حبال من حرير

الحلقة الرابعة

صلو على خير البشر
#اللهم_صلِ_على_محمد_وآل_محمد

#حبال_من حرير
#نسرين الاسدي

__________

مهره :

بعد مشي بالسيارة مدة نص ساعة او اكثر واحنه ويه رجال لا نعرفه ولا واثقين بي رجال غريب بالمعنى الحرفي
فجأة يعرض علينه يساعدنه وياخذنه لبيت ؟!!
بس هذا هو المضطر راح يسوي اي شي وينطبق علينه مثل (الغريق يتمسك بقشة )

وصلنه اخيرا لمنطقة واضح من بيوتها راقية والي يعيشون بيها اغنياء
نزلنه وتمشينه ناحية بيت جانت الواجهة مالته كلش حلوه وبسيطه..

فتح الرجال باب البيت ودخل كايل : تفضلوا ..

التفتنه لماما وهي سمت بسم الله ودخلت مصليه على النبي
دخلنه وراها وضلينه نتلفت على كل جزء بالبيت
جان عباره عن طابق واحد وتلث غرف وصالة
المطبخ بعيد عن الغرف والصحيات على جهة ويمهن الدرج واكو باب يفصل بينهن وبين الصاله

فزيت من صفنتي على صوت الرجال وهو يحاجي امي

:حجية ..اعتبروا البيت بيتكم ولا تهتمون بفلوس الايجار اني ماراح اطالبكم بيهم كعدوا هنا شكد ما تحبون لحد ما تكونون نفسكم ..
واني بخدمتكم اي شي تحتاجونه بس كولوا

ام اركان : لا يمة احنه مانريد نثكل عليك ..بس يشتغلن البنيات نطيك الفلوس
انته هذا باب رزقك يمه ..ومشكور وماقصرت يرحم اهلك ويحفظلك عويلك

الحجي بارق : مشكورة حجيه ..هاي دعواتج كلش كافية مايحتاج شي ثاني مادامها طالعة من گلبج

فاجأ سمعنه الباب اندك وصوت ولد واضح شاب حجه بصوت واضح وبي بحة حلوه..

: بويه ..حجي انته موجود ؟!
جبت المسواك ..
بارق : تفضل بويه مأمون

دخل الولد الشاب وهو منزل عيونه بالأرض جان لابس بنطرون وتيشيرت سود لحيته وشاربه محددات بشكل مرتب وشعره مو عالي طبيعي
وكال : السلام عليكم

نزل العلاليك بالأرض وحاجه ابوه : هذا كل المسواك الي وصيتني عليه بويه ..ناقص بعد شي ؟!

بارق : لا ابني ماقصرت ..ذول خطارنه لازم نداريهم

التفت مأمون لأمي وهو بعده منزل عيونه : اهلا وسهلا بيكم حجيه .. البيت بيتكم
ورجع التفت على ابوه : اني استرخص بويه

بارق : انتظرني بره مأمون راح نرجع سوه ..

حجيه : هذا مسواك الكم لأن البيت فارغ صارله مده محد عايش بي .. ومثل ما وصيتكم لا تتردون تطلبون منه اي شي
احنه من اليوم اهل لا تنحرجون واحنه ان شاء الله مانقصر وياكم

وهسه ارتاحوا وناموا ولا تفكرون بأي شي ..تصبحون على خير..

طلعو وكعدنا احنه وحده تباوع للثانيه.. بمستقبل مجهول ماندري شضامتلنا الدنيا بعد......
__________