ثغرات الماضي

الفصل التاسع عشر

#ثغرات_الماضي
#طيبة_الربيعي
*الفصل التاسع عشر*🔥🔥🔥

حبايب چنت ملتهية بأحتفالية عيد الغدير فمگدرت انشر من وكت
وهذا بارت طويل تعوضياً عن التأخير
قرائة ممتعة☺️
__________________

صابرين... مشيت للأستقبال والبنات وراية، التفتت عليهن

صابرين: بنات ايدي توجعني، گوة شايلة الصينية
بيداء: يمعودة هسه وكتهة ايدچ، طبي ضيفيهم وخليهة عالميز
صابرين: لچ هو قابل بكيفي

الوجع هاج علية ومعصم ايدي من شلت الصينية مثل التخدر

ميس لزمت ايدي، باوعت ليدهة ورجعت باوعتلهة

ابتسمت: صدگيني هذا كُلة توتر، ايدچ كلشي مابيهة
من تضيفيهم مراح تحسين غير الوقت طاير
بيداء: اي مو راح تفوت يم مطيرچية
ميس: سكتي انتي وترتيهة للبنية بالزايد
بيداء: دفوتي عاد مو سويتيهة قصة عنتر، ممضيفة چاي قبل

جريت نفس عميق وخطيت خطوتين، ميس فتحت الباب واني دخلت

صابرين: سلام عليكم'طيبة_الربيعي'

ردو السلام، بقيت اباوع للگاع لان العيون كلهة صارت علية، والوجع كل ما جالة يزيد

قدمت للأماية اول شي مثل ما علموني، ومشيت اريد اقدملة چان تفلت الصينية من ايدي المكسورة، الأستكاين كلهن وگعن والچاي صار قسم بالگاع وقسم عليه

صاحو الله، واني بلحظتهة معرفت ابچي من الفشلة لو اطلع ركض واختفي من الوجود

بس المشكلة بيدي

تصنمت بمكاني اباوع على الديصير گدامي، شاهين طلع ورجع بيدة وصلة وعماد واگف يمسح بقميصة

لگيت امي بصفي

ام عواد: شبيچ بتي

وصوتهة بي نبرة غضب، عبالك انخرست اريد الكلمة تطلع ماكو

اباوع على عماد يباوعلي ويمسح بالقميص، شاهين باوعلي بنظرة غضب، واضح راح يسويهة قضية علية

صابرين: اسفة مو قصدي، بس ايدي...

ابو عواد: شبيچ بابا متشوفين، لا حول ولا قوة الا بالله

طلعت الدمعة محصورة بعيني

البنات واگفات والقلق باين بعيونهن

ميس: شصاار
بيداء: شصخمتي، متعمدة تسوين هيچ موو

ركضت للمطبخ، ايدي متخدرة وذولة عبالهم متعمدة اوگع الچاي عالولد