Kum 1996 December ni 4 khan ka pa Vanrosanga leh ka nu Vanlaltlani te fa pa 3 na ni turin ka lo piang chhuak ve a, ka lâiah hming ah Zorinpuii tin an phuah nghe nghe. Mite ang in private hospital ah piang lo mahila ka pian na hmun ka pu te in chhung kha kan tan chuan Hospital nen danglam na a awm lo. Ka lo pianni a an hlim zia tun hnu a an sawi chhuah chang hian keipawh lawm loh in ka lo nui leh ver ver thin.
Ka la hriat reng chu nopang mai kan la ni a, kan nu leh pa te kha engkim lei thei turin kan ngai thin. Ka nu leh pa kha han chhuak hlek se thil min lo hawn rawh kan ti a kan duh duh kan ngen thin anih kha. Tun hnua ka ngaihtuah let chang hian kha tih hun laia an rilru lo hah theih dan tur kha nu leh pa din hmun ah la ding ve lo mahila chhia leh tha ka thliar thiam hnu hian ka hriat thiampui chiah.
Nopang dangte nen in ti buaiin han in sual ve rap rap chang kan lo nei lo thei lo a, thah haw chang lah ka ngah ka pa hi pa tha tawp khawk kan tih ang chi hi ani ve a, mi dang nen kan in sual te hian "in thiam lo hmasa aniang", a ti thin, a fate kha min tan bur ngailo hrim hrim. Chhungkaw harsa tak tanga lo chawrchhuak kan nih vang khan retheihna hi hmelhriat tir chawp kan ngai lo a kan tet lai a ka nu leh pa ten an neih chhun chhun a Christmas kawr mawi min lei te khan kan va hlim thin tak. Kan û nau kan fel ve em em na chu kawrthar leh toys vel kan ngen ngai lo a, min lei sak dawn pawhin "lei kan ngai lo kan la nei tha", kan ti mai zel a, kan neih chhunah khan kan lungawi hle bawk.
Mihring ni ve ta fam chu Dam loh chang kan lo nei lo thei lo a, damdawi leina tur kan neih loh chang te khan ka pa khan kan lu chungah kut nghat in min tawngtai thin a, kha tawngtaina kha kan dampui thin. Kan lo thanglian ve zel a kan mawh te alo tam ve zel a û nau hi pa 4 lai kan ni a, kan upa ber hi hmeichhia ania, adawt mipa, nau mipa ka la nei bawk. Kan thian ten sikulah cheng 5 te an pai laiin keini û nau chuan pai tur neih loh chang kan ngah a, kan neih ve pawh in a tam berah cheng hnih (2) kan pai kha chuan kan lawm thei hle thin. Kan hun lai kha chuan tun ang hian thil ala to lo a, duli te, siki te kha kan la hmangpha a, S chhang kha pa khat cheng khatin kan lei thin a, artui pawh pumli cheng 5 in kan lei thin.
Sawrkar hna chu kan chhungkaw tan kha chuan Vana rah ang mai ania, ka pa khan kut hna thawkin a chhungkaw neih chhun kha min chawm thin, hah tak in chauh leh na pawh sawi lo in a sur asa hnuai ah a tawh chhuah phawh in ahmelah lungngaihna rilru hahna alang chhuak ngai lo. Kan chhungkaw tan chuan ka pa hi ahlu tak zet tih kan sawi tel hram teh ang.
Thing delh loh lung delh loh chu lo thang lian ve zel in ka û te pawh pawh nula tlangval tia sawi theih an ni tawh a, kei pawh kum 18 lai ka ni tawh a pawl 12 ka kal mek bawk kan chhungkua kan harsa ka tih tawh kha kan upa ber hian sikul a kal tawh lo a, pawl 12 thleng sikul akal ve vangin vanneih thlak tak in kan kawm chhaknu pi Remi aiin primary ah Zirtirtu hna athawk a, pi remi'n ai kal ah ahmang anih ber mai chu. Ka pa pawh tlem chuan a chhawk zangkhai thei deuh bawk. Ka û chiah mipa hi class 10 a pass khan sikul kal a chhunzawm duh tawh lo a, ka pa in kal leh hram tura atih pawhin "zirsan vakin awm zia anei lo tihpui tu tha neih loh chuan", ati liam mai zel a, ka pa pawh khan tih ngaihna vak ahre lo. Tunah chuan two wheeler taxi akhalh thin a mamawh a in tum thei a keini a naute pa hnih thleng hian in kan sikul mamawh zualpui min lei sak thin.
Board hmachhawn tur kan nih vangin kan sikul pawh kan tang khawp mai a, November thla atang daih tawhin sikulah camp kan nei tawh a in chu chaw ei nan leh in siam nan bak kan hmang ngai meuh lo. Tha takin lekhkha ka zir anga, nakinah chuan ka nu leh pa te hi ka la chawm let ve ngei ang tiin riru a tha hnem ngai tak chung chuan lehkha ka zir a, mahse kan chunga thil lo thleng tur hi tu pa fa mahin kan hre lawk si lo. Zan khat thahnem ngai taka lehkha ka zir lai chuan ka khawsik ka tlun hluah mai a, ka taksa te chu asil in a nâ thum bawk. Bathroom a ka zung chu ka tho hlei thei lo a, mahni pawh a ka kal theih tawh loh vangin Sir Atea chuan min pawm lawp in mutna tura kan siam chhuatah chuan dim tak hian min mut tir a, hmeichhia hi kan tam deuh vang hian class 11 section B ah athen an riak a, mipa ho chu kan class room ah leh office bul room ruakah an riak mai thin. Sir chuan nachhawkna min ei tir a, Mak deuh mai chu he nachhawkna min ei tir hian min chhawk chu sawi loh ka khawsik tlun chu ahma ai mahin a nasa a, zanlai pelh tawh ah sir chu kai tho in nachhawkna dang min dil sak a, mum hnih ngawt arual in ka ei, chu erawh chuan hna a thawk tha in zing lam dar 2 hnu lamah chuan tui takin ka mu ve thei.
