شياطين الانس للكاتبه اسيل بن ناصر ..مكتمله

حلقة22

شياطين الانس

حلقه 22
اسيل بن ناصر

‏إتجه إلى الله دائمًا ، إن تُهت أو قلقت أو أحسست باليأس ، إن فرحت أو حزنت اتجه إلى الله دائمًا ، إن الله لن يغلق أبوابه أبدًا في وجه من قصده ❤️...
.
.
.
اكرم الوقت وقف عنده قدام هل موقف كل تفكيره من هل بنت وشن جيبه جنبه وليش صار هك اخر شي مذكره طلعت بسمه وبنت عم عمر معاها او هك هو متخيل...

عمران.. صبي البس دبشك والحقني لوطه..

اكرم تحرك وصداع في راسه وشاف جنبه لهل بنت رفع الشعر عن وجها وشافها ريم وحس بقلبه نغزه كيف وامتي جت معاها.. وحاول يذكر اي شي بس مافيش فايده..

لبس دبشه وطلع من دار يجري.. نزل للمربوعه كان جده عمران قاعد.. ع صالون ومنزل راسه وهو يسمع في بسمه وهي تحكي وتبكي ويهز في راسه وساكت..

قدم اكرم وسال بسمه بصدمه .. بسمه شن الي صاير وريم شن الي جيبها للحوش..
بسمه وهي تبكي.. ليش ادير هك يااكرم..

اكرم وهو يخبط ع ساس .. وقفي ابكاء وفهمني الي صار يابسمه نا مش مذكر شي كل الي مذكره طلعت بيك من قاعه ومعاك وحده متخمره قصدك هي ريم...

هزت بسمه راسها.. اكرم كنك سلمت عليها وحكيت حتي معاها..

اكرم وهو مستغرب.. انتي شن تقولي.. انا مش مذكر شي اخر شي اتكيت ع صالون وبعدها معش نعلم بشي انتي في شن تقولي..

بسمه كملت وهي تبكي.. وصلنا للحوش ونا نزلت وهي لحقتني ومش عارفه سيبتك تقريبا انت في سياره قتلها تعالي ارقي معايا للدار بس هي قالتلي خليني في صاله نا تاعبه..وتوا نرجاك لعند اتبدلي وتنزلي....

ولتفتت بسمه شور جدها وكملت.. ورقيت ياجدي كنت جايا نبدل لانه دبشي تلبز نص ساعه بس غبت ونزلت مالقيتهش في صاله قلت ممكن تكون بره في سياره وطلعت لقيت سياره في مكانها ومافيش حد..فيها برمت في حوش لعند جابني كرعيا لدار اكرم كنت نسمع في عياطها مخنوق خبطت بس محد فتح...
سكتت بسمه شوي وكملت..كلمت حسام الي جا وكسر الباب وشفت الي شفتها..

شفتها هي وياها وكان باين ع وجها انها مضروبه...

اكرم وهو مصدوم ..جدي انا مستحيل ندير هك جدي انا تربيتك وعارفتني كويس..

عمران..بسمه اطلعي شوفي البنت شوي ويجو هلها...

اكرم بصدمه قعد ع صالون وشد راسه بيدي الاتنين وحس بدموعها ينزلن بقهر ولااول مره اكرم ينزلن دموعه وهل شي لاحظه جده كل الي كان شاغله ساره وشن ح يصير معاها وكيف ح تلقي هل خبر...هل ح تصدق كلامه ولا ح تكذبه..
فكرت ان ساره اضيع من بين ايديه حارقه دمه...

....

عمران..اكرم الي صار له حل واحد..

نط اكرم بعصبيه جدي نا مادرت شي من الي صار نا مستحيل نغلط هك..