ابناء الحسوم "شمسون"

Part 3

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

ضاعن درابين العمر ما ندري نمشي بيا درب.. چا ليش من دون الخلگ عشنا ويا اهالينا غرب. 💔

━━━━━━  ━━━━━━

تركته واگف ماد ايده وعدلت الفروه على اكتافي بدون لا اصافحه، سحب ايده فوراً وحطها بجيبه بينما نشوان تلافى الموقف من گال بمرح وهو يأشرلي استريح بكرسي گدام المكتب..

-نشوان: استريحي سيدتي

-مسرة: مساء الخير

جاوبني الي اسمه "شُهيب" بهزة راس بسيطة و گعد على كرسيه بدون لا ينطق كلمة..

-نشوان: مس مسرة هذا اخوية الچبير يصير رئيس شركتنا المتواضعة "شُهيب"

-مسرة: شُهيب؟

-شُهيب: نعم

-صبا (عبر السماعة): الله مسرررة حبيت صوته رسمي فخم، طبعاً شگد يعجبني الرجال الي صوته هيچ هادئ بس واضح تحسي صدگ رجال مو بله؟

غمضت عيوني احاول اركز وياهم وهاي بقت ترطن براسي..

-صبا: حتى اسمه حبيته بله سألي شهيب بالفتح لو بالضم؟ لا اوگفي اني ادور راح اروح لمستر گوگل ابحث اشوف شلون اسمه هذا وبله حلو لو لا، اوكفي گلتي هو شهيب شمسون خليني ابحثه بلكت اللكه صورته اوكفي بله لا تخبصيني.. اي هاي جاي ادور لحظة ثواني.. اي اي لكيت اي باعي..

هي تلغي واني انخبصت وياهه توترت كلش نشوان يحچي ويايه ما اسمعه اصلاً ولا دا اگدر اركز من وره هاي العوبة..

-مسرة: العفو وين الـ rest room؟

-نشوان: شُهيب عنده بالمكتب تفضلي

دخلت الحمام وقفلت الباب عليَّ طلعت السماعة من اذني ماعت من وراهه، ثواني ورجعتها وهمست بنتر..

-مسرة: صبا شبيچ شبيچ خبصتنياا فشلتيني!!

-صبا: والقران يخبل لج شنو هاي يموت حبيت حبيت تعرفين شنو معنى اسمه؟؟ معناه الرجل الجذاب جداً، القوي الشجاع، وهو اسم من اسماء الاسد، اخخ حلووو انوب معناه البرودة الي تصير بالوقت الصح خلصص راح اعتمده لابني المستقبلي، بله شكله حلو؟؟