سبحان الله وبحمده سبحان الله العظيم
بقلم/مريم محمد
أمجد في الشركة رايح لأمان لقى مكتبه فاضي راح لفارس وسأله عنه .. وفارس قاله اللى حصل كله مع اماليا وأمجد اتنرفز من تصرف ابنه... وراح وراه على البيت .. دخل لقاه نايم على رجلين مامته ومغمض عينيه فوقف قدامه وبهجوم : ممكن اعرف ايه اللى سيادتك عمتله في الشركه ده ؟
أمان : عملت ايه ؟
أمجد : انت عارف انت عملت ايه كويس اوي
أمان : فعلا .. وشايف اني ماغلطتش في حاجه
أمجد بيزعق جامد : قوم اتعدل وانت بتكلمنى يا أستاذ
أمان دماغه وجعاه جدا ومش قادر يقوم بس اتحامل على نفسه وقام : نعم يا بابا حضرتك متعصب ليه ؟
أمجد : لا يا أمان انا طول عمري بقول عليك إنسان عاقل وهادي بس بالمنظر اللى انا شايفه ده فانت انسان بارد .. ايه برودك ده ؟ من امتى كنت كده ؟
أمان : يعني حضرتك جاي دلوقتى تتخانق معايا عشان شايفني بارد ؟
أمجد : لأ .. ممكن أعرف ايه اللي عملته مع أماليا العمري ده ؟
أمان بهدوء : وقفتها عند حدها ووضحتلها نظام الشغل عندنا
أمجد : بالزعيق .. بالكلام الجارح .. باسلوب مهين
أمان : انا مازعقتش ولا عليت صوتي .. انما الكلام والاسلوب فهي اللى اضطرتني لده .. لما تيجي واحده وتدي لنفسها حقوق مش بتاعتها وجايه تتكلم معايا بمياصه ومنهى القرف يبقى لازم تقف عند حدها .. لما تيجي واحده وتغلط في هدى .. هدى يا بابا اللى شغاله معانا بقالها عشر سنين عمرنا ما شفنا منها غلطه واحده كانت شغاله معاك وبعدها اشتغلت معايا وانا لسه صغير وهي اللي فهمتني الدنيا ماشيه ازاي وكانت معايا خطوه بخطوه لحد ما بقيت الانسان اللي قدامك .. هدى اللى حضرتك اعتبرتها زي بنتك وجوزتها بنفسك وكنت شاهد على عقد جوازها هدى اللى كانت واقفه معانا يوم حادثة زياد وقالتلنا ماتقلقوش من اي حاجة روحوا انتوا وانا هتصرف في الشغل وفعلا ظبطتلنا الدنيا من غير اى مشاكل .. دي هدى مش اى حد.. اختى الكبيرة اللى امي ماجبتهاش وتيجي واحده تغلط فيها وتكلمها بمنتهى التكبر والتعجرف وتعاملها بدونيه وتمد ايدها كمان وجايه تقولي اطرد الانسانه اللوكل دي يبقى لازم تقف عند حدها.. لما تيجي واحده تزعق في نص شركتي بطريقه سوقيه زي اللى هي عملتها يبقى لازم تقف عند حدها .. واحده المفروض انها من أحسن شركة ديكوريشن في مصر بس مابتحترمش حدود الشغل وبتتعامل كأنها في نادي ولا الشغل ده لعبه بالنسبالها
أمجد بجدال: وانا المفروض اقول لابوها ايه لو عرف اللي انت عملته مع بنته
أمان : قوله علم بنتك أصول الشغل الأول قبل ما تبعتها تشتغل.. بس الظاهر يا بابا ان الناس دول عمرهم ما تعاملوا مع حد زينا تقريبا كل تعاملاتهم كانت مع شركات اقل منهم فمتعودين على اسلوب التكبر وفرد العضلات عليهم.. ولما اتعاملوا مع حد اعلى منهم بان كل ده .. ده اللى عندي ولو مش عاجبهم اسلوبي يتفضلوا يفضوا الشراكة اللى بيننا وكل واحد يشوف شغله انا مش ناقص حرقة دم .. ولو حضرتك مش عايز تتكلم معاه صدرني انا وانا هعرف اتعامل كويس جدا
سكت يسمع رده بس هو ماتكلمش فسأل : حضرتك عندك حاجه تانيه تسأل عليها ؟
أمجد سكت لانه عارف ان ابنه عمره ما بيغلط في حد الا اذا هو تجاوز حدوده الاول والبنت فعلا كل مواقفها دي كانت مستفزه
أمان : طيب ممكن اطلع على اوضتي ولا هتسيبني واقف كده لحد ما اقع من طولي ؟
BINABASA MO ANG
أريج الأمان (الجزء الأول) بقلم/مريم عبد القادر
Romanceهل يحتاج الحب الي ميعاد أو سبب ؟ . فتاة تحب الأخ الأكبر لصديقتها ولكنهما من عالمين مختلفين فهل يمكن أن تجمع الأيام بينهما أم أن ذلك الحب سيكون الموت هو مصيره . أريچ الأمان بقلم/مريم محمد عبد القادر M.M
