أصدقاء لا أزواج .. بقلم : أميرة عادل

الحلقتين الرابعة عشر والخامسة عشر

#أصدقاء_لا_أزواج
#بقلم_أميرة_عادل

الحلقة الرابعه عشروالخامسه عشر:

بتنزل فريده مع دلال .. فتحت باب الفيلا ..
ملامح فريده كلها بتتغير ودموعها بتنزل لوحدها
فريده : ايه اللي جابك
سعاد : في حد يقابل مامته كده ... وحشتيني قوي يا بنتي.. عامله ايه
فريده وهي بتحاول تتماسك عشان متجريش علي مامتها وتحضنها بس مش عارفه وعنيها بتدمع : الحمد لله
في اللحظه دي تظهر مريم من ورا فريده .. اللي تكون نزلت عشان تحصلهم
مريم : حمدالله علي السلامه يا ماما .. اتأخرتي كده ليه .. افتكرتك مش هتيجي
سعاد وهي بتقرب منها وبتحضنها : وانا اقدر مجيش فرح بنتي برضه ... الف مبروك يا مريومه .. ربنا يسعدك يا حبيبتي .. كبرتي وبقيتي عروسه زي القمر
مريم : ميرسي .. ربنا يخليكي
بصت مريم لفريده .. اللي كانت عماله تبصلهم وساكته خالص
مريم : طب انا هروح اطلع مع دلال الشنط دي في العربيه
خرجت مريم ومعاها دلال عشان تسيبهم لوحدهم ويعرفوا يتكلموا
سعاد قربت منها وشدتها جامد لحضنها : انتي لسه زعلانه مني .. يا بنتي انا معملتش حاجه حرام .. انا اتجوزت علي سنه الله ورسوله... بلاش تقسي عليا يا فريده
فريده وهي بتعيط ... علي قد ما هي زعلانه من مامتها علي قد ما كان واحشها حضنها قوي .. فسابت نفسها في حضن سعاد شويه
سعاد بعدتها بالراحه ورفعت بايدها وش فريده عشان تبصلها وهي بتقول : يا بنتي انا مليش في الدنيا دي غيرك
فريده بعدت عنها : لا ازاي .. ليكي جوزك دلوقتي
سعاد : انتي من امتي وانتي قاسيه كده
فريده قعدت علي اول كرسي قدامها : انا قاسيه ... انا اللي ما صدقت بعتت بنتي لباباها عشان اعيش حياتي واتجوز .. انا اتجوزت من غير ما اقول لبنتي حتي ...
سعاد قعدت قدامها وقالت بعياط : والله يابنتي انا مكنتش مخططه لكل ده ... وبعدين انا مبعتكيش ليوسف عشان اتجوز زي ما بتقولي .. انا لو بفكر في الجواز .. كان زماني اتجوزت من زمااان .. خصوصا ان عبدالرحمن جوزي اتقدملي قبل كده بدل المره الف .. وانا كنت برفض عشانك .. ايوه عشانك انتي يا فريده .. عشان مش عايزه اجيبلك زوج ام .. ضحيت بعمري كله وبشبابي عشانك ...
فريده : وايه اللي اتغير دلوقتي ..
سعاد : اللي اتغير .. انك نزلتي وبقيت عايشه لوحدي
فريده : انتي اللي قلتيلي امشي .. قلتلك هفضل معاكي .. اصرتي اني انزل .. ولا نسيتي
سعاد : لا منستش .. لان ده كان اتفاقي مع يوسف من زمان انك لما تكبري تنزلي تعيشي معاه ... بس .. بس بعد ما مشيتي .. حسيت بالوحده .. مبقاش عندي حد .. (وكملت بعياط )..احساس صعب قوي قوي ... لما تصحي كل يوم لوحدك .. تاكلي لوحدك .. تتفرجي علي التلفزيون لوحدك .. تخرجي لوحدك .. تنامي لوحدك ... بتكلمي الحيطان والكراسي وكل حاجه .. نفسك تحسي بروح معاكي ..
فريده : في ستات كتير بيعيشوا لوحدهم بعد ما اولادهم يتجوزوا
سعاد (بعياط) : صح اللي انتي بتقوليه .. بس هي قدرات يا بنتي .. في ناس بتقدر تستحمل تعيش لوحدها وتكمل .. وناس لأ .. الوحده ممكن تموتهم بالبطئ... انا حسيت اني بموت وانا لوحدي .. لما عبدالرحمن طلب يتجوزني تاني .. لقيتني بوافق ... ( وكملت بحده ) انا معملتش جريمه .. (ورجعت بحنيه تكمل ) كنت هقولك قبل ما اتمم كل حاجه .. بس خفت .... ايوه خفت .. خفت من رد فعلك .. خفت تبعدي عني زي ما عملتي .... ده حقي اللي ربنا اداهولي .. ليه عايزه تحرميني منه وتاخدي مني الحق ده وتعتبريه جريمه ... انا ما اتجوزتش عشان نفسي اتجوز واحس اني لسه ست واعيش قصه حب والا كنت عملتها من زمان ... لا ... انا اتجوزت عشان الاقي حد اكلمه ويكلمني .. نشارك بعض اخر ايامنا .. لما اتعب الاقي حد جنبي .. انا عشت طول عمري لوحدي عشانك ... مستكتره عليه اعيش اللي فاضل من عمري مع حد يخاف عليا ليه ... متبقيش انانيه يا فريده ...( وخبت وشها بايديها وانهارت في العياط )
فريده كانت باصلها وهي بتتكلم ومش عارفه تقول ايه ولا تعمل ايه ... ولما خلصت كلامها .. فريده لقت نفسها بين نارين .. نار حبها لمامتها وانها مش عايزه تزعلها وان عقلها بيقولها مامتك معملتش حاجه غلط ده حقها ... ونار احساسها بان مامتها خانتها ومفكرتش فيها ...فضلت فريده تبص لسعاد وهي عماله تعيط .. لقت نفسها بتقرب منها .. وبتتطبط عليها وبتقول
فريده : خلاص يا ماما متعيطيش من فضلك ... انتي عندك حق .. ده حقك وانا مقدرش اقول حاجه .. مبروك .. بس ما تطلبيش مني اني اتعامل مع عمو عبدالرحمن زي الاول .. بجد هيبقي صعب عليا قوي قوووي
سعاد بتمسح دموعها بايديها وبتقف قدام فريده : وانا مش هطلب منك ده علي الاقل دلوقتي .. كفايه انك رجعتيلي تاني ...
وحضنتها جامد قوي وهي بتقول : وحشتيني قوي قوي يا فريده
فريده (بعياط ) : وانتي كمان .. وحشتيني قوي يا ماما
دخلت عليهم في اللحظه دي مريم شافتهم في حضن بعض ... ابتسمت .وفرحت انهم اتصالحوا الحمد لله وقالت
مريم (بابتسامه ) : مش يالا بقا ولا ايه .. هنتأخر كده .. وبعدين ايه العياط ده كله .. انا عروسه يا ناس .. مش واخدين بالكم ولا ايه ... مش عايزه حد يعيط النهارده .. اوك
فتحت سعاد ايد لمريم ... اللي جريت عليها والايد التانيه لسه حاضنه فريده .... وحضنتهم هما الاتنين سوا
خرج يوسف من اوضه المكتب ... وبصلهم قوي
يوسف لنفسه : ياااااه يا سعاد ... كأن الزمن معداش عليكي .. لسه زي ما انتي جميله .. حركتي جوايا مشاعر كنت فاكرها ادفنت من زمان .. محدش بياخد كل حاجه اديكي اتجوزتي .. وانا هفضل لوحدي طول عمري ... .. استغفرالله العظيم .. ايه اللي بتقوله يا يوسف ده .. دي علي زمه راجل دلوقتي
يوسف : حمدالله علي السلامه يا سعاد
سعاد بعدت البنات عنها : الله يسلمك يا يوسف
يوسف : انا مبسوط انك جيتي عشان تكوني مع مريم النهارده
سعاد : انت عارف ان علي عيني اني سيبتها لوحدها زمان
يوسف : خلاص معدش له لزوم نفتح في القديم دلوقتي
سعاد : عندك حق .. اللي فات مات .. ومش هيفيد بحاجه الكلام فيه
مريم : طب يالا يا فريده يالا يا ماما .. عشان ما نتأخرش
سعاد / فريده : يالا
مريم : مش عايز حاجه يا بابا
يوسف : لا يا حبيبتي .. خلوا بالكم من نفسكم .. انا شويه كده وهطلع علي الفندق عشان اشوف التجهيزات مع احمد وباباه
مريم : اوك يا بابا .. سلام يا حبيبي
يوسف : سلام
..........................................................................................................................................................................
وصلت مريم وسعاد وفريده الفندق وجتلهم حنين اخت احمد والكوافيره .... بعد فتره وهما هناك ...
خبط عليهم الباب ... كان واحد من الفندق ومعاه اكل
فريده : ايه ده احنا مطابناش اكل
العامل : معرفش واحد جابهم وقال الحاجات دي للجناح ده
فريده اخدتهم وشكرته ...
مريم لسه هتتكلم .. لقت موبايلها بيرن كان احمد
احمد : عروستي الجميله .. عامله ايه .. وحشااني قووي
مريم (بكسوف ومش عارفه تتكلم ) : وانت كمان
احمد (بضحك) : مش عارفه تتكلمي ها ... طمنيني الاكل وصل
مريم : هو انت اللي بعته
احمد : اينعم ... مقتدرتش اكل وانا عارف انك اكييد مشغوله ومش مركزه في الاكل
مريم (بحب ) : حبيبي .. ربنا يخليك ليا يارب
احمد : ويخليكي ليا يا حبيبتي ... بحبك
مريم (بدلع ) : وانا كمان
احمد(بضحك) : انتي علقتي النهارده علي وانا كمان ولا ايه ...
مريم : بطل رخامه بقا .. انت عارف انهم كلهم جنبي .. ( وبصتلهم .. كان فريده وحنين بيبصولها ومركزين معاها قوي .. ضحكت وقالت ) .. لا جنبي ايه .. دول مركزين في التليفون ههههههه
احمد : هههههه... طب يالا هسيبك .. كلي الاول يا مريومتي ها ... وبعدين كملي اللي بتعمليه .. واتطمني جبت اكل يكفي اللي عندك كلهم
مريم : حبيبي طول عمره ذوق يا ناس .. يالا بقا سلام
احمد : سلام يا حبي
قفلت مريم مع احمد وهي مبسوطه وسرحانه
فريده : ياعيني علي الحب
حنين : اوعدنا يارب
سعاد (بضحك) : الله يا بنات .. مالكم ومالها .. ربنا يسعدهم يارب ويهنيهم
فريده / حنين /الكوافيره : ياارب
قعدوا اكلوا كلهم سوا بما فيهم الكوافيره وهما بيتكلموا ويضحكوا ..
جهزت مريم ... ووصل احمد عشان ياخدها ...دخل احمد الجناح بتاع مريم وشافها وهي خارجه من الاوضه ملكه متوجه ناقصها بس العرش اللي هتقعد عليه .... كانت جميله قوي برقتها وكسوفها وحمره الخجل اللي علي وشها .. قرب منها وباس راسها وقالها
احمد (بهمس ) : مبروك يا احلي حاجه في دنيتي
مريم (بكسوف ) : الله يبارك فيك يا حبيبي
فريده : مبروك يا احمد .. مبروك يا مريومه
حنين : مبروك يا بوحميد ... مبروك يا مريوم
احمد / مريم : الله يبارك فيكم ..
سعاد : مبروك يا احمد .. كان نفسي اتعرف عليك قبل كده بس الظروف بقا
احمد : الله يبارك فيكي يا طنط .. مريم كلمتني كتير عن حضرتك
سعاد : مريم دي بنتي .. خلي بالك منها .. واوعي تزعلها انا بقولك اهه
احمد وهو ماسك ايد مريم وبيبوسها : دي في عنيه .. هو في حد يقدر يزعل نفسه برضه
مريم اتكسفت قووي ...و وشها احمررررر
سعاد : ربنا يهنيكم يارب
حنين : هيييح .. اوعدنا يارب
احمد بيخبطها علي راسها : بس يا بنت انتي .. انتي لسه صغيره
حنين بضحك : انا هسكت عن اللي حصل بس عشان انت عريس هااا
كلهم ضحكوا ... ونزلوا من الاوضه .. راحوا عند بتاع التصوير .. اتصور احمد ومريم وبعدين دخلوا كل عيله اتصوروا معاهم ... واصرت مريم تاخد صوره مع اختها فريده لوحدهم وفريده كانت مبسوطه قوي من ده ...
نزل احمد يستنى مريم تحت ... و وقفت مريم مع يوسف والدها ....
يوسف (بدموع ) : الف مبروك يا مريم .. كبرتي وبقيتي عروسه زي القمر ... مش مصدق انك خلاص كبرتي .. مريم اللي كنت بشيلها علي ايدي واكلها والاعبها .. كبرت وبقت عروسه .. هتسبني لوحدي وتمشي
مريم (بدموع ) : حبيبي يا بابا .. ربنا يخليك ليا .. انا علي طول هفضل جنبك.. محدش يقدر ياخدني منك
يوسف باس راسها : ربنا يحميكي يابنتي .. سامحيني لو كنت قصرت معاكي في يوم
لفت مريم وقاطعته : متقولش حاجه يا بابا ارجوك .. انا عمري ما هزعل منك
حضنها يوسف جامد قوووي
سعاد من وراهم : مينفعش كده يا جماعه .. الناس مستنين تحت .. وبعدين كده بوظتي الميكب بالدموع دي
فريده : هو فين الميك اب اللي باظ ده .. هي اساسا تعتبر مش حاطه حاجه .. مش مصدقه نفسي هااا .. فاكره يا مريوم ( وغمزتلها )
مريم ( بضحك ) : يا ساتر عليكي ... ما خلاص انسي بقا
ضحكوا كلهم ... ومسك يوسف ايد مريم ونزلوا علي السلم و وراها فريده وسعاد ماسكين ايد بعض لحد ما وصلوا قدام احمد
يوسف : مش هوصيك عليها يا احمد .. مريم دي حته من قلبي .. اول فرحه ليه ... اوعي تزعلها في يوم ولا تخليها تنام معيطه
قاطعه احمد : مريم في عنيه وقلبي يا عمو .. اطمن عليها
حضنه يوسف : الف مبروك ... ( ومسك ايد مريم سلمها لاحمد )
مسك احمد ايد مريم وهمس في ودنها بضحك: اديكي في ايدي يا حبيبتي .. شوفي هتهربي ازاي ها
مريم (ابتسمت ) : انت لسه فاكر
احمد : اكييد .. ورانا كلام كتير مقولناهوش ...(وغمزلها)
اتكسفت مريم ... وبدأت الزفه .. لحد ما دخل الرجاله قاعه والستات قاعه لوحدهم
خلص الفرح ... وروح احمد ومريم بيتهم بعد ما وصلوهم اهلهم كلهم واصحابهم ..... بمجرد ما قفلوا الباب عليهم
مريم كانت مكسوفه خالص وخايفه ... احمد قرب منها ...ومسكها من ايدها ومشاها لحد السفره ... وساب ايدها
مريم بصت لقيت السفره عليها عشا ومتزينه بالورود الحمرا ... وشمع كتيير حواليها .. واحمد بدأ يولع الشموع اللي كانت في كل مكان .. ولقت قلب كبييير علي الارض معمول من الشمع ... واحمد شغل موسيقي هاديه ....
وقرب من مريم ...
احمد (بحب ) : تسمحيلي بالرقصه دي
مريم هزت راسها بمعني موافقه ...
مسكها احمد و وقفوا في وسط الدايره يرقصوا سوا مع انغام الموسيقي
احمد (بحب ) : كنت بحلم باللحظه اللي هاخدك فيها في حضني ونرقص سوااا
مريم ( بكسوف ) : وانا كمان
احمد (بابتسامه ) : وانتي كمان ايه ... مفيش حد بيبصلك في الموبيل وانتي بتتكلمي ولا حاجه هههه
مريم : ضحكت .. هههههه
احمد : يارب دايما اشوف ضحكتك الحلوه دي منوره وشك
مريم : ربنا يخليك ليا .. يا احلي حاجه في عمري .. لا انت عمري كله يا احمد .. عمري بدا من لما شفتك وحبيتك
احمد ابتسم .. بس سابها تكمل كلامها
مريم : مكنتش اتخيل اني ممكن احب حد كده ... بحس اننا روح واحده عايشه في جسمين ... ربنا يقدرني واقدر اسعدك زي ما انت علي طول بتسعدني
احمد بالراحه : بــحـــبـــك
مريم : وانا كمان .. انا كمان بحبك قوووي
احمد شالها وفضل يلف بيها وهو بيقول بحبــــــــــــــك وهي بتضحك
نزلها احمد وقال : يالا ادخلي غيري هدومك .. واتوضي عشان نصلي ركعتين .. وبعدين (وغمزلها )
مريم (بخضه ) : وبعدين ايه !!
احمد وهو بيقرصها في خدها وبيضحك : وبعدين ناكل طبعا .. دماغك راحت لحد فين ها هههههه
مريم زقتله ايده ودخلت علي اوضتها وقفلت الباب
احمد بيخبط عليها ...
احمد : افتحي يا مريم
مريم : عايز ايه ..
احمد : طب انتي هتغيري هدومك وانا اعمل ايه
مريم فتحت الباب : تعمل ايه ازاي
احمد : يعني انتي هتغيري هدومك .. انا اتفرج يعني ولا اعمل ايه
مريم وشها احمرررررررررر: انت قليل الادب
احمد بضحك : شوفي انتي دماغك بتروح فين .. انا قصدي انتي هتغيري هدومك .. وانا مش هقعد اتفرج عليكي يعني .. عايز اغير هدومي انا كمان .. ممكن اخد بيجامتي
مريم مسكت بيجامه احمد اللي كانت علي السرير .. واديتهاله ..: اهه اتفضل بره بقااا
احمد مسك ايدها : بموت فيكي وانتي مكسوفه .. (وباسها في خدها) .. وبحبك قوي وانتي مرتبكه ... (وباس خدها التاني ) وبعشقك وانتي بتترعشي كده زي دلوقتي ... و... و يالا عشان نصلي عشان انا مش ضامن اللي هيحصل لو فضلت كده
مريم بعدت عنه بسرعه وزقته لحد باب الاوضه وقفلت الباب وراه .. و وقفت ورا الباب وهي حاطه ايدها علي خدها ومبتسمه ..
احمد : ماشي يا مريم ..بتطرديني من اوضتي ... اخص عليكي
ضحكت مريم
احمد : طب يالا غيري بسرعه عشان نصلي
غيرت مريم هدومها ولبست قميص نوم ابيض قصير وسيبت شعرها البني .. ولبست الاسدال وخرجت من الاوضه ..
كان احمد غير هدومه وقاعد مستنيها .. صلوا ركعتين لله في بدايه حياتهم .. ودعوا ان ربنا يوفقهم ... وقروا سوا سوره ياسين ..
احمد : يالا قومي اقلعي الاسدال وتعالي نتعشي عشان انا جعان قوي
مريم : حاضر
راحت مريم قلعت الاسدال .. وبصت لنفسها في المرايه ... وخرجت بصت علي احمد عند السفره ملقيتوش .. دورت عليه لقته قاعد علي الكنبه ومغمض عنيه ..
مريم قربت منه بالراحه .. وبصوت واطي : احمد .. احمد
احمد مبيروضش
مريم قربت منه قوي وبتتطبط عليه بايدها بالراحه عشان تصحيه : احمد .. قوم نام جوه .. احمد
مد احمد ايده ومسك ايدهاا وشدها قعدها علي رجله وفتح عنيه
مريم ضربته علي كتفه : يعني كنت صاحي ..
احمد بضحك : اه ههههههه
مريم : طب اوعي بقا .. سيبني
احمد : مش قلتلك مسيرك تقعي في ايدي .. ومش هتعرفي تهربي
مريم (اتكسفت ) : سيبني بقا يا احمد .. ويالا عشان نروح نتعشي .. انت مش كنت جعان
احمد شالها وقام ... ومريم عماله تقول : نزلني .. ودخل اوضتهم وقفل الباب ورا ونزلها علي السرير بالراحه ... و ....
..........................................................................................................................................................................
روحت سعاد مع فريده ويوسف علي الفيلا بعد ما وصلوا مريم .. عشان تبات سعاد مع بنتها وتسافر الصبح تاني علي نيويورك
فضلوا طول الليل سعاد وفريده يتكلموا سوا لحد ما ناموا في حضن بعض
صحيوا الصبح ونزلوا فطروا سوا مع يوسف ... وهما علي الفطار
سعاد : انا متشكره قوي يا يوسف علي استضافتك ليه امبارح
يوسف : ده بيت بنتك يا سعاد ... يعني بيتك .. في اي وقت تيجي هتلاقي الباب مفتوح ومرحب بيكي
سعاد بصتله باستغراب وقالت لنفسها : هو ده يوسف اللي انا عارفاه .. بيتكلم بالراحه كده وذوق .. سبحان مغير الاحوال .. ربنا يهدي
سعاد : متشكره يا يوسف .. يالا يافريده عشان الحق الطياره
فريده : يالا
سعاد : عن اذنك يا يوسف .. سلام
يوسف : مع السلامه .. وبلغي سلامي لعبدالرحمن بيه
سعاد : يوصل ان شاء الله
خرجت فريده وسعاد و وصلوا المطار ....
فريده (بدموع ) : هتوحشيني قوي يا ماماي .. كنتي اقعدي معايا كام يوم طيب
سعاد (بدموع ) : معلش يا فريده .. انتي عارفه الشغل و .... ... مقدرش اتاخر .. لازم اتابع كل حاجه بنفسي
فهمت فريده ان سعاد قصدها علي جوزها .. بس ما اهتمتش
كملت سعاد : انتي مش هتيجي تقعدي معايا شويه .. انتي خلاص خلصتي دراسه صح .. تعالي اقعدي معايا شويه وارجعي تاني
فريده (ابتسمت ) : لا انا عايزه افضل هنا مع بابا .. مش هينفع اسيبه انا ومريم فجأه كده .. وبعدين خلاص انا حبيت الحياه هنا وبقا ليه اصحاب .. ومبسوطه هنا
سعاد : براحتك يا فري .. اهم حاجه عندي انك تكوني مبسوطه
ندوا في المطار علي الرحله بتاعتها ....
سعاد : اشوف وشك بخير يا حبيبتي .. خلي بالك من نفسك ... وابقي كلميني يا فريده ها متنسيش
فريده : ان شاء الله .. انتي كمان خلي بالك من نفسك.. هتوحشيني
سافرت سعاد لبيتها وجوزها ... ورجعت فريده علي البيت طلعت اوضتها وغيرت هدومها ونامت علي طول
.....................................................................................................................................................................
سافرت مريم واحمد عشان يقضوا شهر العسل في باريس هديه يوسف ليهم .. وكانوا مبسوطين قوووي مع بعض .. ربنا يهنيهم ويسعدهم
فريده حياتها بقت بين انها قاعده لوحدها في البيت بترسم او في الجنينه ... او تروح النادي تجري او تلعب اسكواش زي ما كانت بتعمل بس مش حاسه بطعم حاجه خالص .. علي طول حاسه ان في حاجه ناقصاها .. وعلي طول بتفتكر كلام ياسين ومواقفه معاها .. ولعبهم سوا وضحكهم وخناقهم حتي .....
وفي يوم مي كلمتها الصبح
مي : فريده .. ازيك يا جميل
فريده : ميوي عامله ايه .... وحشاني قووي .. ايه الجواز اخدك مني خلاص
مي : لا ابدا .. انتي اللي اختفيتي .. المهم .. النتيجه بتتعلق دلوقتي
فريده : عرفتي منين؟؟؟
مي : ياسين كلم عمر وعمر كلمني
فريده(بلهفه ) : ياسين ... هو رجع
مي : لا لسه مسافر .. المهم انا خايفه
فريده (بحزن ) : خايفه من ايه بس .. طيب هتنزلي تشوفيها ولا ايه
مي : اه .. عمر قالي هياخد اذن ويجي يوديني نجيبها
فريده : ليه يعني .. لا كلميه تاني ..خليه في شغله وانا هعدي عليكي نروح سوا
مي : خلاص اوك .. بس متتأخريش .. انا قلقانه قوي
فريده : اهدي بس .. يالا قومي كلمي عمر والبسي .. علي ما البس واجيلك
مي : اوك .. باي
فريده : باي
لبست فريده وراحت عشان تاخد مي .. وهي تفكريها كله بعيد عن النتيجه اللي رايحه تجيبها المفروض .. عماله تفكر ... ياتري ياسين مش هيرجع ولا ايه ... ده بقاله شهرين دلوقتي مسافر .. المفروض يرجع بقا .. لحسن يكون هيستقر ومش راجع ,,, لا معقول
ونفضت كل الافكار من دماغها لانها كانت وصلت عند مي .. رنتلها ونزلت مي .. راحوا سوا الكليه ...
الحمد لله مي جابت جيد وفريده جابت جيد جدااا ... مي كانت فرحانه قوووي بالنتيجه .. اما فريده فكانت مش مهتميه بيها اصلا ...لان جواها في حاجه اهم منها ناقصه
فريده : تعالي اعزمك علي حاجه نشربها بمناسبه التخرج
مي : اوك .. هكلم عمر اقوله بس
فريده : ماشي يا ستي .. خلصنا من بابا طلعلنا سي عمر
مي طلعتلها لسانها : رخمه علي فكره .. وبعدين ايوه .. لازم اخد اذنه قبل ما اروح في اي حته مش جوزي وحبيبي ... عقبال ما اشوفك كده بتاخدي الاذن
فريده جه في دماغها صوره ياسين علي طول .. فابتسمت .. ورجعت زعلت تاني
مي بتكلم عمر .........
مي : الو
عمر : ها طمنيني عملتي ايه
مي (بتمثيل ) : مش عارفه اقولك ايه ... للاسف
عمر (بخضه ) : لا .. اوعي تقولي للاسف .. انا مصدقت قلت اتخرجتي وخلصتي
مي (بضحك ) : للاسف جبت جيد بس
عمر (بضحك) : قديمه ...
مي : لا دي جديده .. لسه عارفاها حالا
عمر : وانتي فاكره اني كنت هفضل علي اعصابي لحد ما تروحي تجيبي النتيجه وتكلميني .. سينو حبيبي جابها وبعتهالي
مي : بقا كده ... وعمال تمثل عليه .. ماشي
عمر : ايوه .. عشان كنتي عايزه توقفي قلبي .. تصدقي انتي عايزه تتعضي
مي (بدلع ) : واهون عليك
عمر (بحب ) : لا طبعا ما تهونيش عليه ... اه صحيح فريده عملت ايه ؟
مي : يعني انت متعرفش وياسين مقالكش
عمر : لا سالته علي نتيجه فريده .. قالي انه مجبهاش
مي بصت لفريده بحزن : الحمد لله جابت جيد جدا
عمر : الف مبروك ليكم يا حبيبتي .. فكري بقا عايزه تحتفلي فين النهارده علي ما اجيلك ..
مي : اوك .. هقولك لما اشوفك .. بص يا حبيبي بقا بما اني لسه متخرجه حالا .. فانا بقول ممكن يعني اروح مع فريده نقعد في كافيه ونشرب حاجه ويعدين هتوصلني البيت علي طول .. تمام
عمر : ماشي يا حبي .. متعمليش غدا النهارده هجيب جاهز وانا جاي وخلاص .. يالا بقا احتفالا بالنجاح
مي : انت عايز تضحك عليا بالغدا .. لا انا عايزه هديه
عمر : انا كلي ملكك يا باشا .. انت تشاور بس .. وانا انفذ
مي : ربنا يخليك ليا يا حبيبي .. هسيبك تشوف شغلك .. واروح اشوف الست اللي جايبه جيد جدا ومكتئبه مش عارفه ليه
عمر : ماشي يا حبي .. باركي لفريده وسلمي عليها .. سلام يا ميوي
مي : سلام يا حبيبي
فريده تنهدت جامد : اخيراااا.. ها يا ست مي خلاص ولا في حاجه تاني
مي : ايوه خلاص
فريده : اي كل ده
مي : انتي مالك انتي .. يا ساتر على الحقد .. يارب تخليها تحب وتحل عني بقا يارب
مشيوا راحوا قعدوا في كافيه جنب الكليه ...وقعدوا يشربوا عصير
فريده : صحيح .. هو ياسين راجع امتي ؟
مي : مش عارفه ... بس شكله لسه مطول
فريده (بحزن ) : طيب
مي : فريده .. انا عايزه اروح حاسه اني داخيه شويه
فريده : مالك يا مي .. حاسه بايه
مي : مش عارفه بس عيني مزغلله شويه .. وودني بتصفر كده ومش سامعه كويس ...اه .. فريده .. الحقيني
واغم علي مي
قامت فريده مخضوضه وجريت وقفت جنب مي .. بتحاول تفوقها وهي بتعيط : مي .. مالك .. ردي عليه ارجوكي
جه الجرسون وناس من اللي قاعدين ....
واحد من اللي في الكافيه : دي شكلها اغمي عليها
واحد تاني : حد معاه برفيوم
واحده : ايوه انا معايا ... اهي
وادت لفريده البرفيوم .. رشت فريده منه علي ايدها وهي عماله تعيط وتترعش من الخوف علي صاحبتها .. وقربتها من مناخير مي
مي بدأت تفوق : اه ... اه ... ايه اللي حصل
فريده (بدموع ) : حرام عليكي يا شيخه خضيتيني .. I ll kill u
الناس : حمد الله علي السلامه/ سلامتك
وكل واحد رجع مكانه
مي (بتعب) : هو ايه اللي حصل
فريده : مفيش خضيتيني بس
مي : انا حاسه اني لسه مش متظبطه .. يالا نروح
فريده : بقولك ايه .. كلمي عمر ييجي ياخدنا احنا الاتنين .. انا خلاص اعصابي بايظه ومش هعرف اسوق
مي مسكت موبايلها وكلمت عمر
عمر (بضحك) : مش معقول وحشتك صح
مي (بتعب ) : اكييد طبعا وحشتني .. بس ممكن تيجيلنا علي كافيه ......
عمر (بخضه ) : ليه في ايه .. مال صوتك يا مي ..
مي : متقلقش يا حبيبي .. انا كويسه
عمر : كويسه ازاي .. مالك يامي .. متخضيني عليكي
مي : مش عارفه بس دخت شويه واغمي عليا ... تقريبا من القلق بتاع النتيجه .. وكمان عشان مفطرتش النهارده يمكن
عمر : طب يا حبي .. انا مسافه السكه واكون عندك .. خليكي مكانك .. وانا هاجي اوديكي لدكتور
مي : يا حبيبي .. مفيش داعي لدكتور دول شويه ارهاق
عمر : مي اسمعي الكلام .. يالا سلام دلوقتي عشان الحق اجيلكم
مي : سلام
وصل عمر الكافيه وقرب منهم
عمر (بلهفه ) : حبيبتي عامله ايه دلوقتي
مي : والله كويسه الحمد لله .. متقلقش عليه .. شويه دوخه وراحوا خلاص
عمر : الحمد لله (وبص لفريده ) معلش يا فريده .. ازيك .. والف مبروك التخرج
فريده (بابتسامه ) : ولا يهمك ... الله يبارك فيك
عمر : طيب يالا بينا..
فريده : يالا
مي : عمر هنوصل فريده معانا عشان مش قادره تسوق
عمر : طبعا .. بس كده
فريده : لا خلاص .. انا بقيت احسن .. هروح انا عادي
مي : يابنتي تعالي
فريده : لا .. هي بس الخضه اللي اتخضيتها عليكي .. بس خلاص انا تمام التمام .. وكمان عشان عايزه الحق اروح اقول لبابا وافرحه واكلم مامي
مي : ماشي يا فري .. خلي بالك من نفسك
فريده : انتي اللي خلي بالك من نفسك .. وهكلمك بالليل اطمن عليكي
خرجوا كلهم من الكافيه ... ركبت مي مع عمر ... وركبت فريده عربيتها عشان تروح .. بس كانت حاسه انها مخنوقه قوووي ... فضلت تلف بالعربيه شويه مش عارفه تروح فين .. لحد ما وقفتها علي كورنيش النيل ... وقفت شويه تبص علي النيل وبعدين ركبت ومشيت روحت علي البيت علي طول
فريده : دلال .. يا دلال
دلال : ايوه يا بنتي
فريده : بابا موجود ولا لسه مرجعش
دلال : لا يوسف بيه لسه في الشركه .. تحبي احضرلك تتغدي
فريده : لا ميرسي .. هستناه .. انا طالعه اوضتي
طلعت فريده اوضتها وغيرت هدومها .. واتصلت بيوسف وسعاد بلغتهم بنجاحها وفرحولها جدااا
فريده جت تنام معرفتش .. قامت فتحت التلفزيون اللي في اوضتها وفضلت تقلب فيه ... كانت حاسه انها مخنوقه قوووي .. قامت فتحت بلكونه اوضتها ... وفضلت واقفه فيها تتفرج علي الزرع اللي في جنينه الفيلا وعلي البيسين ... لقت نفسها سرحت
فريده لنفسها : - انا مالي زعلانه ليه ...المفروض اكون مبسوطه النهارده بتخرجي ونجاحي
- يمكن عشان كان نفسي اشوف ياسين قوي ... ولا عشان وحشني قوي .. وحشني كلامه ... وصوته .. ضحكته.. حتي خناقته معايا .. كل حاجه فيه وحشتني .. حتي رخامته عليا وحشتني ...
- معقول انا بحبه فعلا ... هو ده الحب .......
وسكتت شويه ...
- اه .. بحبه ... بحبه قووي كمان ... هتجنن واشوفه .. او اسمع صوته حتى ...
- طب ما هو كان معاكي .. كان بيتمنالك الرضا ترضي .. وانتي علي طول معلقه علي اصحاب .. اصحاب .. اصدقاء لا ازواج .. لحد ما زهقتيه .. واهو سابك زي ما كنتي عايزه
- لا ... انا عمري مكنتش عايزه كده .. انا وجوده في حياتي كان محسساني بالامان .. كنت حاسه ان ليا ظهر اتسند عليه .. مكنتش بخاف من حاجه .. حتي يوم ما اتخطفت كنت خايفه ومرعوبه .. بس كان في حاجه جوايا بتطمني ان ياسين هينقذني ..حتي اما بعمل حاجه تضايقه .. كنت ببقي مبسوطه وهو بيتخانق معايا .. بس بعمل نفسي مش مهتمه .. ياتري هترجع امتي يا ياسين .. هشوفك تاني امتي يا حبيبي ..
- حبيبي .. اه حبييبي
- طب يكلمني في فون حتي .. وكل ما اكلمه يقول مقفول .. عمر بيوصله ازاي طيب .. نفسي اعرف
- اساليه !!
- اسال عمر .. لا طبعا .. استحاله ..
- معقول يكون نسيني خلاص ....اه هو قالي هيسبني وينساني .. وساعت ما احس بيه هيكون مشي .. وهو ده اللي حصل .... يااااااااااااااااه علي الوجع اللي حساه في قلبي اااااااااااااااه ...
في اللحظه دي .. سمعت فريده اغنيه على التلفزيون ... سرحت مع كلامتها .. ودموعها بتنزل من عنيها .... حسيتها مكتوبه مخصوص ليها
واحشنى ايده تلمسنى طريقة نطقه لاسمى
ده روحى و غايبه عن جسمى انا عايشه و السلااااااااااااام