سيرة الرسول صلى الله عليه وسلم

صلوا على النبي صلى الله عليه وسلم

سيرة الرسول ﷺ
🌅✅ لو عرفتموة ✅🌅

🔅الحلقة 178 🔅تلخيص غزوة حنين ❤

عشان نقدر نستوعب الغزوات سوا.. فاحنا اتفقنا اننا حنزل بوست يبقى فيها تفاصيل كل غزوة فى نقاط مختصرة و كمان أسبابها .. و بعدين حننزل يوميا بتفاصيل الغزوة كلها على حلقات بإذن الله♡
#غزوة_حُنَين

1- التوقيت: حدثت سنة 8 هجريا..
2- سميت بهذا الاسم :
لأن المعركة كانت فى منطقة اسمها حنين.

3- طرفي القتال :
الطرف الأول..قبيلة هوازن و ثقيف الكافرة 25 ألف مقاتل..
الطرف التانى..المسلمين 12 ألف جندى.

4- أسباب الغزوة :
اتجمعت قبيلة هوازن و ثقيف الكافرة عشان يحاربوا النبى عليه الصلاة و السلام بعد انتصاره فى فتح مكة ..

أحداث الغزوة :
- اتجمعت قبيلة هوازن وقبيلة ثقيف بجيش قوى من 25 ألف مقاتل .

- وصلت الأخبار للنبى صلى الله عليه و سلم
و كان لسة فى مكة.. و حيخرج معاه 12 ألف مقاتل.. 10 آلاف مسلم من اللى فتحوا معاه مكة و معاهم 2000 مقاتل من مسلمين مكة الجدد..

- حيجهز النبى عليه الصلاة و السلام الجيش ماديا بعدد كبير و أسلحة كتيرة و حيأجر سلاح من واحد اسمه صفوان بن أُمية ..

- بسبب التجهيزات المتميزة لجيش المسلمين.. حيحصل شئ مؤسف جدا و هو ان بعض المسلمين اتغروا بالأسلحة و العدد الكبير.. و حيحصل إعجاب بالنفس..و بسبب ده حيحصل تقصير فى حماس الجيش فى مواجهة العدو..

- دخل المسلمين أرض المعركة و كان العدو أخد مواقع القتال و عمل كمائن و عملوا خطة فى منتهى الخبث و هجموا على المسلمين..

- اشتد القتال و الذعر و النبى وقف فى نص المعركة ينادى بصوت عالى عشان يلم المسلمين من تانى و يقول " أنا محمد لا كذب ..أنا ابن عبد المطلب " و يتلم الجيش حوالين النبى و يتحمس من جديد و يجتهد فى القتال..

- اتقلبت الموازين و تظهر بشاير إنتصار المسلمين و ينزل الله الملائكة و تحارب مع المسلمين.. و تحصل أحداث مهمة و مؤثرة جدا فى نص المعركة.

حنعرفها بالتفصيل المرات الجايه إن شاء الله❤

🔆🔆🔆🔆

🌅✅ لو عرفتموة ✅🌅

🌼الحلقة 179 🌼يلا صلوا على النبى :)

#غزوة_حُنين (ج1)

خلاص فتح النبى مكة ..إحنا دلوقتى سنة 8 هجريا، يعني بقالك يا رسول الله 21 سنة جهاد يا رسول الله.. و بعد فتح مكة فضل النبى فى مكة لمدة 19 يوم بالظبط.. هيحصل إيه؟ هيحصل.. غزوة حُنين.. حتيجى قبيلة هوازن و قبيلة ثقيف ومعاها عدد كبير من القبائل عشان يحاربوا المسلمين و يقتلوا النبى .. فالقبائل الكافرة دى حتجمع 20 ألف مقاتل بقيادة واحد اسمه مالك بن عوف وبدأ يستعد للخروج لمحاربة المسلمين ..