غاليتي

البارت الأول

مقّــدمــة 🌹
روايــــة #غاليتي ❤

(( في سنة 2000 ))

امينة مصبيه ع الدولاب وتفتح في الخبزه : يالمٌنجي .... منججججججي

المنجي يجري يسكر في الزي ابتاع المدرسه : نعم ياامي
امينه : رد بالك من خوتك والطريق ؛ شد هنيوه في يدك وخليها تقعد في بنك قدام ماتخليش اختك لاوره نظرها ضعيف
المنجي ياكل في خبزه : حاضر ياامي توا نقولها للأبلة
امينة مدتله سندوتش : هاك حط هذا في شنطة احمد
المنجي يتأفأف : ياامي احمد كبير يعرف يحط بروحه
امينه تضحك وقرصت خدوده : معلش سلم وليدي انت الكبير واول فرحتي انت الي نعبى عليه
المنجي يضحك ويحول في ايدين امه : ياأمي بطلي عاد
هنيوه جت مسكت في قفطان امها : ياماما شن شكلها المدرسه ؟؟
امينه باستها : توا تمشي وتشوفي بروحك واديري صاحبات وتقعدي بنيتي الشاطره
احمد لابسه الزي ابتاعه و راقد في الصاله
المنجي ضربه بكراعه : نوض هيا نمشو
طلعو العيال من الباب
وامهم مصبيه اتسقد فيهم : هنيوه امسكي يد خوك .. ربي يحفظكم ياعويلتي

رجب في الصاله : اميييينه وين الشاهي
امينه سكرت الباب وخشت : هياا اني جايا صباح الخير نهارك مبروك

انا طالب في ثانيه ثانوي اسمي الٌمنجي
اليوم اول يوم في المدرسة ماشيين انا وخوتي على كرعينا
بحكم ان ماعندناش سياره وباتي موضف على قد حاله وامي ربة بيت بحكم ان باتي واعر مايخليش فيها تشتغل ولا يخلي فيها تطلع واجد مالحوش ...

هنيوه : كرعيا تعبن معش نقدر نمشي
المنجي وقف وطبس ع الارض : اركبي على ظهري
هنيوه جت صبت وراه ومسكت في ظهره رفعها المنجي واحمد شال شنطتها و كملو مشي

....................

قاعده في السياره متحمسه للمدرسه شن شكلها
من فيها زعما بندير صاحبات ؟؟
يارب انحصل الدرج الاول يارب يارب
خاطري نقعد قدام انا قصيره اكيد مش هايخلوني لاوره
بس انا خايفه نقعد بروحي بلا بابا مرات انريح

مختار يسوق : حطتلك ماما كيكه في جيب الشنطه بيش تفطري بيها ..
غاليه زعلانه : نعرف قالتلي ماما
مختار وقف السياره : هيا انزلو
فتحو خوتها #خالد و #أنس الباب ونزلو يجرو ويعيطو مع اصحابهم في المدرسه الي جنب مدرسة غاليه وهي مدرسة اولاد فقط

غاليه قلبها يدق وفتحت الباب وجا باتها خداها وماسكها من يدها وخش بيها للمدرسه

اتبحت حواليها عرم عيال يلعبو ويجرو وبنات مصبيات يلعبن وبنات يجرن و بنت تبكي احدا الشجره
غاليه عيونها دمعن بس مسحت دموعها بعد قربت من الاستاذ
مختار سلم ع الاستاذ : السلام عليكم استاذ
الاستاذ : باش مهندس كيف حالك ان شاء الله بخير
مختار يضحك : الحمدلله في نعمه والله
وشايرله على غاليه : هذي الطالبه الجديده غاليه
الاستاذ طبس سلم عليها : ماشاءالله سنه كم انتي
غاليه مسكت في سروال باتها ودست وجها من الاستاذ
الاستاذ يضحك هذا فصلها كمل طول اخر الساحه ع اليسار
مختار : صحيت بارك الله فيك

__________

المنجي مصبي مع الابله في فصل هنيوه : ياابله هي عندها ضعف نظر خليها تقعد في الاول

الابله بحتت في هنيوه : باهي قعمزي قدام هيا توا اندورو وحده عندها ضعف نظر ولا قصيره انحطوها احداك

الباب يدق

الابله : تفضل
مختار فتح الباب : السلام عليكم
الابله : وعليكم السلام تفضل
مختار مدلها غاليه : هذي بنتي طالبه معاكم جديده
غاليه تبكي : نبي ماااامااااا 😭
المٌنجي كشخ عليها : دلوعه 😡
غاليه خافت منه وقعدت تبكي : 😭😭 نبي ماااماااا
الابله خدتها من يدها : خلاص استاذ خليها وعدي توا اتعود
مختار طلع وغاليه قعدت اتصرررخ وادف في الابله
و العيال كلهم سكتو وقعدو ايبحتو
هناء استغربت : منجي نبي ماما حتى انا
المنجي قرصلها خدها : انتي شجاعه زيي مش زيها بارده بحتي كيف تبكي وجها زي الصينيين 😝
هنيوه تضحك بصوت واطي

الابله : هيا منجي على مدرستك بسرعه توا غاليه تقعد مع هناء في البنك

المنجي : اععع 😪

هناء بحتت في غاليه وابتسمت
وغاليه تبكي بالدموع
وصوت هرجة العيال قالب الفصل
الابله خبطت بصوت عالي : امنعوووو الصووووت
غاليه خافت سكتت وماسكتها العبره
هناء بصوت واطي مدتلها يدها : انا اسمي هناء وانتي ؟
غاليه تمسح في دموعها : اسمي غاليه
هناء : معش تبكي المدرسه سمحه قالتلي ماما
غاليه : بس انا انخاف انريح
هناء : حوشكم بعيد ؟
غاليه هزت راسها : لا قريب من هنا
هناء فرحت : حتى انا نسكن قريب مالمدرسه ؛ خلاص مش هاتريحي توا انخليك معايا
غاليه ابتسمت : شوفي شنطتي عليها ميمي ماوس

#بعد_مرور_شهر

الباب يدق

رجب يرتب في ملفات : يالمنجي
المنجي طالع يجري مالدار هياا جاي
فتح الباب ..
غاليه مبتسمه : وين هناء
المنجي 😑 : ماتت
امينه طلعت من المطبخ : المنجي 😡
المنجي ضحك : سامطه ياامي شن بندير
امينه فنصت فيه ومشت شور الباب : خشي ياغاليه تعالي
هنيوه تكتب في واجبها في الدار عدي توا انجيبلكن كيكه ساخنه تاكلنها
غاليه بحتت في المنجي و كشخت عليه
المنجي : حي على امهااا وحي اتكشخ 😳
وبحت في امه : هانصبي نرفسها را قوليلها معش اتحبت فيا هكي 😒
امينه اتهزب فيه : اكتب واجبك مالك ومال البنت
المنجي : لا وقت ع المحل توا الراجل الي نخدم عنده يلزني
وفتح الباب وطلع

امينه بحتت فيه وسكتت وقالت بينها وبين روحها ولدي تحمل المسؤولية قبل وقته
خش رجب : في شن اتفكري
امينه : لا غير المنجي مشى للشغل الوليد مزال صغير عالخدمه والشقاء
رجب مسك الريموت : خليه بيش يلقى روحه ويطلع راجل انا لما في عمره كنت نمشي انوزع في بضاعه لعند المرج والبيضاء كني شن صارلي
امينه تنهدت : ان شاء الله ربي يحفظه ويفرحني بيه

__________________________
هدي المقدمه بس ضاروري تقريها عشان تفهمي احداث القصه 😊😊

لا تنسو تصوتولي 🌟
مع السلاااااامه💙💙💙