بقلم لكاتبه
اماسي الليل ام مريم
قصه منقوله اتمنى ان تنال اعجابكم
انا لم اخلق ... جاريه لرجل ... انا طموحا انا وطن اناكيان انا انوثه وعاطفه وعاصفه بوجه الزمن انا..قوه انا..صبر..انارجل عند المحن
.... لكن... لكن...حين اكون في مجتمع يحترم حقوق المرآه ويقدسها .... ليس في مجتمع... يسبق العيب الحرام....
انا اناضل ليكون لي مكانه واحترام ...
ونبتدي...الحكايه .... من نجحت من الرابع اعدادي .. وبيوم اتمشى بالبستان ...راجعه... للبيت
ناطق: بت منو انتِ
سماره : فزيت ... مجاوبت مشيت بسرعه خفت منه....
ناطق: يحلوه... لا تخافين ما رايد بس اعرف بت منو انتِ
سماره: عفيه كافي لتلحگني اذا احد شافك ... تجيني حجايه
ناطق: دگفي...انت مو من الولايه من لهجتج...
سماره: اوف ياربي ... شلون وياك راح تفضحني لتمشي ورايه
لخاطر عرضك ليشوفني احد من عمامي لو ولدهم يذبحوني
ناطق: لو اعرف بت منو لو ... ابقى ملاحگج...
سماره: ولك شبيك ماعندك شرف وغيره ...لاحگني
ناطق: عندي شرف وغايتي شريفه يا بت الناس ... حسنج.. دولبني ... وادور بت حلال واليوم لگيتها
سماره: اذا قصدك شريف... لتمشي ورايه وتجيبلي الحجايه ...
فدوه لعينك والله ميرحموني
ناطق: بت منو
سماره: بيت حجي عيسى
ناطق: لا دزيت امي يا بت الناس ... توافقين
سماره: امري مو بيدي بيد اهلي
ناطق: تيسري يبت الناس... المسا... جايتكم امي خطابه
سماره: مشيت ميته خوف... لا احد شافه .... دخلت للبيت
ايمان : وين صرتي ولج بقى بالي
سماره: وين صرت غير ردتيني اصيح عمي .... گلي اليوم ميكدر يجي يبات يمنا راح يبقى يم بدريه مريضه .... سولفتله على محمد گلي باجر اني ... اعلمه من اجي
ايمان: اي طبعا بدريه مرته اني مو مرته ...
سماره:يمه... المره مريضه ... قابل يعوفها ... واليوم هو يومهم...
ايمان: اوف هو منو جبرني على هالزواجه الگشره غيرج
سماره : يمه انتي لو باقيه كاعده عليه وشايله فكرة الزواج جان محد جبرج على هالزواجه ... اني شنو ذنبي جان شمرتيني عليهم ورحتي اتزوجتي غير عمي
ايمان: من ورا بيبيتج بزعتني بس ردت اتزوج اخلص منها ... وتالي خيروني بين ابقى عدهم لو اعوفج واروح لاهلي لو اتزوج
اختاريت ابقى يمهم زوجتني عمج
سماره: يمه هسه اخوتي بطولج كاعده تتندمين
ايمان: اي والله من ضيمي احجي روحي ماما شري الهدوم
سماره : صعدت اشر الهدوم ... وسرحت ...اتذكرت ابويه الله يرحمه استشهد بحرب ايران ...جانت كاعده ويانا بالبيت بيبيتي ... گويه وتحكم ... امر ابويه بيدها ...
شوفت امي الويل... اتذكر امي من جانت تبچي طول الليل ... امي من اهل بغداد وابويه اهله بالمحافظات ... شافها مره بعرس صديقه والعروس صديقة امي حبها واهلها ماقبلوا ينطوها الايسكن بغداد .... اهل ابويه ما وافقوا بالاخص بيبيتي لان هو بزر الگعده ... دك رجل غصبها تقبل وگلها تعالي عيشي ويايه ...
صارت القسمه ومن يومها بيبيتي لوعتها لامي ... وابويه شتسوي بيبيتي لامي يگلها ما الي علاقه انتِ وياها ...ماعدا فاتحه بيتنا مضيف لعمامي والعماتي وامي تركض النهار كله مثل الخدامه وعماتي يجون خطار كاعدات وامي تخدم عليهم .... وراها استشهد ابويه ...بيبيتي گالت لامي تريدين تروحين لاهلج روحي وحدج البنت تبقى ... امي مقبلت..... مرت اكثر من سنه على وفاة ابويه تقدم لامي ابن خالتها ....بوگتها بيبيتي تخبلت ... گلتلها بس تزوجي اذب عليج تهمه مرافگته من ايام المروحوم ونرفع عليج قضيه ناخذ منج البنيه ...امي جبانه خافت منهم لياخذوني ... ومشكلتها مجان عدها اخوه بس خوات وامها وابوها كبار بالعمر من اهل الله ما عدهم مشاكل وطلايب....
رفضت امي ابن خالتها ... وبقت تعاني من ظلم بيبيتي الى ان
زوجتها لعمي ... تغيرت ويا امي ... لان هذا عمي گوي مثلها ..
وميقبل احد يتعدى على نسوانه ... اتزوجت امي عمي وبقت ببغداد يم بيبيتي ومرته بدريه وولدها بالمحافظه ... جان يتنقل بيناتنا فتره يمهم وفتره يمنا الى ان توفت بيبيتي العام .... گلها لامي بعد ما الج كعده هنا ... تجين يمي ... اشترالنا بيت وانتقلنا للمحافظه ... هالسنه حسيت بغربه ... بالمدرسه وبالشارع وبالبيت كلشي تغير ... عمامي وولدهم كبار ... ومعروفين ... وعمي عيسى رجل امي... عندي اخوه منه صغار ...بس عنده ولد من بدريه مرته الاولى احس عينه عليه واني ما ارتاحله لان عينه
قبيحه وكم مره يحاول يطخني لو يلزم ايدي ... خفت منه سولفت لامي ... من يومها من يجي يمنا متخليني انزل ويصيحني على شي هي توديله ... الي يريده لو اخوتي .....
محمد: سماره وين صرتي امي تريدج
سماره : هسه خلصت.... جايه جايه .....
يوم نسيت اگلج لحگني واحد... گلي راح يدز امه لمغرب
ايمان : منين يعرفج ولج
سماره: بقى يلحگني خفت لا يشوفه احد رزلته بقى لازگ يريد يعرف من بيت منو اني .... عرفني مو منا... انطيته اسم عمي
حتى يفك مني ... گلي راح ادز امي خطابه
ايمان: جذاب هذا عباله تنطي مجال ... بهالحجي
سماره : والله ما اعرف ...
ايمان:ماما حبيبتي ديري بالج على نفسج واي شي لتضمين عليه ... اني ارتاح من تسولفيلي كلشي .... احسن من ما تسولفي لاحد غريب ... بنيتي انتي حلوه والعين عليج ... لتخلين احد يقشمرج ولا يلعب بعقلج الي يريد بنيه ويحبها من صدگ وغايته شريفه يجي يدگ الباب
سماره: لا يمه ما اضم عليج شي لان ادري انت توجهيني صح وقلبج عليه
ايمان: عفيه بنيتي السباعيه ... شوفي هذا عمج ديحاربني ... لان يريد يكعدج من المدرسه واني ما اقبل ... لان هم يظلمون بناتهم ... وميخلوهن يكملن دراسه بس على كد ما تتعلم تكتب وتقرا ... هيج يخلون المره تحت رحمة الرجال
شوفي اني لو مكمله مثل خواتي مجان هذا حالي ... جنت كسلانه وما احب المدرسه تالي تبهذلت .... لان ماعندي معيل ...
وماعندي شهاده اتوظف بيها واصرف عليج منها جان ما ... تحكموا بيه اهل ابوج وتزوجت عمج
سماره: يمه انت تحبي لعمي ... ترى هو يحبج ...
ايمان: احبه حب عشره هو رجلي وابو جهالي .... اخاف عليه لان سندي ... واتبهذل وراه ....والله دائما ادعي الله يعلي بختج
ويريحج ويا رجال ابن اوادم يخاف الله بيج
بس انتي بنيتي ... توجهي لاالله ولتگطعين صلاتج .. ارضي الله يرضيج
سماره: ان شاء الله يمه
ايمان: اني اعلمج لان ما ضامنه عمري ...
سماره: اسم الله عليج ان شاء الله عمرج طويل ... بوستها وحضنتها
ايمان: الله يرضى عليج حبيبتي ...
سماره : لليل اجى عمي ... ضايج وعصبي
عيسى : شفتي ... من ورا بنتج صارت مشكله بين الولد
ايمان : شكو بنتي شعليها
عيسى : ذولي منين الي جوي عليها ووين شافوها ....
ايمان: فهمني شنو الي صار
عيسى: اجتي عليها مره ... تريد تخطبها لابنها .... وابراهيم وجاسم ولدي تعاركوا ... لان اثنينهم رايديها .....
ايمان: اني ما انطي بنتي لولد بدريه عاد شلون تحبني وانطيها بنتي ... حتى تمرمرها ....
عيسى: اي خوش لعد ... خليها يمج ... لان رديت الولد الي متقدملها ... گتلهم ماعدنا مره
بدريه هم ما تريدها ... وكتلت روحها حتى اوافق ...
ايمان: اي تبقى يمي ولا انطيها لولدك
عيسى: هاي الي جاني من بنتج ... اخوه يتعادون علمودها
ايمان: وبنتي شعليها قابل ...مواعدتهم بشي ... لو جابرتهم
يردوها.... گطنه وشيلها تصير لواحد منهم
عيسى : ما تصير .... ولا رايدها ...خو ما انطيها لواحد منهم واخلي الثاني يحقد عليه وعلى اخوه ....
ماكو مدرسه بعد ...
ايمان: ها هاي السالفه .... تريد تكعدها من المدرسه ... ماكو
والله ما ابقى وياك بس تفكر ... تبطلها
سماره: عمي زعل من امي وطلع .... اني بقيت ابچي ...
هاي شلون ورطه ... ياربي ... انت حلها من يمك ...
رحت لامي گتلها يمه ... راح يبطلوني
ايمان: والله على جنازتي....
سماره: خابرت على صديقتي ... في...هي الوحيده الي اشكيلها همي ...
الو
في: الو هلو سموره شخبارج
سماره: هلو .. والله يا في ... مراح اخلص منهم عمي وولده ...
ومرته لج داكين رجل ميخلوني اكمل مدرسه
في: يبو ليش شصار
سماره: اليوم على حظي شافني ولد ... ابن اوادم دز اهله يخطبوني ... انوب فتح باب عليه ... ولد عمي متعاركين من ورايه ... اني لو على براهيم اقبل بي ... خوش ولد بس جاسم ما اطيقه ... لج عيني ... خانگني ...والله يوم الي يفوت علينا ... ابقى محبوسه بالغرفه ... من ورا ... ما اكدر احجي لامي واگلها
ذيج المره من بات يمنا ... نزلت للمطبخ ... اخذ مي ... دخل ورايه .. يتحارش بيه ... ضربته ونهزمت ... ثاني يوم ... قبل ميروح گلي ضامها الج... من اتزوجج... اردها... جربي تحجين وشوفي شذبلج تهمه
خفت منه ... خايفه لا يبقى يزن على عمي ... وهو اكبر من أبراهيم ... يروح يجبرني ويزوجني اله .... لج والله راح اموت يوميه اريد احجي لامي واخاف ... تصير مشكله ... وامي تطلب الطلاك وعمي يسويها شغل عناد ويزوجني اله
في: اف... لعد شلون تبقين ساكته
سماره: والله اخاف احجي ويذبلي تهمه... تالي يجبروني اتزوجه
هسه طول ما ابراهيم هم رايدني ... عمي ومرته ميفكرون ياخذوني لواحد منهم
في: يولي لتخافين ولتبينين كدام هذا المكروه جاسم انتِ خايفه منه ... وحاولي ... تحذرين امج منه ...
سماره: گتلها ما ارتاحله نظراته مو طبيعيه ... من يومها كامت متخليني اطلع ومن يبات يمنا ... تنيمني يمها
في: اي عفيه عليج
سماره: فدوه ادعيلي الله يخلصني منهم ... ويلهيهم عني
في: والله هسه ادعيلج واخلي حبوبتي هم تدعيلج
سماره: في اني اسولفلج لان ماعندي خوات انتي اختي
في: چنچ ما حچيتي ولا اني سمعت ... انتِ اختي ... أمني
سماره: والله ادري ... يله راح اروح اخذي راحتج
في: الله وياج مع السلامه
