مراهقة والاربعيني بلهجة جزائرية

65

#المراهقة و الأربعيني:

#الجزء65:

إخلاص جربت كامل الأساليب باش يتقبلها صراع و يعتبرها زوجة حتى مرات كانت تغيضني.. رافدة الدار كامل على ظهرها و تخدم  فوق طاقتها باش ترضي الحاجة بالاك تأثر عليه بصح هو قعد شايد فالموقف ديالو و حاول يعوضها بالإحسان فالمعاملة و بالدراهم..
أنا كنت لاتية غير بروحي و بشومبرتي كل يوم مستيكيا و صراع ما ينحيش عينيه عليا..
وحد النهار رحنا لوليمة في دار عمو، كانوا كامل يخزرو فيا بنظرة تع حقد.. زوج عماتو فتحو معايا السوجي قالولي حرام عليك صراع هاجر إخلاص بسبتك، ياك أنت مرتو و هي مرتو علاش هاد الأنانية خليه يبات عندها يا لوكان ليلة فالسمانة و ما يديش ذنوب الهجر مع ربي سبحانو.. كيما ما قبلتش بداو يهدرو عليا حتى وليت نبكي، رفدت التلفون عيطت لصراع قتلو دوك جي تديني كرهت منهم..قالي هدرو عليك في موضوع إخلاص ياك؟ قتلو إيه.. قالي راني جاي.. شويا و دخل هو وليد عمو، وقف عند الباب و قال وين راهو عمي عزام؟ خرجت ليه قالو خير وليدي؟ قالو شوف عمي نهدر معاك قدامهم كامل باش يسمعوا..أنا ماشي شيفونة باش يمشيوني النسا كيما يحبو و ناخد رايهم وش ندير وش ما نديرش.. قالو حاشا أبو حرب.. قالو بصح عماتي ما خلاوش حتى حاشا كي ولاو يحكمو مرتي و يقولولها خليه يبات عند إخلاص علاش راهو هاجرها.. أنا نهار خطبتها و تزوجتها ما شاورت حتى واحد و نهار دخلت عليها ما سنيت راي حتى واحد.. ماشي أنا لي تمشيني مرا و كي هجرتها لخطر أنا لي قررت.. جبدتو هاد السوجي معايا و جوزتها و عاودتو جبدتوه مع مرتي و رايح نجوزها بصح و الله العلي العظيم و يزيد واحد يجبد هاد السوجي غير إخلاص تتطلق.. قالو راك تحوس تصيب أي سبة باش تطلقها ولا كيفاش؟ حرام عليك راهي بنت عمك و هي أولى من البراوية.  قالو رانا وصلنا للمسقي.. علاش كي خوك هجر يما مدة 50سنة واحد فيكم ما قال حرام ولا كي ولات في بنتكم وليتو تعرفوا الحق و الباطل.. مانيش دراري باش تجيو تهدرو معايا في أموراتي الخاصة.. يزيد واحد يفتح هاد الموضوع نطلق إخلاص و نخرج من العشيرة..
خلاص قادرتكم و تزوجتها باش ما نديرش مشكل مابين عمومي بصح هنا تحبس.. و دار للحاجة قالها يلا يما راني نستنى فيكم برا غاولو راني مشغول..و دار ليهم قالهم ابقاو على خير و خرج و هوما لحقوه يتعذروا و يطلبوا فالسماح..
أنا لبست و إخلاص قاعدة تبكي و ختها تدعي عليا قالتلي إن شاء الله عمرك ما تفرحي بيه و الله يكسرك كيما كسرتيها..
رجعنا للدار و أنا وقفت فالكوزينة وجدت لاتاي في بلاصة نور، جات ليا إخلاص قالتلي اصبري عليا يا المصفارة لوكان ما نخرجكش من هاد الدار مانيش إخلاص بنت صالح..
قعدت تعاير فيا بصح أنا سكت لخطر خفت من صراع كي كان زعفان يدور علينا في زوج قلت نخليه حتى يتكالما و نكون غير أنا و ياه و نحكيلو هو يعرف كيفاش يتصرف معاها..
فالليل جا صراع و تكسل فوق البونك عكسي هو حكم التلكومند و يقلب فالتلفزيون و أنا حاكمة التلفون و نقرا القصص فالواتباد..
كان الضو تع الهول لفوق مشعول شفت رجلين إخلاص كانت واقفة مور الباب تتصنت علينا.. قلت خلي هي لي جابتها لروحها ليوم نحرقلها قلبها.. حبطت من البونك و نحيت حوايجي.. صراع تشوكا قالي خير لخير الليلة تعرينا!! قتلو سخنت.. قالي تسخني و أنا هنا بصح عندك الحق ملي دخلت للشومبرة ما خزرت فيك.. جبدني لعندو و أنا نضحك و نتدلل عليه و هو يقولي اسسس نقصي صوتك فضحتينا و أنا غير نزيد فيها باش إخلاص تسمع.. حسيت روحي خلفتهالها..
حكيتلو بلي عايرتني بأصلي قالي خليك منها تهدر وش حبت أنا نردلها..
غدوا منداك نضت قبلو وجدتلو الفطور كلينا مع بعضانا.. هو راح يخدم و أنا جيت طالعة لشومبرتي غير حطيت رجلي بالدروج قابلتني إخلاص عينيها حمورا من لبكا و حالتها حالة، تعنكرت فيا لوكان صابت تاكلني خفت منها دخلت نجري لشومبرة الحاجة فرشت فالقاعة و رقدت ما فطنتش حتى صبت وليد نائل يلعب بوجهي فتحت عينيا، تقعدت حضنتو و بستو..
نطقت الحاجة قالتلي غير لخير ليليان داوستي مع صراع باش رقدتي هنا؟ قلتلها لالا بعيد الشر برك كي راح صراع يخدم عجزت نطلع تكسلت هنا و كملت رقادي.. سكتت
نوضت وجدت الفطور و حطيت و رحت نوضتهم كامل باش ياكلو من غير إخلاص ما حبتش تقعد معانا و قعدت في شومبرتها ما حبطتش كامل و ما خدمت حتى حاجة زكارة فيا..
خدمت الشغل تع الدار و خرجت سيقت الڨاراج و وقفت مع نور درت معاها الغدا، منبعد طلعت دوشت و سڨمت روحي و كي جا صراع رحت نسقيلو باش يتغدا قابلاتو إخلاص.. حطيتلو و قتلو وش وش خدمت كامل قالي الله يبارك على مرتي شاطرة و ساجية.. قالتلو أم سعد هدا خدمت نهار شكرتها و إخلاص لي يوميا رافدة الدار على ظهرها و ليوم طاحت مريضة كلمة بالشفاء عليك استخسرتها فيها.. هي هدرت و تلفونو صونا رفد و قعد يهدر و رماها فالثقيل، كي كوبا قالتلو الحاجة وليد عمك برزان زاد عندو طفل يلزمنا نروحو لدار عمك نباركولهم.. قالها ان شاء الله يما.. نطقت إخلاص قالت للحاجة لوكان تشوفيه شحال شباب الله يبارك شعرو صفر و عينيه نوازات.. قالها صراع الله يكثر خير بنت الناس لي حسنتلو النسل اما خوك ما يتشبه لوالو.. و دار للحاجة قالها يما ادعيلي ربي يرزقني بطفل من ليون و يخرج شباب كيما هي، جمال كردي مخلط مع عربي وش نقولك (هو كان يبيكي في إخلاص كي عايرتني لبارح بأصلي كي ماشي عربية)
قالتلو الحاجة ما يهمش وليدي المهم ربي يزرقك طفل يسندك في كبرك حتى و ماشي من ليليان لازم تخلي موراك زريعتك ما تقطعش نسلك بيدك.. قالها راني راضي بمكتوبي و متمني ربي يرزقني منها و لإدا ما كتبتش لحكمة لا يعلمها إلا الله الحمد لله.. بست كتفي و قتلو الله لا يحرمني منك حبيبي..
إخلاص حسها ما سمعناهاش كلمة ما قالتها حاطة راسها و تاكل هي أصلا كي تكون زعفانة تفرغ زعافها فالماكلة لي صابتها قدامها ترحيها..
فالليل كنت أنا و صراع متكسلين جات دقدقت فالباب تع الشومبرة و تبكي.. فتحلها قالها وش كاين؟ قالتلو و هي تبكي كرشي قتلني السطر.. قالها و أنا وش حبيتيني نديرلك؟ روحي لعند يما بلاك كاش ما تصيبي عندها دوا..
حبطت لتحت و هو غلقت الباب و طفى الضو و رجع لفراشو شويا هكدا و سمعها تتقيا ناض يستغفر و قال يا ربي وشنو هاد البلية.. خرج و أنا قعدت نستنى فيه يرجع، جازت نص ساعة هكداك و ما ولاش تقلقت نضت رحت لشومبرتها صبتو قاعد على طرف البونك رجل فوق رجل و هي حاكمة يدو و راقدة.. قتلو صراع يلا نعست.. نطقت إخلاص قالتلي خليه ليوم برك معايا حاسا روحي رايحة نموت.. عقدت حواجبي و خزرت فيه قالي روحي جيبي فراش و ارواحي ترقدي هنا نشوفو آخرة هاد الليلة وين.. رحت جبت و فرشت فالقاعة و هو كي حس بيها رقدت جبد روحو بلعقل و حبط لعندي دخل معايا في فراشي و حطلي يدو تحت راسي لصقت في حضنو و نشم فيه و نتحرك قالي نوضي نوضي نروحو لشومبرتنا أنا هكدا ما نقدرش نقاومك.. ضحكت و رحت معاه..
غدوا منداك صبتها الصباح تحكي للحاجة و تبكي و الحاجة زعفت مني و ما حبتش تهدر معايا وليت رجعت لشومبرتي و قعدت فيها حتى جا صراع مع الظهر لقاتو الحاجة قالتلو أنت ما تخافش ربي زعما حاج بيت ربي علاش ما تعدلش ما بين نساك في زوج؟ حياتي كاملة و أنا نزوخ بيك و نقول وليدي ما يبدلوهش النسا و مع لخر جي طفلة في شبر تخربلك مخك و تمشيك كيما تحب؟! قالها يما راني جاي عيان من الخدمة اغلقي عليا هاد السوجي بصح هي ما حبتش تسكت حتى تقلق و بدا كي العادة يخبط و يسب و عيط قال اخلااااااص... حبطت تجري لعندو حكمها من شعرها قالها فوق ما رميتي روحك عليا و بليتيني بيك تزيدي تشكي ليما مني؟! خرجو كامل باش يسلكوها من يدو و الحاجة تجبد فيه و تحلل و الحاج قالها دوك عجبك الحال؟ ياك قتلك ما تهدريش معاه دوك.. و نحا إخلاص من يدو.. ناضت تصوغ و تجبد في شعرها قالتلو فواش قصرت معاك أنا ماشي عدوتك أنا بنت عمك حرام عليك ربي من سابع سما يرحم و أنت ما حبيتش ترحمني شيبتني قبل الوقت.. هي قالت هكدا و هو زاد شعل كيفاش توقف في وجهي و تواجبو.. رمى عليها يمين الطلاق و قالهم ما نحتاجهاش ما تبقاش على ذمتي بعدوها من وجهي خير ما نفرغ سلاحي في راسها نقتلها و نتهنى منها... ناضت إخلاص تندب و تبكي و تقطع في حوايجها مع لي دارت صابتني واقفة فالدروج طلعت تجري حكمتني من راسي و تضرب و هوما طلعوا يجريو باش يسلكوني من يدها و الحاج واقف ما بيناتنا و ما بين صراع يحاول يسلكني من يدها و أنا نصوغ و في نفس الوقت ما يخليش صراع يحكمها.. المهم تخلطت غير الزڨا و التشقلالة حتى رمى صراع يدو فوق الحاج حكمها من شعرها و كركرها لتحت رماها فالقاعة و قالها تضربي مرتي قدامي يا بنت ×××× ليوم نحيك من الدنيا و طلعت لشومبرتو يجيب سلاحو و أم سعد لبست بلخف لإخلاص عباية و خمار و خرجتها تجري و الحاج يحاول يهدن فيه لخطر نائل ماكاش فالدار.. مع لخر دخل للشومبرة يريح بعدما قلب الدار بالعياط..
أنا من جيهة خفت نطلع لعندو و من جيهة  ما قدرتش نقعد لتحت لخطر الحاج ما خلاليش بالدعاوي و اعتبر بلي أنا سباب المشكل.. وليت طلعت لشومبرة حلا قعدت لتم حتى خرج مور المغرب باش دخلت لشومبرتي..
فالليل جا جبد حوايجو خبط الخزانة و  بدا يبدل و يرمي فالقاعة و راح للهول قعد يتكيف.. كي لحقت الوحدة تع الليل رحت ليه صبتو مشنف و عاقد حواجبو قتلو صراع ما ترقدش؟ قالي بعدي من وجهي.. قتلو و أنا علاش حتى كامل راكم محمليني ذنب الشي لي صرا؟ قالي قتلك نوضي من قدام خليقتي.. قعدت نخزر فيه.. ناض يعيط قالي نوووووضي.. قفزت من الخوف و رجعت لشومبرتي طفيت الضو و رقدت.. ساعة من بعد حسيت بيه كي دخل ساماني فالفراش حط يدو تحت راسي و جبدني لحضنو و رقدنا بصح قعد مشنف..
غدوا منداك مع الظهر جات حلا ضيفة كرشها لفمها و معولة عليا تقول أنا لي حاوزت خالتها، كانت تشارشيلي عيني عينك هات برك نغلط بكلمة.. قالتلها الحاجة استري على روحك ما خصناش همك باباك راهو زعفان و غير يتسبب..
مع المغرب جاو عموم صراع هدرو مع الحاج على موضوع إخلاص، قالهم دوك مستحيل نهدر معاك و هو هكدا كي ياهدن و ربي يعمللها تاويل منبعد قالو بلي سعد حايب يخطب مرا وحدوخرا.. كي جا صراع و حكاولو ما قبلش قالهم هو ما راهوش قادر على مرتو و ولادو خصو غير يعاود الزواج.. بلاش راهو كل دقيقة يجي لعندي يدي المصروف و يقولي صراع اعملي صراع ديرلي.. و زيد ما يحشمش هدا مرتو ما عندهاش بزاف ملي توافات بدا يخمم فالخطبة و الزواج.. كي كثروا عليه عمومو و حبو يقنعوه قالهم حب يتزوج ربي يسهل عليه ماشي مشكل نروح معاكم نخطبولو بصح من دوك نعلمكم ادا راهو طامع فيا نديرلو العرس غير ينساها يتكفل بزواجو وحدو..
تفاهمو بلي الجمعة يروحو يخطبولو و بدينا نوجدو للعرس، راحت حلا لصراع قالتلو بابا اعطيني دراهم باش نشري للخطبة.. جبد 25000 و جا راح يمدهملها قالتلو بابا هادي وش تكفيني رايحة نشري حوايج.. ولا مدلها 50000 و قالها خبري راجلك بلي راكي رايحة للسوق ما تقعديش دوري بالزنق بلا علمو.. قالتلو لالا بابا مارانيش خارجة وحدي رايحة مع خالتي.. قالها شكون فيهم؟ قالتلو خالتي إخلاص.. جبد 600000 و قالها هاكي وصليهالها قوليلها مصروفها.. و طلع للشومبرة..
طلعت موراه قتلو صراع اعطيني دراهم نروح للسوق.. جبد 25000 عطاهالي.. قتلو هدا ما كان؟ ما تكفنيش.. قالي ياك خزانتك معمرة بحوايج جدد مازال ملبستيهم وش رايحة تشري؟ قتلو بنتك تمدلها بلا حساب و إخلاص تبعثلها مصروفها و كي لحقت ليا وليت تحاسب.. قالي ليليان قادري روحك سينو قسما بالله تشوفي مني حاجة ما تعجبكش.. رميت الدراهم فالقاعة قتلو بناقص شد دراهمك عندك ما نحتاجهمش و ماكالاه تمن عليا بيهم.. حكمني من يدي لوهالي و عيط عليا قالي ترمي الدراهم في وجهي يا ×××× قتلو ماشي قصدي بصح وخر ما نحتاجش دراهم يلا.. طبعني للبونك بالزور و قالي يمال كي ولات هكدا و الله دورو ما تشوفيه و ما تروحيش للخطبة باش تترباي.. بديت نبكي خلاني و خرج.. فالليل جا يحوس على حقو كي العادة بعدت عليه و ما حبيتش زعف و شنف و قلب خليقتو و قالي الغلطة ديالي أنا لي دللتك فوق لي يلزم و حليتلك عينيك، لي ينوض يعايرني بيك و أنا ما نلت حتى حاجة منك بصح معليش دوك نوريلك العقلية كيفاش دايرا.. و دور وجهو عليا عطاني بالظهر و هو يغلي..
غدوا منداك كرهلي حياتي يبعثني بالعياط و التشناف و الخبيط.. و مع العصر جات هيام باش تدي الحاجة للسوق عطالهم دراهم كي قالتلو خلي ليليان تروح معانا قالها لالا خليها ما تروحش للعرس.. قالتلو ما تبقيش في خاطرها خويا، البنات كامل رايحين يشريو و يلبسو و هي تقعد تشوف..  قالها خليها باش تتربى.. نطقت أنا قلتلها ما نعرف على واش أم علي أنا أصلا مانيش حايبا نروح لي يسمع يقول عرس السلطان و ميتة باش نحضرو.. قالتلي الحاجة ما تعرفيش تشدي لسانك شويا؟ قلتلها لخطر عليا يمنو و على غير يمدو و يعاودو بلا حساب.. قالي صراع ما تحشميش وقتاش أنا قصرت معاك ياك لي تتمنايها تحضر و غيرك يتمنى لي عندك بصح انت ماشي وجه نعمة موالفة بالميزيرية.. قتلو الحمد لله ما عندناش و ما يخصناش كي كنت عند بابا صح كان قيس قيس بصح عمرو ما خلاني نحتاج لحاجة و ياريتني نرجعلهم ولا معيشتكم لي ما تنحملش.. طلعت لشومبرتي نبكي شويا لحقتني هيام تحلل فيا قالتلي نوضي تلبسي باش تروحي معايا للسوق.. قلتلها ما نروحش خليني في حالي.. قالتلي ماديريش عليه هو كي يكون زعفان و مقلق يولي غير يخلط فالهدرة طرشي ودنيك خليك منو.. قلتلها و أنا راني مخلياتو وش درتلو؟ قالتلي يمال نوضي البسي هو لي قالي اطلعي ليها باش نوصلكم للسوق راني مزروب، و الله ما يعطيه قلبو يزعفك بصح تعرفي زعافو كيفاش داير..
كي كثرت عليا هيام وليت نضت وجدت روحي و ياريتني ما رحتش.. مع لول ما انتبهش لوجهي حتى خرجنا ، غير شافني ماكيي هكداك طار فيا قالي أنت ساقطة و ما عندكش ذرة تع حيا رايحة للسوق مزوقة روحك تحوسي على البلا؟! و أنا نقعد فالدار نستنى فيك كي البروتي  وقتاش ترجعي و نشوف شحال جيبي من نيميرو تع تلفون ياااااك.. يهدر بالعياط و يرمي عليا فاللانجات قالي امسحي عليا هاد السكوندال لي راكي دايراتو في وجهك..
كي وصلنا للسوق قالي سڨمي خمارك و عينيك فلرض وماكالاه الضحك.. خبطت الباب تع الطونوبيل بالزعاف و قتلو مابيني و بين روحي روح ترنك.. دخلنا للسوق و كل شويا نقولهم امشيو نرجعو للدار ما خلاليش ڨوسطو باش نشري حتى حاجة.. حتى هيام تقلقت مني قالتلي بناقص بصح أنا الغالطة لي جاية معاكم، امشي ندخلو للدار و غدوا نخرج مع بناتي و نشري في غرضي ما خصنيش وجيع راس.. رجعنا صراع ماكانش فالدار و مع المغرب عرفنا بلي معول يدير الخطبة هنا في دارنا ماشي في دار سعد زدت تقلقت كثر، مع اللول قال ما نتحمل والو و دوك ظهر بلي المصروف و التمارا كامل علينا و أنا يمن عليا.. قعدت فالشومبرة روحي خارجة منو حتى لحق الليل دخل قالب خليقتو لا سلام لا كلام بدل حوايجو و جا ليا قبالة حكمني من ودني قالي شكون لي يروح يرنك ليليان؟ تشوكيت عمبالي ما سمعنيش.. قتلو نحي يدك وشبيك ودني وخر عليا.. جبد عليا بكف و قالي سڨمي هدرتك.. أنا تخبطي الباب عليا و أنا نهدر و تقوليلي روح نرنك؟! أنت ذرة تربية ما تسعايهاش.. يماك هكدا كانت تهدر مع باباك؟! انطقيييييي..و الله غير ليوم نعاودلك التربية يا بنت ×××× .. جا يضربني حطيت يديا فوق راسي طبعني و بعد عليا و ناض يرمي فالدوزان و يسب و يعيط ما رديتلو والو خليتو حتى عيا  سكت وحدو و خرج من الشومبرة .. ساعة منبعد رجع قالي تفرشي فالقاعة ما نحتاجكش ترقدي قدامي يلا خفي.. نضت  نجري فرشت فالقاعة و هو طفى الضو و رقد.. أنا بايتة نتقلب فالفراش و نخمم و نلوم في روحي كيفاش نغلط معاه هكداك حتى أذن الفجر ناض توضى صلى و رجع لفراشو، نضت طلعت لعندو حضنتو من ظهرو تقعد بلخف قالي نوضي عليا.. قتلو و الله ما كان قصدي... قالي راني نقولك نوضي عليا.. علاش حتى توصليني للكلام الزايد؟ خفت ربي فيك و ما ضربتكش يمال بعديني و احبطي اتقي شري.. قتلو اسمحلي.. قالي نووووضي وليت حبط لفراشي نبكي و هو ما اهتمليش و كمل رقادو..
غدوا منداك كان قعد نهار واحد برك للخطبة.. جاو لعندنا الفاميليا و بنات أم سعد جاو معولين عليا بعدما حكاتلهم يماهم على إخلاص و صراع زعفان مني ماكاش كيفاش نشكيلو.. شفت شفت وليت طلعت لشومبرتي و اعتزلت الناس كامل صح داري بصح خلي يندبو ريسانهم ما خصنيش همهم.. 
قعدت غالقة على روحي بصح كي سمعت صوت إخلاص تضحك لتحت جات هي و دارهم ما حملتش و حبطت نجري لتحت جات عيني في عينها رفعتلي حاجبها كي شغل كانت تقولي غير ماكالاه تفرحي راني رجعت..
جاز صراع عليا حقدت عليه كثر يتسمى صالحها و جابها زكارة فيا.. طلعت لشومبرتي و غلقت على روحي و نبكي..هوما راحو للخطبة و كملو و أنا من بلاصتي ما تحركتش.. فالليل دخل قالب خليقتو و مشنف و راح قبالة رقد و مام أنا فرشت فالقاعة و عطيتلو بالظهر و رقدت..
الصباح كي حبط سمعت صوت لتحت بصح ما فرزتوش، فتحت الباب و حبطت سمعت إخلاص واقفة معاه فالكوزينة و تحلل فيه و هو يهدر معاه بالزڨا كي شافني خرج للڨاراج و هي جازت عليا و قالت ربي يحفظهولي و ما يحرمنيش منو..
كي لحق وقت الغدا راحت سقاتلو و حطتلو، كانت ضاربة حطة و بيا ماكيي و تمشي و تتبختر قدامو و تضحك معاه.. شديت دموعي باش ما يطيحوش قدامها و تستشفى فيا و طلعت لفوق لشومبرتي.. هو حس بيا بصح قلبو ما حبش يحن عليا..
شويا و عاودت حبطت صبتو راقد فالهول و ما يسعى حتى واحد من غير الحاجة.. قعدت تخزر فيا منبعد قالتلي غير لخير ليليان وش كاين؟ قلتلها لالا ما كاين والو..
كي لحق العصر هو خرج و الحاجة عيطتلي سقساتني حكيتلها كلشي قالتلي ربي يهديك يا بنتي كيفاش تهدري مع راجلك هكداك عيب.. روحي دوك دوشي و سقمي روحك و كي يدخل للدار أنا نهدر معاه.. أنا فرحت رحت وجدت روحي و حبطت ندير العشا باش نجوز الوقت خير ما نقعد نستنى على نار.. دخل هو للكوزينة و أنا نتبع فيه بعينيا و نتمنى منو الكلمة بصح هو ما حلبنيش كامل قالي برك اعطيني كاس ما تشرب.. مديتلو شرب و راح للهول قعد مع الحاجة..
كانت غير الحاجة و الحاج.. إخلاص لفوق في شومبرتها و أم سعد عند وليدها.. نطقت الحاجة قالتلو ياوليدي وشبيك مع مرتك؟ قالها شكون فيهم؟ قالتلو ليليان.. علاش راك مخليها تاكل في روحها عليك؟ كلمة و زلقت بيها ياك ما كفرتش.. قالها يما  اغلقي عليا هاد السوجي هاد الأمر ما بيناتنا.. قالتلو شوف يا وليدي أنا نهار رضيت باش تتزوج إخلاص على جال الذرية ماشي معنتها نقبل باش تظلم ليليان و هي يتيمة و ما عندها حتى واحد.. بلعقل عليها..
عيطلي صراع قال ليليااان.. جيت نجري ليه من الكوزينة و وقفت قدامو قبل ما يهدر نطق الحاج قال وش دارت؟ قالتلو الحاجة قالتلو برك روح ترنك.. وليدك تان ما ينحملش و يعفس على مصارن البنادم.. قالها صراع يما ما دخليش روحك، نعفس على مصارنها، نذبحها، نقتلها واحد ما يدخل روحو.. حكمني من حنكي قالي تشكيني لأهلي و تقوليلهم طيحتلو الكلام باش تنقصي من هيبتي و الله غير نذبحك و نرمي لحمك للكلاب يا ×××× طبعتو و قتلو وشبيك هبلت؟ وخر عليا.. قالي أنا تقوليلي هبلت يا بنت ×××× ؟!! قتلو ما تسبش أهلي فهمت ماعجبتكش طلقني.. مارحمتني ما خليتني نشوف حياتي بلا بيك عييت منك وش تحتاج عندي؟ أنا هدرت هكدا و يجبد عليا بكف و حكمني من شعري ناضوا والديه باش يسلكوني من يديه و نور و إخلاص خرجو يشوفو وش كاين و أنا نضت نصوغ و قتلو ما نحتاجكش ينعل الساعة لي شفت فيڨورتك فيها عييت منك دمرتني اعتقني.. و هو يسب فيا و تزايدنا فالكلام..طبعتني الحاجة للدروج و قالتلي يا بنتي اطلعي لشومبرتك.. طلعت و أنا نصوغ و نتحسب عليهم ما فقتش كامل لروحي وش كنت نهدر دخلت قبالة للشومبرة رحت لخزانتو و جبدت السلاح ديالو معولة نقتل روحي.. لحقني هو كان يغلي من الزعاف و معولة يكمل دواسو معايا غير شافني رافدة السلاح تشوكا فتح عينيه من الخوف قالي اعطيني السلاح بركاينا من التمهبيل ديالك.. قتلو ما نمدش نموت و نتهنى منكم مانيش حايبا نعيش معاكم خلاص عييت.. قالي إيه معليه بصح اعطيني السلاح ليليان هدا ماشي لعبة ما تلعبش بأعصابي جيبي لهنا.. قتلو وخر عليا.. حبطت راسي باش نسحب الزناد جاني صعيب و صراع كان خفيف عليا خطفو من يدي رماه فوق البونك و زيرني بيديه في زوج.. قعدت فالقاعة و نضرب برجليا و نصوغ قتلو راني حايبا نمووووت ارحمنيييي.. و هو من الخلعة قاعد النفس ديالو يجري و حرف ما نطقو منبعد حط راسو على راسي و قالي يا مهبولة طيحتي قلبي طاح مني النص.. قتلو وخر عليا وخرررر.. قالي اشششت خلاص.. بعدتو عليا و قعدت نبكي و هو تكا على الحطبة تع البونك و هو فالقاعة.. ساكت و يشوف فيا.. قتلو أنا خلاص مليت منك ما نقدرش نزيد نحمل كثر كلما نقول تسڨمت تزيد تعمى كثر.. لوقتاش نبقى متحملاتك عييت منك.. قالي أنا كنت معول نصالك و أنت خربتي كلشي كي رحتي حكيتي كلشي.. شحال من مرا نوصيك يصرا وش يصرا ما بيناتنا يقعد هنا فالشومبرة ما يخرجش من الباب.. كي رحتي قلتي ليما بلي هاني وش قتلو ما علابالكش بلي طيحتي بقيمتي و ذليتيني قدام أهلي؟ قتلو أنا ما هنتك ما حكيت ليماك هي لي قاعدة تسقسي فيا.. و زيد أنت علاش كي تسبني و تسب اهلي مالازمش نزعف و انت كي نغلط معاك بكلمة وحدة تقلب الدنيا فوق راسي؟ مليت من ظلمك تهين و تضرب و ما نسوا عندك والو.. قالي و الله العلي العظيم هي غالية عليا بصح لساني ناض فيه الشوك و أنا نقولك كي نكون زعفان و مقلق تجنبيني.. قتلو و شكون لي ماراهوش متجنبك أنت لي تضارب وحدك وحدك مع ذبان وجهك.. قالي علاش تشوفي غلطاتي و ما تشوفيش غلطاتك؟ شكون لي رمى الدراهم في وجهي ولا هادي نسيتيها؟ قتلو على هادي قلبت الدنيا؟! قالي نوضي خلاص روحي تغسلي وجهك.. قعدت نبلبل وحدي ولا نوضني داني للصالدوبا غسلي و رجعني للشومبرة قالي ريحي هنا دوك نعاود نولي.. دخلت في فراشي و غايسة مع روحي كارهة كلشي.. شويا هكدا و عاود دخل قعد قدامي فالبونك باس راسي قالي اسمحيلي.. و حط باطا تع لي كادو قدامي تبسم و قالي شوفي وش جبتلك.. قتلو وشنو هادا؟ قالي افتحي تعرفي.. فتحت الخيوط و حليت الباطا صبتها معمرة بليكونكاسي و الشوكولا و الحلوى من كل نوع بديت نرفد و نحط حتى صبت باطة في وسطهم كي فتحتها شفت خاتم فضة فيه حجيرو خضرا و هو علبالو بلي نحب الفضة كثر من الذهب فرحت بزاف و نسيت كامل الزعاف لي كان ما بيناتنا..
بعد زعاف تع يامات صبنا رواحتينا متوحشين بعضانا بزاف و اندمجنا مع بعض في عالمنا الخاص.. و زاد صادف بلي كان عندو خدمة فالأردن غدوا منداك اقترح عليا باش نسافر معاه منها نجوزو وقت شباب كيف كيف و منها يقضي شغالاتو..
وجدنا دوزانا و طلعنا للأردن.. اليومين اللولانيين جوزناهم روعة منبعد ولا ملي يخرج الصباح ما يوليش حتى لليل على جال الخدمة.. مع لول جاتني عادي منبعد تقلقت من كثرة لي قاعدة وحدي فلابارتومو لا دخلو لا خرجة و كي نقولو نخرج وحدي ما يقبلش حتى الماكلة يبعثهالي اونبورتي حتى للباب.. داوست معاه و قعدنا زعفانين حتى رجعنا.. قالتلنا الحاجة هادي عوينة و صابتكم..
عاودنا رجعنا لحياتنا و روتينها حتى وحد النهار مع العصر حبطت صبت هيام لتحت عند يماها تبكي و تندب و تشكيلها من علي.. الشي لي فهمتو بلي علي رايح يحبس قرايتو و حب يتزوج بالسيف مع حنين و كي قالتلو بلي خالو سعد ما يقبلش داوسو و زعف و راح للعاصمة و خلاها وحدها مع خياتو..
جا صراع غير دخل لشومبرة الحاجة بدلو السوجي.. قالهم سلام عليكم قالولو و عليكم السلام و رحمة الله و بركاته.. قالها لختو خير أم علي وشبيك ختي غير لخير؟ قالتلو ما بيني والو برك راسي شويا راهو يوجع جيت نقعد شويا مع يما.. قالها إدا كاش ماكاين قوليلي ما تخبيش عليا كاش ما تحتاجي راني هنا.. قالتلو ربي ما يحرمنيش منك خويا لعزيز ما كاين والو.. قالي امين و دار ليا قالي ليليان جيبيلي كاس ما بلخف.. أنا رحت للكوزينة و هو لحقني صبت إخلاص تاكل من الديسير لي خدمتو و تعكي عليا تبروفوكي فيا كي شافتو سكتت و هو دارلها براسو جاست تع اخرجي.. خرجت و هو قالي وشبيها هادي؟ قتلو نفحتلي ندير حاجة حلوة درت ديسير و حطيتو فالفريحيدار صبتها حاكمة الكاس تاكل منو و تعاير و تسمعني باش ننطق.. جبد كرسي و قعد قالي جيبيلي كاس نذوق و ريحي احكيلي وشبيها هيام بانتلي ماشي في حوالها.. قتلو هي ما حبتش تحكيلك و أنا جاي ليا؟ قالي ما راحلك قتلك ارواحي احكيلي و زيد ارواحي لهنا تشوف راكي شابة ليوم معولة عليا واقيل و غمزلي.. ضحكت و قتلو أنا دايمن شابة ماشي غير مليوم غير انت برك كي ما تحبش تشوف.. قالي علاش انا شكون عندي من غيرك بصح كي ندخل عيان من الخدمة مادابيا نريح ماشي تلاقيوني بالمشاكل سينو علبالك بلي نعشقك.. صحا اعطيني نذوق الخالوطة لي راكي دايرتها و احكيلي على هيام.. ضحكت و عطيتلو كاس بدا ياكل قتلو داوست مع وليدها حب يتزوج و سعد غالق راسو.. قالي سعد عندو الحق بنتو مازالت صغيرة و ما جملتش عقلها.. قتلو ارواح أنت و قنع علي بهاد الكلام.. قالي و دوك وين راهو؟ قتلو غضب و طلع للعاصمة.. قالي وشنو؟! الله لا تربحو رايح و مخلي يماه و خياتو هدا خصو يتزير شويا.. نوضي جيبي كاس و كولي و إدا ماراكيش متشهية جيبي ناكل في بلاصتك.. قتلو و الكاس لي حطيتهولك كملتو ولا رميتو مور ظهرك؟ زعما عجبك؟ قالي وش يسلكني منك درتي حاجة بنينة دوك ما تسكتيش.. نضت نضحك و جبت وحدوخر كلاه كي كمل باس خدي و قالي يعطيك الصحة جا بنين كيما يديك.. ضحكت وبستو في خدو و قتلو نحبك.. قالي اواااه كي ولات فيها بوس ارواحي لهنا حتى أنا راني عطشان.. قتلو احشم الحاج راهو فالهول.. قالي وعلاش الحاج زعما ما يبوسش مرتو ارواحي لهنا.. قتلو وخر عليا ماشي كامل وقتك، ليوم طيبت حاجة بنينة يلزم نحتفل.. قالي إيه احتفلي عمري احتفلي مانعرف شكون يحمل ياكل التغنجيق ديالك من غيري هدا باش ما تقوليش ما يحبنيش.. تبسم قرص خدي و راح لشومبرة الحاجة فتح الباب و قالها يما عيطي لعلي قوليلو خالك يحتاجك، نطلع نرقد شويا كي نحبط نصيبو لهنا سينو راسو نطرطڨهولو.. قالتلو  هيام غير لخير أبو حرب كاش ما سمعت؟ ماكاين والو.. قالي تهناي ختي إدا حبيتي وليدك يتربى و يولي للطريق خليني أنا ندبر راسي معاه.. غلق الباب و قال راني طالع نرقد ما نسحقش الحس فالدار.. هو طلع و هيام عيطتلي قالتلي وش حكيتيلو حتى زعف هكدا؟ قلتلها ما زعف ماوالو هدا وين كان يضحك و يڨصر لاباس بيه.. قتلو بلي داوستي مع علي و هو غضب و طلع للعاصمة.. قالتلي يعزيك يا البهلولة علاش تحكيلو أنت ماكاش حكاية تقدري تخبيها لازم ياكلك لسانك؟ قلتلها ما تخافيش صراع ما يآذيش علي خليه هو علبالو وش يدير معاه.. قالتلي يا بنتي علي راسو خشين و صراع مقلق علاش هدرتيلو يا الحابسة.. قالتلها الحاجة ما تخافيش علي يقادر صراع ما يخشنش راسو معاه و زيد وليدك طايش لازملو راجل يزيرو شويا لوكان تخليه هكدا يزيد يهمل كثر..
عيطت الحاجة لعلي و قالتلو خالك يحتاجك دوك تحكم طاكسي و جي قبل ما ينوض هو عندو لاطونسيو ما تزعفوش و تزيدلو همك.. قالها دوك نركب و نجي لعندكم..
صراع رقد زوج سوايع و كي فطن سقساني على علي قتلو مازال ما لحق.. راح يدوش غير دخل للصالدوبا سمعت صوت علي طلع يجري قالي وين راهو خالي قتلو راهو يدوش.. خرج صراع من الدوش و علي قعد يستنى فيه عند الباب تع الشومبرة جاز عليه ما عبروش منبا و قالي اعطيني حوايجي.. كي كمل لبس خرجت و شريت لعلي باش يدخل.. دخل و قالو خالو صراع عيطتلي جدة قالتلي تحتاجني غير لخير.. قالو خلاص ما عندي حتى هدرة مع المخنثين.. قالو خالي وش بيني أنا حتى تقول عليا مخنث؟! تعنكر فيا صراع فهمتو بلي حبني نخرج و نخليهم وحدهم، خرجت لعند الباب صبت هيام تتصنت وقفت معاها..
طبعو صراع و عيط عليه قالو بوجهك و تسقسيني علاش نقولك مخنث؟! ملغدوا تحفف الموسطاش لخطر لوكان جيت راجل ما تخليش يماك لي تعبت عليك و ضحات بصغرها باش كبراتك.. هدا مازال ما تزوجتش و سمحت فيها هي و حياتك على جال بنت المرا يمال نهار جيبها للدار تخليها تضربها و أنت محبط راسك.. قالو خالو راك في مقام بابا الله يرحمو بصح وش دانا لهاد الكلام انا ما خليتهاش برك في ساعة تع زعاف طلعت للعاصمة.. ناض يعيط عليه قالو هدا ماشي عذر يماك وش في يدها هي حايباتها تكمل قرايتك و تشوفك في أعلى المراتب و تفخر بيك و مع لخر تتضارب معاها و تسمح فيها على جال وحدة بقيت في خاطرها و خيبت ظنها بيك.. شفنا الظلم و الحڨرة و شبنا قبل الوقت و هكداك و تحملنا غير باش يمانا ترضى علينا.. دير في بالك بلي حنين في يدي و قادر نزوجهالك من غدوا و واحد ما يوقف في وجهي بصح و الله ما تشوف ظفرها حتى نتأكد بلي وليت راجل بالقول و الفعل و دوك اخرج عليا منا يلا ماتوريليش فيڨورتك..
خرج علي زعفان و مقلق جاز علينا و حبط يجري.. دخلت هيام لعند صراع جا تهدر عيط عليها خافت منو خرجت بلخف و حبطت.. دخلت أنا صبتو يدير فالريحة رفد مفاتحو و تلفونو و خرج مقلق..
حبطت لتحت صبتهم هدا يخزر في هدا ما فهموش وش صرا و هيام لبست حجابها و راحت.. نطق الحاج قالي وش كاين ليليان؟ قتلو ما نعرف صراع و علي داوسو.. قالت إخلاص علي خصاتو التربية  بصح الغلطة تع هيام كلما يجيو خاوتي يهدرو معاه ما تحبش حتى همل الطفل.. قتلها وشبيه ما همل ما والو وش خصو راجل و عليه الكلام و صراع راهو في عوض باباه و يفهم فيه ماكالاه الهدرة الزايدة.. قالتلي و أنت شكون قالك شحال راهي الساعة؟ لي راني نهدر عليه وليد خويا و أنا عمتو.. قلتلها إيه باينة عمتو و تموتي عليه.. جات تهدر نطقت نور قالتلي ليليان هادا فواش فالحة غير في طولة اللسان.. درتي ديسير و فرحانة بعمرك روحي اغسلي التزبيع لي خليتيه فالكوزينة و ديري العشا راهو قريب المغرب و أنت لاتية بالكلام الزايد.. قلتلها قادري روحك راني في داري نهدر الوقت لي يعجبني و نسكت الوقت لي يعجبني و ندير وش نحب و لي حب العشا هاو الفريجيدار و يطيب مارانيش مسؤولة على حتى واحد.. قالتلي إخلاص مي أنت صح ما تحشميش تحاوزي فالناس ما أمنتي روحك بلي عندك دار هادي لي قالك جات مع العصر و دات كامل القصر.. قلتلها ادا ما عجبكش الحال روحي لداركم.. قال الحاج و آخرتها معاكم كيفاش تداوسو ليل و نهار كرهنا منكم.. قالتلو عمي ما راكش تسمع فيها كيفاش راهي تحاوز فينا؟ قالها ظهرها نكسرهولها.. قالتلي الحاجة ليليان و آخرتها معاك كيفاش ارواحي لهنا.. رحت ليها قالتلي حابسة أنت ماراكيش تشوفي في راجلك مقلق جيبي فالمشاكل لروحك؟ ما حبيتيش تخدمي اطلعي لشومبرتك.. قلتلها ما سمعتيهمش كي يتأمروا عليا دوك رجعوا خيات؟ قالتلي ماراحلك فيهم اطلعي لفوق.. قلتلها حتى أنا راني طالعة ما خصنيش نشوف فواڨرهم.. قالتلي شدي لسانك...
طلعت لشومبرتي و قعدت نقرا في تلفوني قصص رومانسية تخليك تحضني حتى الحيط من الوحش.. عيطت لصراع غير رفد قالي ألو.. قتلو مازالك زعفان و لا راحلك؟ قالي يا أم نص عقل اهدري وش تحتاجي؟ قتلو تشهيت حاجة.. ضحك قالي اهدري برك وش تشهيتي؟ قتلو جيبلي معاك كريب.. ناض يضحك و قالي يا المهبولة وقتاش تستعقلي؟ قتلو علاش وش قلت تشهيت حاجة حلوة و جا في بالي الكريب و تحب الصح راني محتاجاتك معاه لخطر توحشتك.. قالي وش ديري بيا؟ قتلو كيفاش وش ندير بيك متوحشاتك.. تعرفني كي نقرا القصص الرومانسية نقعد نتخيل أبطالها و نتوحشك.. قالي يااااا يمال كي هكدا يكثر خير القصص الرومنسية غير ما تبطليهاش على الأقل تبقاي دايمن تخمي فيا.. قتلو مقبيل كان طايرلك البوشون و دوك راني نشوف فيك راك تضحك غير لخير؟ قالي مينداك يلزملكم العين الحمرا الضحك معاكم ما يجيبش.. قتلو صار كنت تورني برك.. قالي إيه كنت نتورني تساليني؟ صحا قوليلي دوك نجيبلك كريب برك؟ قتلو أنت و ياه.. قالي و أنا في الخدمة وجدي روحك..
وجدت روحي و قعدت نستنى فيه حتى سمعت طونوبيلتو لبست خماري و حبطت لتحت صبتو قاعد فالهول و إخلاص جابتلو الما يشرب.. قتلو وين راهو لي وصيتك عليه؟ قالي هاو الكريب ديالك شدي.. نطق الحاج قالو أنت عمرلها فمها و هي تحاوز في أهلك.. دار قال كيفاش تحاوز أهلي وش صرا؟ قتلو و الله ما هكدا.... قاطعني الحاج و قالو راهي تقول نهدر كيما نحب و نخدم كيما نحب و لي ما عجبوش الحال هاوليك الباب.. قتلو حرام عليك عمي أنا ما هدرتش هكدا..  غموني الحاج و إخلاص بالهدرة عيط عليا صراع قالي انطقي وش كاين؟ قتلو نور و إخلاص نهار كامل و هوما يدعو عليا فالكوزينة و نسكت و واقفين في صف واحد جاو يتأمروا عليا قلتلهم ماراني خدامة عند حتى واحد باش تتأمروا عليا و لي حب ياكل هاوليك الفريجيدار.. خرجت الحاجة من شومبرتها قالتلو حكايات تع نسا يا وليدي ما تعمرش راسك بيهم.. قالها الحاج توقفي معاها فالشر؟ قالو صراع بابا الله يرحم والديك أخطيني من حكايات النسا لي فيا يكفيني سينو و الله غير نطلقهم في زوج و ما نخلي حتى واحد في هاد الدار اتقو شري و خليوني طرونكيل.. سكتو كامل و هو طلع للشومبرة لحقتو صبتو عاقد حواجبو حظنتو من ظهرو و بستو قتلو و الله ما قصدي بصح هدرت هكدا لخطر إخلاص هدرت على علي و قالت ما فيهش الخير تربية هيام و ما خالاتش خاوتي يربيوه و يوقفوا عليه..
دار ليا جبدني لحضنو حكم حنكي بيدو و قالي لوكان نسمع بيك مرة وحدوخرا تجاوزتي حدودك مع كاش واحد راسك نطيرو، ما كفاكش مخليك أميرة فوق ريسانهم تاكلي و تشربي و كامل طلباتك أوامر؟ قتلو اسمحلي.. حكم وجهي ما بين يديه شاف في عينيا و باسني..