كشف المستور

الجزء8 والاخير

8
ربطوني بالسطح ويجون مره باليوم يفكوني للتواليت ويرجعون يربطوني اكل بس وجبه وحده مي كلاص واحد باليوم.. جنت اسمع صوتهم جوه واني وحدي فوك بالحر مربوطه بسلسله بيدي
الوقت حان حيييل طويل ومر مينجرع..
اسبوع كامل مربوطه ومادري شنو خطر ابالهم نزلوني جوه وامي بس تبجي عليه واني مااستاهل دمعه من عيونها..
خلتني بحظنها وتلوم بيه ليش يمه ليش نزلتي روسنه..
اني بس ساكته ومااحس بشي مات كل شي بيه.. ومرت الايام ودزو ع جابر يتوسلون بي حته يرجعني وماقبل الى ان اخواني لمو فلوس اله مدري شكم مليون يله قبل يرجعني..
رادو يخلصون من فضيحتي ومن اسئلة الجيران المتخلص ومن شوفة وجهي النحس..
رجعوني اخواني لجابر بس بمشتمل وحدنا بحديقه اهله.. ماجان ابالي غير شوفة اطفالي الي لو فكرت بيهم عدل ماانجرفت وره عواطفي ووصلت لهيج مواصيل..
دخل جابر للبيت وعقد بس شيخ عليه.. كال..
جابر:شوفي مارجعتج اله علمود الجهال.. لان روان طك كلبها عليج.. راح اعاملج مثل الكلبه! تخدمين وحته ابيت اهلي تنظفين وحته غرفة نجلاء لان هي حامل.. كلمه وحده مااسمع منج.. طلعه طبه ماكو ! جيه الج تنسيها اني هيج عقدت عليج من حجي العالم واله لااني ولااهلي نريدج! تلفون ماكو! روحه لاهلج ماكو !
سوك صالون صديقتج انسيهن.. ولتلعبين بذيلج لان البيت بي اجهزة مراقبه..nada hs
كيفت بشوفه اطفالي واتحملت كل شي ولاابعد عنهم بعد.. روان كبرانه واسعد هم بس متغرب عني حيل ميريدني ..
بقيت حالي هسه مو اكثر من خدامه.. ابيت اهله ولزوجته نجلاء
شفته شلون مهتم بيها وهي روحها بخشمها منه .. شكد جنت اتذلل يمه بحياتي مشفته مثل هو يمها.. ياما لبست وغيرت بروحي مشافني.. حجيت حب وغزل ماسمعلي .. كل شي سويت انطيته العندي والماعندي وما خلالي قيمه..
اتحملت اهاين اهله اليه واخته الي حته فشار تفشر عليه كدام اطفالي.. جنت اسكت واكول استاهل واصلا غيري وحده كتلوها
هسه وجهي مشوه ميتباوع بي جويات وشخوط متروس ترس
صرت اخاف اباوع نفسي بالمرايه من شكلي ومن قباحه فعلي..
صرت عوده مو ذيج المدبدبه.. ام الوجه الوردي..
اسعد ميتقربلي ابد وكله كاعد يم بيت جده وبس روان يمي ..
هذا طريق الحرام هيج يوصل واسوء.. طبعا مااحجي عن حالتي النفسيه الي من تجيني الحاله انتهي واتمنه الموت ومااموت
.. الصداع النصفي شكل ويايه من ايام حبسه السطح ولهسه
.. بيدي دمرت كل شي وقلبت حياتي فوك تحت .. متهمني مسامحه الناس ورضاهم عني .. واخجل اكول اطلب السماح من ربي .. اعرف انه عقوبتي الموت لازم بس محد اتجرء وسواها وخلصني من عذابي.. nada hs
نصيحتي لكل وحده سواء بنت او متزوجة .. مهما صار الحرام حلو بعينج اياج تقربي.. راح تبقه وصمه عار الج ومرات افكر بروان اكول يحوز محد يتزوجها اذا سألو عن ماضي امها الاسود.. الواحد بيده يوصل نفسه وبيده يدفنها .. مثل ماصار ويايه .. عايشه بس بالاسم ويوميه من اكعد الصبح ادعي ع نفسي ىاكول ليش مامتت.. كل لحظه ويه عمار تنعاد كبالي كأنه شيطان فوكي مو انسان! استغل ضعفي وجملي هواي اشياء
وبالنهايه الصار مو ذنب احد.. الصار ذنبي اني وحدي ..
بنفس الوقت جابر جان يخوني ويه نجلاء وصارت زوجته ومعززه مكرمه.. ولااحد جاب اسمهم ولا سيرتهم ..
النهايه...

انتهت هذي القصه ونهايتها مؤلمه وهذا واقع حال المرأة العراقيه..
انتظروني بقصه جديده رومانسيه-فكاهيه عن بنت الريف وحبيبها السوري.
احبكم🌹😘