جنح نثية

الجزء الرابع/جنح نثية

طلعت من المستشفى حسين ماقبل ارجع لبيتي وعمتي هواي اتوسلت بس هو اخذني لبيتنا بيت اخوتي..
بقيت كم يوم يمهم جان حسين اكثر شي يداريني اخر شي كال رجعة لغيث ماكو
كتله خويا الله يخليك الناس ما راح ترحمني اذا اطلكت  خليني اصبر عليه والله كريم..
كال هي كلمة وحدة تطلكين يعني تطلكين وتاخذين حق الغايب منه هم
حسين عوفني بضيمي فدوة اروحلك
جان يكول تدرين حياتي وسعادتي ويا الي احبها واكفة ع طلاكج...
ليش خوية هسه فهمني
محتاج فلوس والغايب الي تاخذيه راح يحل مشكلتي
كلت بنفسي هسه افتهمت حسين ليش هلكد حنين عليا اثاري السالفة هيج يلا هاجر ميخالف هذا اخوج وحزام ظهرج مهما يكون
كتله خلص حسين سوي الي تشوفه صح اني مامرتاحة وياه اقلها اريح گلبك واسعدك
كلش فرح حسين باسني وكام طلع ثاني يوم بدا بسالفة الطلاك وغيث ماعاند لان ماأله وجه بعد كم يوم بالمحكمة طلكني وانطاني الغايب بس امه حيل بجت بيومها وكالت والله لو تصبريله هو كلش مقهور ويريدج وراح يتغير
اني ماكلت بس الله يسامحه وخليتها ومشيت....
واخذت الغايب من ايدهم لأيد حسين
نفس الاسبوع رحنا خطبنا مياسة لحسين فدوة لگلبهم اشگد چانوا فرحانين....
وسوينالهم حفلة خطوبة صغيرة وراها بدينا نجهز للعرس
طبعا سفانة بدت سالفة السلايف من وكت جانت كلش تغار من مياسة ودائما تحاول تضوجها من تشتري شي تقشمر ع ذوقها بس مياسة هم مو فقيرة جانت تردلها الكلمة بعشرة
وسوينا العرس وجان كلش حلو دك وركص بس اني اكلتلي جم احجاية من النسوان بيهن حجن بوجهي وبيهن سمعتهن يحجن من امر
هاي اختهم المطلكة
اي خية لفت ع زلم الديرة ويومية يم واحد
وليش اطلكت
والله عاد مبينة مو راحة هي وشلون حظ وين العنده وميسور يدك بابها بس هي مو وجه نعمة
دخلت لغرفتي وسديت الباب جنت مخنوكة ظليت ابجي وابجي ياربي انت ادرى بحالي ماألي غيرك اشكيله
خلص العرس وصاروا جناين اثنين وانكلب البيت لحلبة مصارعة يومية عركة شكل بين مياسة وسفانة ومن يتصافن يگلبن عليا
الوضع يوم بعد يوم اتأزم واتفقن عليا الماخفن الله وصاروا يشوفنلي ايام سودة
مرة اتهمتني مياسة اني بايكة سوارها الذهب الله لايسامحها بيومها بكل ثقة كلت لحسين اني اذا ابوك وين اضمها غير بغرفتي روح دور ودخل اخويا يدور جان يلكه السوار جوا المخدة جان يطكني طك بس ماموتني شكد بجيت وحلفت ماصدكني اني مازعلت منه هو حقه اذا مرته مدبره كلشي بالدليل هو مجبور يصدك
ومرة ابن كاظم رافد وكع من الدرج وخشمه طك دم وسفانة تدري لو يجي كاظم الا يدزها لاهلها لان كلش عصبي اتهمتني اني دفعته عود لان حاقدة عليهم وعلمت رافد اذا ابوه سأل يكول عمة هاجر دفعتني
اجا كاظم من كالتله ماصدك بس من ابنه شهد تفل بوجهي وكال حقيرة شكلج اكثر زين من عدنا مستحمليج
عشت ايام صعبة محد رحم بحالي فكرت كم مرة اكتل روحي ومااتجرأت
بقيت سنة ضكت المر ع ايد سفانة ومياسة وظلمهم قليل ايام ماجنت انكتل بيد اخوتي
بعد سنة رادني واحد من المنطقة شاب فقير ع باب الله بس خلوق الناس تحلف براسه اسمه جاسر
اجوي اهل جاسر وكعدن سفانة ومياسة وياهم واني محد اخذ رايي هن اتفقن وانطني واخوتي ع شورهن
اني جانت الدنيا واكعة من عيني ومسلمة امري لله ماراضية ع الزواج بس مااكدر اعترض انطوني بلا زفة وعرس كالوا كافي مرتين عرست خوما يومية سوالي جاسر بس 6 سوارات اسمهن ذهب وكتبلي الغايب مبلغ صغير
بيومها اجا ويا امه واخته  واخذني بهدومي الي عليا
لبيتهم  دخلت بيت بسيط ومبين حالتهم امر من حالتنا دخلني لغرفتي حتى طخم اخشاب  مابيه اول ما كعدت ابجي وبغصة هو استحى
كال حقج ادري البيت والغرفة مو مال عروسة بس ان شاءالله من يصير بيدي اعوضج
كتله والله مالبيت مابيه شي بس ابجي ع حالي وحجيتله ع الي شفته من زواجاتي السابقة وظروفي بالبيت وحجي الناس
كال ولا يهمج من اليوم انتي بذمتي ليوم الدين مااسمح لاحد يأذيج
فرحت صرت ابجي اكثر من الفرحة جان مبين انسان صادق ونظيف گلبه
عشت ويا جاسر واهله احلى ايامي جان ينقص فرحتنا وجود طفل ماصار عندي حمل 5 اشهر وراها بدينا نراجع طبيبة بعد الفحوصات طلع جاسر عنده ضعف هو كلش انقهر بس اني وكلت امري لله كلت حتى مااكول لاحد السبب منه لان ربي وان حرمني من الامومة بس انطاني رجال حنين ويحبني وهذا يكفي بعد الي شفته قبله
جان شوكت مااريد ياخذني اشوف اخوتي هم مايريدوني بس اني جنت اشتاقلهم
جنت اروح اكثر شي احجي مع علاء يحجيلي عن شغله وحياته ويضحكني ع عركات السلايف
بس خطية جنت انقهر عليه لان محد يداريه هدومه هو يغسلها واكل مايبقوله
جنت اكله اخويا انت هم اتزوج جيبلك وحدة بنت اوادم تداريك
ويكلي سودة عليا منين هجور الزواج يريدله مصاريف
بقيت يم جاسر 3 سنوات مايوم كسر گلبي واني جنت مخليته هو اهله بعيوني
بعد هالفترة وضع بيت اخوتي كلش صار مايراد اطفالهم كثروا وعركاتهم صارت اكثر ناس تمالخ ناس
واهملوا علاء اكثر واني جنت اموت قهر عليه بس مابيدي حل
بيوم رحتلهم لكيت الباب مفتوح ومحد اكو دخلت ادور سمعت صوت ونه من غرفة علاء ركضت اشوف
سودة عليا مريض مصخن ويهذي ومحد اباله عايفيه وطالعين
سويتله كمادات وبقيت يمه اجا جاسر المغرب ياخذني كتله اريد ابقى يمه اليوم وقبل
ظليت اداريه وابجي وادعي يم راسه تالي الليل يلا استعدل شوية كعد حضني
خية هاي ليش بعدج اهنا اخاف رجلج يحجي
لاخويا استأذنت منه شلون جنت اعوفك واروح... هسه شلونك يابعد گلبي
زين الحمدلله مااعرف شلون اجازيج شسوي الحظ مايكعد وياي جان جبت مرة وخلصتي مني بس الظاهر راح ابقى واموت مثل الجلب بوحدي
لاخويا حشاك لاتكول هيج اني ادبرها لاتخاف
رجعت للبيت وكلام علاء ظل ابالي وظليت افكر بحال المسكين
كلت بنفسي انطيه سواراتي يبيعهن بس منو يكول جاسر يقبل ومنو يكول راح يكفن
ظليت ايام مشغول بالي اهملت البيت وجاسر گضيتها صفنات
ولاحظوا بالبيت حالي متغير وحاولوا يعرفون شبيا بس اني ماشاركت احد افكاري...
بدا جاسر يضوج من صفناتي وبالي الشارد وصرت مرات مرتين اروح لاخوتي حتى اطمأن ع علاء اسويله اكل واغسله ملابسه والجناين ولا عبالك بالدنيا صرت اطلع حتى بلا اذن جاسر
بيوم جاسر اتعصب عليا
انتي شنو سالفتج عايفة بيتج ورجلج وكاضيتها تسيارة لأخوتج
جاسر انت تعرف...
اي جنت اعرف بس هسه تاهت
شنو قصدك
قصدي طلعة من البيت ماكو بعد الا اذا اني اخذج
مااكدر لازم يومية اروح....
كلمة مني وكلمة منه كبرت السالفة وصار بيها صياح... لملمت هدومي ورحت يم علاء
هاخية علاكتج بيدج هالمرة
علاء ابقى يمك اخدمك كم يوم مااريد ارجع لبيتي هسه...
بقيت اسبوع جاسر ماسأل عني حجي بيناتنا هو حقه اني زودتها بس والله مو بيدي لخاطر اخوية
هالاسبوع كله اني بعدني دافكر بسالفة علاء... يمكن عرفتوا شجنت افكر..؟؟
اي اخر شي فكرت اطلك ينطيني الغايب ويا السوارات وازوج علاء خطية هو هم حاله حال الشباب
وحسمت امري وحجتي بايدي كلت ومن ورا گلبي الله الشاهد.. اني مامجبورة اعيش مع رجال مايخلف هو كرامته ماسمحتله ينتظر مباشرة طلكني وانطاني مستحقاتي