي ؟"
حسيت في اللحظه دي إني عايزه احكي ليها عن مشاعري كلها تجاه يحيي..زي ما كنت بحكي ل ماما..وفعلا حكيت ليها كل حاجه من اول لقاء بينا وازاي اكتشفت حبي ليه..وازاي قدرت طول السنين دي محافظه علي مشاعري ناحيته..قولتلها كل حاجه ودموعي علي خدي وانا بفتكر كل لحظه عشناها سوا قبل ما يسافر..وبعد ما خلصت حسيت براحه لإني كنت محتاجه حد يسمعني حد يفهمني زي ما ماما كانت بتفهمني....
مسحت دموعي بإيديها وقالتلي بحنيه
"عايزه نصيحتي يا ريتال..اعترفي ل يحيي بمشاعرك ناحيته...كتير عليها تفضل مدفونه جوا قلبك طول السنين دي..ده الوقت المناسب انك تتخلصي منها..ولو يحيي طلع مش بيبادلك نفس شعورك أبعدي عنه ده هيكون سبب قوي إنك تسيبيه علي الاقل هتكوني ارتحتي بدل العذاب اللي انتي فيه ده..فكري في كلامي كويس.. انا حاسه ان دي مش نهاية حكايتك انتي ويحيي.. وهنا زي بيتك بالظبط تيجي وتقعدي فيه وقت ما تحبي"
ابتسمت ليها واستأذنت منها ودخلت قعدت في الأوضه اللي كنا انا ومريم موجودين فيها اخر مره افتكرت لما كنا بنتفرج علي فيلم رعب سوا وهزارنا وضحكنا ولما كلميتني عن حبها ل ُمراد كان من أحلي لحظاتنا سوا هنا...
جهزت قدامي أدوات الرسم واللوحه قدامي علي الحامل الخشب وابتديت ارسم اول حاجه ظهرت علي بالي...
بعد ما خلصت سيبت الفرشه من إيدي وعيني علي اللوحه كانت عباره عن شجره كبيره وجميلة وعليها ورود بلون اللاڤندر ومتزينة بلؤلؤ كإنها بتشع ضوء وأي حد يشوفها لازم يقع في جمالها بس ظلها غير شكلها الظاهر للناس كان باين إنها شجره متهالكه كإن مر عليها مئات السنين اوراقها واقعه والورود دبلت وحالتها متدهورة..
المخزي من اللوحه عدم الإنخداع بالمظاهر اللي ظاهرة للكل ياما في ناس كتير بتخبي حقيقتهم المأساوية خلف قناع الجمال..في اللي بيلبس قناع السعاده عشان يخبي حزنه وألمه وفي اللي بيلبس قناع الطيبه عشان يخبي لؤمه وخبثه..
الكل بينبهر بالجمال الخارجي مع ان الجمال الحقيقي هو جمال القلب والروح...
شيلت اللوحه من علي الحامل مسكتها وحطيتها جنب المكتب وحطيت عليها غطا يحافظ عليهامددت جسمي علي السرير ونمت....
......................................
عدي يومين وانا ف إسكندرة والنهارده واحنا قاعدين بنتفرج علي التلفزيون سمعنا جرس الباب إلين وقفت وراحت فتحت الباب وكان توفيق دخل سلمت عليه وإلين دخلت المطبخ تعمله قهوه ابتدي كلام وقالي
"ايه أخبار الرسم هتقدري تخلصي في الميعاد المحدد"
"اه ان شاء الله انا بدأت في رسم اللوح وياريت تعجبك"
"المهم تكون عجباكي انتي وراضية عنها وتكوني واثقة انها هتعجب الناس يوم الافتتاح"
قولتله بثقة
"اكيد طبعا انا واثقة في ان رسمي هيعجب الناس"
ابتسم وقالي
"هي دي الثقة اللي كنت عايز اشوفها في عينيكي من اول ما شوفتك..عايزك دايما تبقي واثقة في نفسك وانك تقدري تعملي الافضل دايما"
ابتسمت ليه وكنت ممتنه لتشجيعه ليا وثقته في موهبتي سمعته بيقولي
"بس اهم حاجه ان ميكنش في اي حاجه تأثر علي شغلك مهما كانت هي ايه حاولي دايما تعرفي تفصلي بين شغلك وحياتك الشخصية انسي اي مشاكل حصلت معاكي وانتي بترسمي لأنك لو فكرتي فيها هتأثر علي شغفك وثقتك هتتهز ايا كان هو ايه حاولي انه ميأثرش عليك"
قولتله بثقة "متقلقش انا لما برسم بركز علي الرسم وبس مفيش حاجه بتشغلني عنه مهما كانت ايه هي "
إلين دخلت ومعاها القهوة بتاعته لاحظت نظرات الحب في عينه ليها وحسيت إني هكون طرف تالت بينهم مالوش لازمه عشان كده استأذنت منهم وخدت أدوات الرسم بتاعتي وشنطنتي وخرجت من البيت وقعدت قدام البحر في مكان بعيد وخالي من الناس عشان اقدر ارسم حضرت كل ادوات الرسم واللوحه علي الحامل وعيني علي البحر سرحانه في جماله واشعة الشمس منعكسه عليه صدق اللي قال ان البحر بياخد همومك كلها كإنه بيشعر بألمك وبيبدله براحه وسكون..مسكت الفرشة بعد ما فكرت في اللي هرسمه وأطلقت العنان لإيدي وتفكيري يبتدوا شغلهم سيبت الفرشة والالوان من ايدي بعد ما خلصت وبدأت اتفرج علي اللي عملته كانت اللوحه عبارة عن جزئين الجزء اللي فوق كانت الشمس واضحه واشعتها منعكسه علي البحر وامواجه مرتفعه وأشخاص راكبين الأمواج ومستمتعين اما الجزء التاني القمر واضح ونوره منعكس علي البحر المظلم وفيه مركب وعليها اشخاص باين عليهم الاستمتاع والهدوء...
بالنسبة للشمس والقمر كل واحد فيهم مادد ايده بيحاول يوصل للتاني عايزين يتجمعوا سوا عشان يستمتعوا مع بعض زي الناس اللي بيشوفهم كل يوم بس عمرهم ما قدروا يوصلوا لبعض بالرغم إنهم عارفين انه مستحيل يتجمعوا سوا في مكان واحد إلا إنهم لسه بيحاولوا ومفقدوش الأمل وحبهم لبعض عمره ما انتهي وبيزيد كل يوم عن اللي قبله...
بصيت علي الساعه ولاحظت إني قاعده اكتر من ساعتين في المكان غلفت اللوحه ولميت كل أدواتي وكلمت إلين طمنتها عليا عشان كانت متصله بيا وقفت من علي الكرسي مسكت اللوحه ولبست الشنطه في دراعي وانا ماشية خبطت في طوبة فقدت توازني وكنت هقع بس في حد مسكني من دراعي لسه هشكره اتفاجأت بوجود يحيي!....
...................................................
توقعتكوا ايه اللي هيحصل بين يحيي وريتال ؟
نتقابل البارت الجاي 🥰
أنت تقرأ
الدنيا علمتني
Romanceالدنيا علمتني إزاي أحب وأغامر وأواجه وأجرب حاجات جديده اتعلمت اثق في نفسي وأقدرها وأقيمها واحب نفسي الاول قبل اي شئ في الدنيا عشان اقدر ألاقي الحب في عيون اللي حواليا واتقبل عيوبي قبل مميزاتي عشان اقدر اصلح من نفسي،اتعلمت إزاي أحدد أهدافي وسبب وجودي...
