حبك قدري وليس اختياري

بارت 8

كنت ناويه اسوي كيك واكلات الي يحبها وجبتله هديه موبايل جديد هستوه نازل هو طلع العصر ويه جماعته واني بلشت بالشغل زينت البيت وسويت الاكلات والكيك والعصائر وغلفت الهديه وعلكت شموع ولبست بدله خاصه للمناسبات وتمكيجت ورتبت شعري وتعطرت وخليت البيت جنه وضليت انتضره كملت شغلي بالسبعه وكعدت انتضر صارت ب٨ وماكو دكيت عليه ميشيله وصارت بالعشره وماكو وهمين دكيت وماكو وصارت ١٢ وهمين ماكو بصراحه كولش انقهرت على نفسي وعلى التعب الي تعبته وراح بلاش  تعب النفسيه اكثر من تعب الجسد  وبجيت ونمت بالصاله بمكانه الي هو دائما ينام بيه

مهند طبيت للبيت وشفت البيت صاير روعه ويخبل  وريحته تريح النفس والشموع والجو الرومانسي كانما بالاحلام دخلت طفيت الشموع وكلش انقهرت عليها اجيت للصاله وشفتها نايمه بمكاني ودموعها على خدها ويمها هديه مغلفتها فد شي مرتب كعدت عالطاوله الي مقابيلها واتفرج عليها وهي نايمه يربي شنو ملاك شنو من وجه وجمال وبراءه  والله احتاريت وما اعرف  شسوي صرت لا من هلي ولا من حبيبي حبيت ابقى فتره اكثر اتفرج  عليها ومن غير متحس داحرك بشعرها وفزت رغد  :هلو مهند اجيت

مهند :اي اجيت ودانتضرج تكعدين ونحتفل

رغد : نحتفل ساعه وحده ونص لا خليها غير مره ايامنا كولها احتفالات ما شاءالله على العموم كل عام وانت بخير وهذه هديتك تصبح على خير

ورحت لغرفتي بجيت بحركه وعرفته هو كان يحتفل وياها كانت ريحتها بيه  يربي شنو هالعذاب والقهر لشوكت ابقى هيج والله تعبت ومليت واحتقرت نفسي لان دافرض نفسي عليه حسيت بانكسار وفقدت كرامتي وقررت ارجع اوكف من جديد بس هالمره غير لازم اتركه لازم اسيطر على مشاعري خلاص بعد انتهى مهند بالنسبه الي ابقى مجرد واجبات زوجيه فقط علمود لا اترك حجه عليه ويلزمها عليه

مهند كعدت لوحدي وصافن شلون مفكرت بيها والله خطيه وليش ما رديت عليها شگد تندمت لان تركتها ورحت سهرت ويه سحر بالمطعم وفتحت الهديه وشفتها جايبتلي موبايل يخبل موديل جديد كولش عجبني وبسرعه غيرت السيم كارت وضليت اتفرج عليه 

رغد ثاني يوم كعدت طبيعي حضرت ملابسه وريوك اله وكعدته وتريكنه وهو طلع لدوامه وضلت عينه عليه واني ابد مو يمه محجيت وياه  كولت خلي استمر هالشكل احسن بلكت اني ارتاح تمنيت ولا حبيته وتعذبت بهالشكل وره يومين نعزمت بعرس صديقة  ضحى بنت عمتي وكالت لازم ترحين وياي نغير جو شعندج كاعده بالبيت  وكلت لمهند وكال روحي عادي طلعت فستان ماروني قصير وبيه وردات سوده واني بيضه وطلع عليه فد شي بديع وبرمت شعري ولبست حذاء عالي اسود وجنطه سوده صغيره ومكياج خفيف وطلعت مهند شفتها دتطلع واني انبهرت بجمالها واللون الي لابسته غامق وهي بيضه يموووت عليها مكدرت اشيل عيني عنها وهي لاحضت هالشي

مهند : لحضه لحضه وين ان شاءالله

رغد  :شنو وين مو كتلك للعرس مهند وشنو رايحه لوحدج وهالشكل طالعه

رغد  :لا ضحى تروح وياي زوجها يوصلنا

مهند : روحي لبسي شي عليها واني اوصلكم

رغد : مهند لا تبدي رجاء خليني اروح

مهند : سحبتها من ايديها وكتلها حجايه وحده روحي لبسي عليها شي ومن توصلين نزعيها

رغد : اوووف مهند هسه وكتك ودخلت جبتلي وشاح طويل ولبسته وطلعت وهو اصر يوصلنا وفعلا وصلنا اني وضحى وكانت قاعه كبيره ومرتبه تلگتنه اخت العروس وخطيه احتارت بينا واهتمتلنا حيل  وكل شويه وتجيبلنا وحده من اقاربها تعرفنا عليها ضحى استأذنت مني تروح تكعد يم العروس الي هي صديقتها المقربه

رغد : روحي حبي والله ما اضوج اخذي راحتج  شويه داتفرج عالباب منو يجي ما اشوف اله وسحر تدخل للقاعه