راجس

30

جولان تحرك بانزعاج وهو يحس بحركة حوله

فتح عيون بشويش وطالع في حمام الغرفة المتصلة بغرفته وشاف الباب مردود

عقد حواجبه وطالع بالفرشة الا ينام فيها سند وكانت فاضية

غمض عيونه وتوقع انو سند راح الحمام ونسي يقفل الباب فالافضل يتركه لحاله

بس حس انو الاصوات الا بيسمعها غريبة ففتح عيونه وطالع ناحية الحمام .. في صوت دش شغال بس في صوت تمتمات خفيفة جاية من الحمام

بعد البطانية عن جسمه وتحرك بشويش وهو يحاول يفهم من برة ايش الا جالس يصير عشان لا يدخل على سند وهو بوضع غلط

بس تفاجئ لما شاف سند جالس في البانيو الموية تطيح عليه وهو حاضن جسمه الا كان يرجف بشكل واضح وهو يتمتم بكلمة " انا اسف "

جولان قرب اكثر من الباب ودفه بشويش بس سند ما رفع راسه .. كان مغمض عيونه بالقوة وهو يهمس بنفس الكلمة ويحضن نفسه بالقوة

جولان ما قدر يظل واقف مكانه وتحرك وقفل الموية ومسك كتف سند يهزه .. يمكن هو بس بيتحرك وهو نايم
- سند ؟

سند التفت وطالعه بعيون مفجوعة والخوف واضح بمعالم وجهه كاملة

سند دف جولان وتراجع لورى وهو يطالعه برعب .. كأن الا بعيونه شخص مختلف .. كأنه شايف شخص غير جولان

جولان رجع يحاول يمسك سند بس سند زعق عليه
- لا تقرب .. لا تقرببببب

جولان طالع سند وهو مو قادر يسوي شي .. لما الا قدامك ينهار عصبيا ايش المفروض تسوي ؟! .. هو ما يعرف حتى لو سند صاحي ولا بيحلم

ألتفت وطالع في جواله فوق السرير .. يحتاج يكلم نواف .. وقف وتحرك بيطلع من الحمام بس وقف عند الباب .. ايش لو قفل سند الباب واذى نفسه ؟! .. هو مو عاقل حاليا .. مو مستقر .. ما ينفع يتركه ..

بس جسم سند جالس يرجف وهو يطالعه بعيون مرعوبة .. هل الصح يبعد عشان يسيبه يهدأ ؟ .. ليش محد يعلمنا كيف نتصرف بذي المواقف ؟! .. ليش مافي كتيب تعليمات يقولنا متى لازم ناخذ الشخص بالحضن ونهدي قلبه ؟

سحب جولان المنشفة من ورى الباب ورماها على سند الا بعدها بسرعة وكأنه خايف انو جولان يغطي عيونه بذي المنشفة

جولان جلس جمب الحوض ومد يده لسند
- ما اعرف انت ايش شايف الان .. بس .. انا هنا سند .. انا جولان

سند طالع بيد جولان وبعدها بعيونه .. نظرت الرعب ما اختفت وشاف عيون سند تطالع باب الحمام .. هو يبغى يخرج .. او يبغى يقفل الباب على جولان ؟ .. ما يقدر جولان يحدد ايش جالس يحصل في راس سند بذي اللحظة

ظل محلي يده ممدوة ناحيت سند وقلب وجهه الباب يحاول يترك لسند مساحته قبل ما يهدأ

بقوا على وضعهم نص ساعة قبل ما يحس بسند يمسك يده ويتمدد في الحوض ويحضن المنشفة