Spring Blossoms under Moonlight

二

"ညီလာခံသိမ်းမယ်။"

​အ​နောက်မှ မှူးကြီးမတ်ရာတို့၏တီးတိုးစကားသံများကို ​လျစ်လျူရှု၍ ညီလာခံခန်းမအား ထယ်ရယ် ​ကျောခိုင်းလိုက်သည်။

"ချိုး​တော်​ရေ အသင့်ပြင်ထားပြီးပါပြီ အရှင်။"

စကား​ပြန်ပြောချင်စိတ်မရှိ​လောက်​အောင် ပင်ပန်း​နေသဖြင့် အထိန်း​တော်ချုပ်၏စကားကို ​ခေါင်းငြိမ့်၍သာ တုံ့ပြန်လိုက်ပြီး ​အဆောင်​တော်သို့ တန်းတန်းမတ်မတ် ​လျှောက်လာခဲ့လိုက်သည်။

​ရေခပ်​နွေး​နွေးက တစ်ကိုယ်လုံးရှိ ​တောင့်တင်း​နေသည့် အ​ကြောအချင်များကို ​ပြေ​လျော့​စေကာ နွမ်းလျလျစိတ်ကိုလည်း အနည်းငယ် ကြည်လင်လာ​စေ၏။ မျက်ဝန်းများကိုမှိတ်ချလိုက်မိ​တော့ မြင်​ယောင်လာမိသည်က ရာဇမာန်အပြည့်နှင့် တည်တင်းလှ​သော မျက်နှာ။

တစ်လ​ကျော်ခဲ့ပြီ။ မင်္ဂလာဦးညပြီးကတည်းက မမြင်ခဲ့ရသည့် မျက်နှာအား အ​တွေးထဲမှမထုတ်နိုင်သည့် မိမိကိုယ်ကိုလည်း ထယ်ရယ် စိတ်ပျက်မိသည်။

နူးနူးညံ့ညံ့​ထွေး​ပွေ့မှုများအကြား အိပ်​မောကျသွားပြီး​နောက် ​နိုးထလာရသည့်မနက်ခင်း၌ ​နွေး​ထွေးသည့်ရင်ခွင်ကျယ်တစ်ခုအစား ​​​​​အေးစက်စက်အိပ်ယာတစ်ခြမ်းနှင့် အမိန့်စာတစ်​စောင်ကသာ ​စောင့်ကြို​နေလိမ့်မည်ဟု မည်သူထင်မည်နည်း။ ဝတ္တရားအရ၊ ဓ​​​လေ့ထုံးတမ်းအရ လုပ်​ဆောင်​ပေးခဲ့သည့် အပြုအမူ၊ အ​ပြောအဆိုများကို ထယ်ရယ် အဓိပ္ပါယ်​ကောက်လွဲသွားပုံပင်။

မင်္ဂလာပွဲအပြီး​​နောက်တစ်ရက် မိုးမလင်းမီအချိန်မှာပင် ဧကရီဖြစ်သူအား နဂါးတံဆိပ်​တော်နှင့်အတူ အုပ်ချုပ်​ရေးအာဏာအလုံးစုံကို ယာယီလွှဲ​ပြောင်းအပ်နှင်း​ကြောင်း အမိန့်ပြန်တမ်းတစ်​စောင်ထုတ်ပြန်၍ ချက်ချင်း စစ်ထွက်သွားသူအား ထယ်ရယ် နားမလည်နိုင်သလို နားလည်ချင်စိတ်လည်း မရှိ​တော့​။ ကိုယ်က တစ်ဖက်လူအတွက် နှုတ်ဆက်စကားဆိုရ​လောက်​အောင်ပင် အ​ရေးပါမ​နေခဲ့ဘူး မဟုတ်လား။

ဂျိုဆွန်း၌​နေစဥ်က ခမည်း​တော်နှင့်အစ်ကို​တော်အား အုပ်ချုပ်​ရေးပိုင်းဆိုင်ရာ ကိစ္စရပ်များတွင် မကြာခဏ ဝင်​ရောက်ကူညီ​ပေး​​လေ့ရှိ၍ အစီရင်ခံစာများဖတ်ရှုကာ တံဆိပ်​တော်ခတ်နှိပ်ဆုံးဖြတ်​ပေးရသည့် လုပ်ငန်းစဥ်များက ထယ်ရယ့်အတွက် စိမ်းသက်မ​နေ​သော်လည်း တာဝန်ကြီး​လေးလွန်း၍ စိတ်ပင်ပန်းလှ၏။ သို့​သော် စစ်ထွက်သွားသည့် ဧကရာဇ်ငယ်၏အာဏာစက် ပြင်းလွန်း​သော​ကြောင့်ထင်၊ သမိုင်း၌ တစ်ခါမှမရှိခဲ့ဖူးသည့် ဧကရီတစ်ပါး တက်​ရောက်အဆုံးအဖြတ်​ပေးသည့် ညီလာခံအား ကလန်ကဆန်လုပ်၍ ကန့်ကွက်သူမရှိ​ခြင်းက အံ့အားသင့်စရာ။ ဤအချက်​ကြောင့်လည်း အလုပ်များ​သဖြင့် စိတ်ပင်ပန်း၊ လူပင်ပန်းသည်ကလွဲ၍ အခြားစိတ်ဖိစီးမှု ကြီးကြီးမားမားမရှိ​ခဲ့ခြင်း။