طريق الموت

دخول الكويت 2

لطفا وليس امرا صوتوا للرواية .. كي تحفزونا على تقديم المزيد
.....((((( دخول الكويت ))))).....

بعد يومين رحت لبيت عمي الچبير واعتذرت من عنده, وكان ماخذ هواي على خاطره مني .. گال لي:- شوف سعودي .. ما يحتاج اگول لك شكثر معزتك عندي .. بس لا تصدگ ارضى عنك الا اذا طيبت خاطر عمك .. ابو خطيبتك .. وانطيت وحدة من خواتك لابنه .

آني أصلا نسيت سالفة ( خطيبتي ) .. ولا كان على بالي اتزوج .. رجعت مرة اللاخرى اتعذر من عند عمي , وأطْلُب منه يعفيني من سالفة الخطبة .

لكن هوَّ اصر إلا اتْزَوَّجها لبنت عمي, وإلا أنطي وحدة من خواتي لأبن عمي اللي ابو سَيَّرْ عليها ..

كل عمامي يعرفون اخلاق ابن عمي .. دايح .. وسكير .. ويحمل كل الصفات السيئة ,من حاججت عمي الچبير وذكرته بسوء اخلاق ابن عمي گال لي :- شوف ابني .. الرجال ما يتعيب .. بعد ما يتزوج ويحس بالمسؤولية يعقل, ويترك السوالف المكسرة ...

المهم ... منا حچاية ومنا سالفة .. قنَّعني عمي بضرورة تزويج وحدة من خواتي لذاك ابن عمي المستهتر ..

بعد ما قنعني .. گام واجا ويايَّ على أمي, واخذها بالسياسة, الى أن اقنَّعها ..

لكن طلعت لنا مشكلة جديدة .. ما كنا نعرف ابن عمي إلمن يريد يتزوج من البنات ..

مع هذا أمي حچت وي البنات وشاورتهن حتى تعرف يا هي منهن اللي ترضا بأبن عمي .. لكن البنات كلهن رفضن !! وهذا الامر مگدور عليه .. !!! عمي گال :- خلي نشوف عمكم ابو الوَلَدْ المن يريد من البنات لابنه ...؟ وبعدين نتصرف ..

والله .. عمي راح الهم .. وسائله للولد , فذاك .. گايل له:- اريد الزغيره ما بيهن ..

كان عمر اختي الزغيره لسه ارباعطعش سنة .. فرفضنا كلنا, اني وأمي والبنات , ورجعت المشكلة انعادت من جديد ..

المهم عمامي بعدها ثگلت وجوهم علينا, ومعاد يجونا للبيت ..

من ورا زعلهم وانقطاعهم عنا .. أمي گالت :- ما باللازم .. ما محتاجيهم .. انتَ ما شاء الله راتبك بجيبك, وراتب ابوك ما انقطع .. وخير وفضل من الله .. خواتك الف من يتمناهن .. وانشاء الله ابوك يرجع من الاسر, ونفرح بجيته ونزوجهن ..