أهُنتُ عليك؟
للكاتبةNuha-d-h
انطتني المرية الفلوس وكالت اكو حارس بباب المستشفى كال انة اوصله للكراج بعدين خلصت شغلهة بالردهة واجت سلمت علية ودعتني
مودعة بالله يايمة
اني سمعت هاي الكلمة واتذكرت امي ونهاريت بالبجي وحضنت المرة حيل عبالك راح استمد منه القوة مثل ماكنت اسوي وية امي بستهة من راسهة وراحت
وفعلا يوم ثاني كتبت الدكتورة على الخروجية مالتي واخذت جنطتي على حطت ايدي مستمساكتي ونقالي الصرصور شفتة مغلق يالله شسوي قابل منو راح يتصل علية اشو مكطوعة ومنبوذة
لبست عباتي الجبة كانت هم موجودة بالجنطة مالت الملابس جان تفكيري غير جنت متوقعة يرجعوني وياهم
للبيت ماتوقعت ولو للحظة يطلعون هيج طلعة ناقصة
سودة علية اولادي هسة شنو مصيرهم يعني شنو راح يأثر عليهم لو خاليني يمهم وارضعهم فد شهر اي مو حرامات المادة الصمغية البصدري كلهة راحت هاي احجي وية روحي وابجي
يستفاد منة الطفل اول يرضع تكسبة المناعة من الامراض كعدت احاجي بروحي واشرح لروحي وهمة مويمي عبالك وحدة مخبلة
طلعت خارج المستشفى بالباب وشفت الرجال الكالت عليه المرة وركبت وياه بالسيارة
من وصلني الرجال للكراج واخذني عند صديقة
وشافني ميتة من الخوف احس بروحي تايهة بهاي الدينا موحشة
خوية لاتخافين امنتج عند ولد ثقة وكال يوصلج لحد منطقتج ترة احنا ناس عدنا غيرة وغيرتنة ماتسمح النا اختنا غريبة ومحتاجة العون ومانوكف الهة وانتي مثل الامانة
شفتة
جابلي بطلين ماي وجيس بي عصاير وكيك
الله يرضى عليك خوية ويرزقك ويدفع البلاء عنك
رحمة الله والديج خوية هذا دعاءج يسوة الدنيا يالله في امان الله
والله وتوكلت على الله
كان الطريق كلش طويل
وصلني الولد للمنطقة مالتي طبعا هو لازم ينزلني بكراج بغداد ومناك ااجر تكسي واجي هنا بس خطية انة على گلوتهم لان امانة وصلني لمنطقتي
اخ منطقتي نزلت من السيارة وجنطتي نفسه والجبة نفسه الي طلعت بيهة من بيت اهلي رجعت بيه
لكن الشخص مو نفس الشخص
جنت بقايا رسل مو رسل النشيطة الحلوة الي جانت تكطع هذا الطريق كل يوم مشي وتضحك للهوى ذيج راحت وهسة هاي مجرد حطام
جنت امشي بالطرق واتذكر ايامي
وجان الي بهذا الطريق بكل خطوة ذكرة بقيت امشي ودموعي تصب
وصلت للركن براس الفرع وتذكرت يوسف وگلبي حن لزهرة صباي عشگتة عشگ براءة بحلم امشي واتذكرت المرة ام قصي جارتنا
وعبرت على بيت صديقتي سما وتذكر شلون رحنا لعرسهة وصديقاتي هنا بيوتهن وهنا من هذا الطريق جنا نمشي انة ورفل اي وجانت مرات الدنية تمطر ونخلي جنطنا فوك روسنة ونرجع للبيت منگعات ماي ونفرش الكتب يم الصوبة حتى تجف الله يا ايامي منو يرجعلي ايامي لذاك الوكت جانت اكبر همومي شلون نقنع امي. حتى تخلينة نسهر على فلم
وصلت قريب على باب بيتنة ودكيت الباب طلعت لي مرة غريبة
اتفضلي خالة طالبة منو
خالة هذا مو بيت ام رسلً
اني احجي واحس بحلگي جف والرجلين بادن
لاخالة غلطانة احنة جدد بهذا البيت شوفي دكي هذا الباب الي بصفوي همة يعرفون صاحبة البيت
والله رحت على بيت خالي وطلعلي ابن خالي مصدوم رسل
دخلي فوتي طبي جوة
بس سمعت صوت خالي من باب الحوش
لا لا رسل ماتعتب بيتي تبقى برة البنية العاقة الي موتت امه مالهة محط رجل عندي
