-
في مجلس نايف الي كانت تتعالى فيه اصوات الرجاجيل والتراحيب والعود
فيصل: عالبركه يابو مساعد
ابتسم عبدالله : الله يبارك فيك وعقبال عيالك يارب
سعود ابتسم وهمس لسلطان: ماضنتي
سلطان ناظر عايض المشتط ويصب قهوه ويدخل دله ويطلع دله
سلطان: عايض هجل انت المتخرج ؟
عايض : هاه ؟
سلطان: بشويش على عمرك وانا اخوك
سعود: بدال ماتعاونه ، وقف سعود يمد يده ياخذ الدله من عايض : عنك يابو نايف
عايض : لا لا خلها انا اصب
سعود وسع عيونه لعايض وأبتسم عايض يعطيه : لبى كبدك
طلع عايض من المجلس يدخل للمطبخ مع قسم الرجال وتنحنح
غزل : تعال عيوض ماعندي احد
عايض : دله دله وانا اخوتس
غزل : ابشر ، راحت تلقم القهوه وجلس عايض يفتح جواله يدردش فيه
غزل : وش صار على العشاء ؟
عايض : أبوي وابو نواف مستلمينه ، الا وين ريومه ماشفتها اليوم
غزل : نايمه الله يصلحها ، امسك امسك الدله ، تبي بيز ؟
عايض هز راسه بالنفي وضبط عصبته واخذ الدله من غزل وطلع لقسم الرجال
"
الجهه الثانيه من بيت ابو عايض (الحريم)
جالسين والسوالف ماخذتهم وكل ثنتين يسولفون بموضوع غير
كانت غيم جالسه مع بنات ابو عبدالله وبنات خالها محمد وسحاب جالسه بزاوية المجلس مع ليان "
غيم : بتسافرون ؟
مشاعل: اكيد اعمامي مزعجين ابوي يبونا نروح عشان يحتفلون في عبدالله
سديم: وبرضوا عبود بيتملك هالصيفية على بنت عمي صالح
شموخ :مين ؟
سديم :غيداء
جمد وجه غيم وناظرتهم بصدمه : بيتزوج عبدالله ؟
مشاعل : اي ابوي اعطى عمي كلمه اول مادخل عبدالله الدوره ، قاله ان عبدالله اذا تخرج ماياخذ إلا غيداء
شموخ: عاد والله غيدا جميله صدق تليق عليه
كانت غيم اقل مايقال عنها مصدومه ومفجوعة ، شالت هم نوره لو سمعت او عرفت وش بتسوي !
وفاء همست لشموخ: مو كان يحب نوره وبيخطبها ؟
شموخ بهمس : بنت عمتنا طلعت هطف الولد تخرج وبيتزوج بنت عمه
" كانت نوره بالمطبخ تساعد غزل وتسولف معها
نوره: تصدقين نسيت ماصليت العِشاء ؟ وربي تذبحني امي
غزل : اذا ماصليتي ادخلي غرفتي شوفيها اخر الممر
نوره هزت راسها : اي والله ماصليت ، اجل عن اذنك
ابتسمت غزل : السجاده داخل ودوره المياه وترا ريم عندك انتبهي لو بكت
هزت راسها نوره ومشت تروح لغرفه غزل بس اخطأت ودخلت غرفه عايض، دخلت وسكرت الباب ووراها بس وقفت تستوعب الغرفه الي هي فيها ، ماهي غرفه غزل كانت بتطلع بسرعه بس جمد وجهها من انفتح الباب وكان خلفه عايض الي شايل بيده دروع ابوه يبي يدخلها غرفته بعيدا عن الاطفال ، وقف بصدمه يناظر الي قدامه واقفه ، ماتدري وين تروح ولا كيف تخبي نفسها كانت واقفه امام الباب وهو يناظر ، يناظرها قدامه بشعرها المدرج وفستانها المفتوح كتف واحد وصنمت تنتظره يطلع ! حس انه أطال النظر وطلع وقفل الباب معه كان ماسك قفل الباب ويناظر الفراغ ،رفع راسه للباب الي انفتح قدامه وكانت بتطلع بسرعه وناظرته لازال وأقف متنح قدام الباب نزل عيونه بسرعه وصد عنها ومشت عنه تركض تطلع للصاله ، ناظر مكانها وعض شفته وهو يضحك بفشله من موقفه "
جلست بجانب غيم وهي تشتم نفسها مية مره
غيم كانت تتمعن في ملامح نوره كانت خايفه لايكون وصلها طرف علم ؟:وش فيك نوره
نوره وهي تهوي على نفسها بيدها : احتريت الله يلعنه
غيم : استغفري وش فيك !!
نوره : استغفر الله ، بقولك اذا رجعنا ماينفع الحين
غيم : توترتي مره ؟
نوره : مو مره ألا فطست وانتهيت من التوتر
دخلت غزل وهي تجلس : نوره شفتي ريم معك ؟
نوره ناظرتها بفهاوه : هاه ؟ وين شفتها ؟
غزل : مارحتي تصلين بغرفتي ؟
نوره بابتسامة مزيفة : اهاااه اي اي تذكرت، طلعت وهي نايمه
ام عايض: غزل وانا امك هي نايمه من عصر ؟
غزل:نظامها ملخبط هي وفارس مايقومون الا الفجر
منيره: صحيها الحين عشان تنام باليل ترا افضل لك
غزل : بتقعد تبكي اعرفها
ساره: والله ياالاطفال انهم عقوبه الله يصلحهم
منيره: يووه كانت نوره معذبتني ب طفولتها شرسه وقت النوم بشكل
ساره : ووقت العزايم بعد تقعد تبكي لين ترجعين للبيت
نوره ضحكت : يمه خير والله اني لطيفه
ضحكت غيم: لطيفه الحين ماختلفنا بس قبل ؟
ام عايض: الا نوره يازينها بصغرها وكبرها عقبال مانشوفها ام
تلاشت إبتسامة غيم وابتسمت نوره بخجل
منيره: ان شاءلله
غزل وهي تهمس ل امها : عايض يقول انهم حضروا العشاء
هزت راسها ام عايض وقالت للحريم يقومون للعشاء "
سحاب مسكت ذراع غيم : فيك شي ؟
غيم: لا ليه؟
سحاب: مدري قالب وجهك مو بخير ، امي قايله لك شي ؟
غيم بقلة صبر سحبت ذراعها : قلت لا ماتفهمين؟
مشت غيم تاركتها وعقدت حواجبها ب استغراب
جت نوره: شفيكم اليوم مو طبيعيين؟
سحاب: قالت لك شي غيم؟
نوره: عن وشو!
سحاب: مدري وجهها مو عاجبني فيها شي احس
نوره : اذا رجعنا بتقول لنا اكيد
"
