ضمادة للروح

٢٢

وصلو مطار دبي واتوجهو على الفندق... كان حاجز غرفتين جنب بعض ..
هوكان مشغول طول الوقت خصوصا في الفترة الصباحيه .... بس بالمسا كان بعوضها ليها ومرات كانت بتطلب سيارة اجره من الفندق وتطلع على الاسواق والمولات تشتري طلبات ريم ...... قضو اجازه حلو واستمتعو بوقتهم والفسحه في دبي غير....برج خليفه ...مولات ...حدائق وبحر وقعدو اسبوع في اتلانتس كمان يعني انبسطو على الاخر ......
مره كانو بتمشو سوا في مول ....شافت محل فساتين افراح ....اتلفت عليو..
تالين : عايزه اعمل لريم مفاجاه واشتري ليها فستان زفاف ....عارفه الموديل العاجبها وزعلت لمالقت زيو في السودان
يوسف: غالي والطلب رخيص
دخلو المحل وبالصدفه شافت نفس الفستان العجب ريم في المجله ..... جات الموظفه تساعدهم
يوسف : بنسأل من الفستان دا
الموظفه : هاد الموديل بناسبك كتير وراح تطلعي احلى عروس
اتلخبطت وقالت ليها .... الفستان مش عشاني .........كان بعاين ليها ويتبسم ..
الموظفه : سوري .... بس اكيد راح يجي يوم وتلبسيه وتطلعي متل القمر ..... طيب بالنسبه للمقاس
تالين : نفس مقاسي تقريبا بس اطول شويه
الموظفه : دقيقه اجيب ليك طلبك ........ دخلت جوا وجات شايله فستان... اذا هي نفس مقاسك ادخلي قيسيه
تالين: لا ماعايزه
يوسف: ليه..... عشان نتاكد من المقاس
تالين : بعدين هي تعدلو لو فيه حاجه
يوسف : لو ما عايزاني اشوفك بطلع اخليك على راحتك
تالين : القصه ماكده
يوسف :القصه شنو طيب
تالين :دا فستان فرحها ولو لبستو قبلها ممكن أكون فال شؤم عليها ...ماعايزه نصيبها يكون زي نصيبي ...... مابقصدك انت.........فاهمني صح
يوسف: فاهمك ....مامشكله ...بس مانطلع من هنا الا وتشتري ليك فستان للعرس ..دي مافيها حاجه صح ...

وفي اخر يوم .... أستاجر يخت في دبي مارينا وطلعو من الصباح..... الجو كان حلو واليخت رااقي .....قعدو ياكلو و يتونسو مع نسيم البحر وعلى أنغام الموسيقى الهادئه ..
تالين : دا كتير والله ....و حتعود على كده وانا تعودتي كعبه
يوسف : ياستي اتعودي ماعندي مشكله
تالين : انت انسان رائع ولوفي زيك اتنين الدنيا تبقى بخير
يوسف: انا الوحيد الماعندي39 شبيه....جيت طلبيه خاصه وقفلو المصنع
تالين : يعجبني الواثق من نفسو
يوسف : كويس ماقلتي مغرور
تالين : في الحقيقه زمان كنت شايفاك مغرور ومفتري وماعندك قلب
يوسف : لاحولا ..... دا كلو ....... وهسي
تالين : انت اطيب انسان قابلتو بس منظرك القاسي و وشك العابس بعكسو صورة خاطئه عنك
سرح شويه وعاين ليها .......بصراحه انا بالنسبه ليك شنو
تالين : انا كنت في غرفه مظلمه شديد ومقيده بسلاسل ...كانت الغرفه بتخنقني لدرجه ماقادره انتفس ...و فجأة انت جيت وشايل معاك شمعه كسرت كل القيود وطلعتني من الظلام ونورت حياتي.... انت بمثابه الشعله بالنسبه لي
يوسف : ليه بتذكريني بالموضوع دا طوالي وتعملي حواجز بينا
تالين : مافي حواجز بين الاخوان
سكت مسافه و دار وجهه الناحيه التانيه ....طلع سجاره و ولعها .....إلتفت عليها وقال ليها ..... اكيد يا أختي الصغيره ...