أرويــــنـي بــــعشقــــك 🥀🦋

أرويـــنــي بــعشقــــك part 1

🔞🦋🍷༺أرويني بعشقك༺🍷🦋🔞
عيناكِ بحرٌ لا ضفافَ لسحرهِ وأنا الغريقُ فيه
Part 1

وسط السكات والسهات .. وسط ريحة التراب والبلاد .. وقطرات من ندى نازلة على أرض ربيعها منبث .. جالسة جنب لبير .. ببيجامة طويلة بيضة ومنقطة بالوردي .. راسها مهزوز فسما لي شمسها بدات كتشرق .. مغمضة عينيها لي شفرانهم بارزين .. وشعرها لي جامعاه ورا ضهرها لونو بحال سواد ليل .. فيقها من سهوتها وتخمامها غير مها كتعيط عليها

فوزية : يااااسمين وااا ياااسمين

ضورات راسها عند مها كانت مرا كبيرة فالعمر واقفة جنب الخيمة .. بجلابة طويلة فالخضر داكن ومدورة على خصرها سربيتا تاع الطياب وفوق راسها مربوط زيف فالكحل وباينة من إيديها لي كتمسحها فالسربيتا بلي كانت كطيب

ياسمين : (بصوت أنثوي حاولات تعلي صوتها باش تسمعها ) نعاااام أ مي
فوزية : ( قربات حداها ) قلت ليك ابنيتي جيبي لما تعطلتي سربي دغيا باك غايفيق دابا باقي مطيبناشي لفطور

حضرات راسها و هزات سطل عامر بالما جبداتو من البير أو وقفات تمشات لخيمة مخلية مها وراها .. لي عارفة سباب تجاهلها ليها والهم لي باين فوجها .. تبعاتها توصلات لخيمة لي كانت على قد الحال وخاوية مافيها لا بقر لا خرفان .. دخلات الكوزينة لي ممصيباش مطلية غير بلياجور حطات لما فالبوديزات وبدات كترد فأثاي حتى سمعات خطوات مها كيقربو لها

فوزية : وسمينة تاعي غاتبقاي قالبة وجهك عليا

ياسمين : ( حطات طوبة تاع سكر فالبراد ومجوباتهاش )

فوزية : راه تنايا أبنيتي ماعندي إيد فهادشي باك لي دارو عارفاني كنحتارمو ومنقدش نرفع صوتي ولا شواري عليه

شافت فيها بعينيها الزرقين لي بحال زرقة البحر فالصيف وعبسات ملامحها البريئين ولي باينين ميغدرو ميأديو

ياسمين : مابغيتش نتزوج أ مي منقدرش كبر مني ب 20 عام عارفة بلي حالتنا لي خلات با يبغي يزوجني ولكن مبغيتش غادي نتعذب أ مي

فوزية : (قربات ليها وطبطبات على كتفها ) متخافشاي انا وباك هاكدا كنا راه والدك كبر مني ب 16 سنة وهاحنا بيخير السيد كيبان ضريف وميأديش

ياسمين : الهدرة معاك أ مي كتضر فالخاطر هادا كيتمسى البيع أنا مكنتباعش الراجل مزوج غايزيدني ثانية غير حيث عندو لفلوس ..

فوزية : راكي بنتي من لحمي ودمي وحاسة بك وكون كان عندي باش نعاونك كون عاونت ولكن راه مافيدي والو .. سيري هضري معا باك باقي معطاش لكلمة لناس بدلي شوارو

على ذكر باها كان سمع حوارهم جنب الباب والهم والتخمام لي هازو فديك الخيمة كبر من عمرو .. معارفش كيفاش يعيل عائلة فيها 4 لبنات يقريهم .. يوكلهم ويرعاهم .. كون ترجع ليام لور قبل من عام كان الأمر غايكون مختالف