بولاريس

باعث

دخل بكامل زينته جاذب انظار الكل عليه و لشكله و لهيبة خطواته و الجدية الحاده الواضحه على وجهه

سلم قبل يفك زر بدلته و يقعد بين كبار الشخصيات امثاله ، كان عشاء بسيط المفروض يتناقشون بمواضيع بعيده عن شغلهم بس للحدود و الرسمية اللي بينهم كانت مواضيعهم محدوده عن مناقصه و بيعه و امور عقاريه استثمارية

كان هو الاكثر هدوء بينهم بس لمجرد نطقه بحرف الكل ينصت له وبكل تركيز و بنظرهم هو الاهم و الاجرا في أرائه بسبب حكمته و كلامه المنطقي و انه ما يوقف على نقطه مشكك فيها او مستصعبها ولكل مشكله عنده لها حل

ولوهلة سرح بعيد عن كلامهم لمكان قلبه هناك بس تفاجئ فيه جاي لهم بخطواته الثابته و بابتسامه تزين ملامحه

ما توقع وجوده بينهم ولا لواحد بالمية بس حس بالقدر يجمعهم بكل بقعه يخطون عليها

: حيالله الدكتور تيم

قرب منهم و سلم باليد بس على اللي واقف يرحب فيه : الله يحييك و يبقيك

وعلى كثرة الكراسي الا انه اختار يقعد قدام فهد

لف واحد فيهم على فهد وقال : اعرفك على الدكتور تيم احد اهم العناصر بينا و اللي راح يكون ان شاء الله شريك لنا

لف فهد على تيم وقال : تشرفنا دكتور تيم

تيم بابتسامه جانبيه وقال : الشرف لي اخ .. وش اسمك بالخير ؟

رفع فهد حاجبه و ابتسم بسخريه وقال : فهد

اوما تيم وهو يبتسم بس لثواني تغيرت ملامحه للجدية ، كان وده يقرب منه ويحضنه و يقوله شكثر هو مبسوط من الصدف اللي تجمعهم بس المكان يحكمه و للتحدي شروط .. ونفس الشي عند فهد

اللي ما قدر يشيل عينه عنه من قعد قباله و ومعجب بملامحه الجدية المرسومه على وجهه معطيه شكله الطف من ما هو عليه بنظره

قرب شاب بمنتصف العشرين يقدم القهوة العربية وهو مبتسم بلطف لفهد اللي اخذها وقال بصوت ثقيل : سلمت

قعد يقدم القهوة الى ان وصل لتيم اللي قال وهو مكشر : واصله

ابوعادل قال : لو تبي غير القهوة العربيه انا اقولهم يجيبون لك ما تشتهي نفسك امر يا تيم

ابتسم تيم بتكلف وقال : ما ارد فنجانك يا ابوعادل بس واصلة يابعدي

رجع الشاب يوقف بمكانه بس قريب منهم ماسك دلة القهوة بيده وعينه على فهد اللي مو يمه اصلاً و تركيزه باللي قاعد قدامه يتجنب يناظر فيه لسبب يجهله

و بدت تنقص الطاولة على شوي شوي الا ان بقى فيها هو وقلبه مترأسين الطاولة

قرب الشاب يقدم كأس الماء لفهد وهو واقف خلفه عشان وجهه يكون قريب من وجه فهد لماً ينزل الكاس على الطاولة و يهمس له : مالي فرصه معاك ؟