بنت مختلفة

معقول ؟ ليه لأ ؟؟

*دانيا*
مش عارفة ليه حاسة اني كنت مبسوطة قوي من كلام حسن .. مبقتش حاسة اني كارهاه زي الاول .. كلامنا انهاردة غير نظرتي ليه جدا
مر اسبوعين و فاضل اسبوعين ع رجوع المستكشفين التلاتة بلدهم .. بقينا كلنا اصحاب خلاص و بقينا بنقضي وقت جميل كلنا سوا( رغم اني مش بستلطف مريم قوي لكن بعاملها كويس ) و فيوم دخل احمد عليا الاوضة و قالي انه عايزني فموضوع فخرجت انا و هو المزرعة و قعدنا هناك .. كان بيحكيلي عن مشاكله في الحياة عمتا .. حاجة مفرقتش قوي معايا وانا اكيد معرفتش افيده لأني رغم كل شئ معرفش طبيعة العيشة عندهم في بلدهم
و فوسط ماحنا قاعدين لقيت حسن واقف عند البيت عمال يبصلنا .. استغربت بس مش مشكلة ممكن سرحان فحاجة..
نظراته ليا كترت قوي الايام دي .. واكيد انا كمان نظراتي كترت وإلا مكنتش لاحظت نظراته .. بس هو بيبصلي ليه و الاهم انا ببصله ليه .. معقولة اكون ... ؟؟ لازم اتأكد من اجابة السؤال ده ..

و قطع تفكيري احمد
احمد : دانيا ؟ انتي معايا ؟؟
انا : اه اه معاك معلش سرحت شوية
احمد : ولا يهمك . .بس انتي كويسة ولا في حاجة مضايقاكي؟؟
انا : لا متقلقش انا تمام
و في اللحظة دي جتلنا مريم
مريم : احمد ممكن تسيبني مع دانيا شوية عشان عايزاها
كان باين قوي ع شكلها انها متعصبة
احمد : في ايه مالك انتي كمان ؟
مريم : ملكش دعوة .. قوم !!
انا : متقمش يا احمد انت هنا من قبلها و هي مش من حقها تكلمك كده ايا كان ايه اللي معصبها
احمد : حاضر
مريم : يااا سلاام .. بصي يا حبيبتي اذا كنتي اخدتي احمد فصفك فدي حاجة متهمنيش .. لكن اللي يهمني حسن .. بطلي تلزقي فيه يا ماما .. حسن ده بتاعي انا و عمره ماهيكون بتاعك او بتاع غيرك
انا : ايه الكلام اللي انتي بتقوليه ده يا مريم
مريم : اظن كلامي واضح قوي يا سكر .. حسن خط احمر
انا : مريم ممكن تهدي
مريم : بتهديني ؟؟ طيب انفذلك رغبتك ازاي و حسن عينه مش بتتشالش من عليكي .. يابنتي دانتي مش مخلياه يبصلي وانا بكلمه !!
احمد : مريم كفاية !! انتي زودتيها قوي !!
مريم بصتلنا بإستحقار و مشيت وسابتنا
احمد : معلش يا دانيا هي اكيد مش قصدها
انا : لالا مش مشكلة ... (حاطة ايدي ع راسي )
احمد : انتي كويسة ؟
انا : اه اه تمام شوية صداع بس
احمد : ليه كده بس من ايه
انا : مكلتش حاجة طول اليوم بس
احمد : طيب وده ينفع ؟؟
انا : مينفعش بس معلش سيبني ع راحتي انا مليش نفس اكل احمد : لا روحي كلي يالا وانا جاي معاكي اهو
قومنا واكلنا بس انا مكلتش كتير .. بعدين قومت داخلة اوضتي .. اصل احنا بنينا للمستكشفين التلاتة اوضة ع قدهم .. دخلت اوضتي .. قضيت تلت ايام فأوضتي مبخرجش .. مش عشان مضايقة بالعكس عشان حسن ميبصليش و مريم تضايق .. راعيت مشاعرها و حطيت نفسي مكانها .. اي نعم كنت مضايقة اني مكنتش بشوف حسن بس انا عارفة انه ده الصح
*حسن*
دانيا قافلة ع نفسها اوضتها بقالها تلت ايام و معرفش عنها حاجة ورافضة ان حد يدخلها الا جدتها اللي بتخش تديها الاكل و تتكلم معاها شويه يمكن دانيا تقولها مالها لكنها كل مره بتقولها انها كويسة و انه شوية برد بس و خايفة تعدينا .. مع اني مش مصدق حوار البرد ده
مبتاكلش ... كل اما ابص ع بواقي اكلها بلاقيها مكلتش قطمتين او معلقتين ع بعض .. لو بس اعرف اللي بيكي يا دانيا .. تلت ايام كتير والله ع بعدك عني .. انا بقيت عاوز اشوفك فكل لحظة و كل ثانية فيومي . .ليه بتحرميني منك كده ..
و لسة وانا بفكر في الكلمة دي باب اوضة دانيا اتفتح !! اخيرا!!
دانيا خرجت وباين ع وشها التعب .. راحت باست راس جدتها اللي كانت قاعدة جنبي من غير ماتنطق بحرف
جدة دانيا : اخيرا يا حبيبتي خرجتي من اوضتك
انا : ليه يابنتي كل ده ؟؟ في ايه ؟؟
بصتلي بصة غريبة .. فيها تعب و حزن و ألم حطت ايدها ع راسها و فجأة اغمي عليها !!
انا : دانيا !!
و بسرعة وهي بتقع ع الارض قبل ماتقع سندتها من ضهرها و شيلتها لأوضتها .. مريم فضلت قاعدة بره و كأن الموضوع مش فارق لكن احمد و جدتها جم ورايا بسرعة عشان نفوقها ..مكنتش راضية تفوق ..