قِصص الأنبِياءْ | The prophets' stories

قصة سيدنا يوسف ج٢

السلام عليكم ورحمة الله وبركاته💙

عساكم بخير يا رفيقات الفردوس بإذن الله ✨💙

صلي علي النبي قبل القرآءة يا رفيقة 🌸

#قصص_الأنبياء

#قصة_سيدنا_يوسف_الجزء (2)

وقفنا المرة إللي فاتت عند إخوة يوسف عليه السلام لما أقنعوا أبوهم يعقوب أنهم يأخذوا يوسف معاهم وهم خارجين في نزهة،
تاني يوم فعلا إخوة يوسف عليه السلام أخدوه لمكان البئر
ومسكوه عشان يرموه

فقال لهم: أنا أخوكم إزاي هتعملوا فيَّ كده😥!

قالوا له: إنت ملكش ذنب، الذنب ذنب أبوك
وقلّعوه القميص ورموا أخوهم يوسف فعلا في البئر💔

*"فَلَمَّا ذَهَبُوا بِهِ وَأَجْمَعُوا أَنْ يَجْعَلُوهُ فِي غَيَابَةِ الْجُبِّ "*

طيب فين عقلهم وهما بيعملو ف أخوهم كدا ؟؟!!..
فين خوفهم من ربنا ...؟؟! ما هم مؤمنين بالله خدوا بالكم مش كفار😅

وأبناء نبي...يعني تربيتهم مش زي أي تربية👌

لكن سبحان الله هم في النهاية بشر خطاؤون..

بيغويهم الشيطان وبتغويهم أنفسهم وشهواتهم زي أي بشر،الغيرة والحسد عموا قلوبهم والشيطان مش سايبهم😑

في اللحظة دي ربنا أوحى ليوسف عشان يهوِّن عليه خوفه وألمه إنه في يوم من الأيام انت هتحكي لاخواتك الموقف ده وهم مش عارفينك، ومذكورة في تكملة الآية..

*"وَأَوْحَيْنَا إِلَيْهِ لَتُنَبِّئَنَّهُمْ بِأَمْرِهِمْ هَذَا وَهُمْ لَا يَشْعُرُونَ"*

وده من لطف ربنا بالعباد...بيبتليهم لكن في نفس الوقت يبعتلهم رسايل تطمنهم وتهدي من حرقة قلبهم،

بعد كده إخوة يوسف عليه السلام أخدوا قميصه وغرّقوه دم خروف كانوا دبحوه،

ورجعوا بالليل لأبوهم ودخلوا عليه يقولوا له وهمّ بيعيطوا قال يعني بقى قلبهم حزين وكده🙄

احنا رحنا نتسابق وسيبنا يوسف ياخد باله من الحاجات بتاعتنا فالذئب هجم عليه وأكله😭😭
وطبعا انت مش هتصدقنا...انت دايما بتتهمنا بالكذب😤

☆فكإنهم بيحرجوا أبوهم عشان يصدقهم يعني😏

*"وَجَاءُوا أَبَاهُمْ عِشَاءً يَبْكُونَ * قَالُوا يَا أَبَانَا إِنَّا ذَهَبْنَا نَسْتَبِقُ وَتَرَكْنَا يُوسُفَ عِنْدَ مَتَاعِنَا فَأَكَلَهُ الذِّئْبُ وَمَا أَنْتَ بِمُؤْمِنٍ لَنَا وَلَوْ كُنَّا صَادِقِينَ"*