قلوب على وشك الانكسار (خذلان)

بارت 11

بقلمي
الكتابه غدير الحيدري
....
الحياة مرة
بكل حالاتها..
بفرحها بحزنها وحتى بهدوئها
لكن..!!
احنه اللي نصنع لنفسنه امل جديد
امل يعانق ارواحنه
ويكون قريب منا
قررررريب لدرجة النفس
يقال
ان الايام تصقل البشر
وتعلمه دروس هواي
تنطي مواعظ وحكم
وتنطي درووووس حتى لايثق بالبشر
صعب من يحكم عليك الناس
بنظره..!
تكاد ان تكون هذي النظره خاطئه
وماالهه مكان بالصحه
وجود اب صاحب مركز جبير بين الناس
شيخ معروف يدير امور العشيره
وجود اخوه 5 واحد اقوه من الثاني
وزوجاتهم واطفالهم
عائله جبيره ومتكامله
لكن
الينقصهه امي
امي المشلوله
اللي خلصت عمرهه وهي نايمه بذاك السرير
الكل يتعاجز منهه
الا اني بنتهه
اهتم بيهه واداريهه
لأنهه الجنه ومن دونهه مااعيش
اتعب واسمع كلام موجع من زوجات اخويه
بس اكتم ع جروحي واسكت
واكول
يجي يوم واتخلص من الالم
واصير اميره بيت حبيبي
صحيت الصبح
ع صوت بابا الشيخ

حميد:ولج سهررر تعالي بويه جيبي عباتي تأخرت ع الديوان وعندي طلعه للمزرعه

كمت من نومي بسرعه
ورحت حضنته
وجبت العبايه ولبستهه اله
تماما مثل متسوي ماما من كانت قبل

سهر:باباتي من تروح للمزرعه تعال اخذني
حميد:لايبعد ابوج هناك الفلاحين ومااكدر
سهر:اووف بابا مو تدري احب المزرعه
حميد:سهيره شنو قصتج جنتي ماتطيقينهه هسه شبيج متخبله ع المزرعه
سهر:ههههه لالا ماكو شي بس مخنوكه كلنه نرفه عن نفسنه
حميد:دولي عن وجهي خاف اخذج ويخطبوج الفلاحين هههه
سهر:شيخطبون مني جني خليجيه هم جمال عراقي مابيه
حميد:خايبه شبيهم الخليج حلوين مو امج اصولهه كويتيه بس ساكنين بالعراق وانتي طلعتي ع خوالج
سهر:اذا تبقه شوي بعد ابدل واروح للمزرعه قبلك تراا
حميد:اكسر رجلج غير
سهر:بابا اذا شفت هناك ام لطيف كللهه سهر تريد خبز تنور حار اوو شكد احبه
حميد:بعيوني واليوم لاتسوون غدا اخليهه تشوي دجاجات بالتنور واجيبهه واجي
سهر:يمه فديت شيخ كلبي

طلع بابا بعد ماعطرته
وبوسته
المصبرني ع عيشتي المره
وجود امي وابويه
ماعندي خوات بس وحده ومتزوجه بالناصريه
بالسنه يلا نشوفهه مره
ونسوان اخواني كل يوم لغوه وعد عليه من صباح الله
سويت اكل لأمي
ورحت صبحت عليهه وبوستهه
اشوفهه تبتسملي
واني احس ابتسامتهه عافيه
تذكرت كرار من قرر يخطبني
اوف ياكرار تايهه بين حبك وبين اهلي
شلون اعوفهم واجي يمك
وخايفه من ولد عمي لاينهون عليه
كل هاي المخاوف بكلبي بس ضامتهه
واحسهه تختفي بحجايه منه
وحده من نسوان اخويه اسمهه مها
وهاي مها لو جهنم
كشفتني عندي علاقه بكرار
ودوم تبسمرلي
واني ساكته ومااحجي شي
اقشمرهه بالرصيد وبالشغل ومرات انطيهه فلوس او ملابس حتى تسكت
اخوتي مينجرعون
اذا درو عندي علاقه يموتوني
كعدو الجناين وتعاركو بينهم
اني مدخلت
كلهم مجلوبات وكواي
باوعت لأمي مقهوره
شربتهه مي وبستهه من راسهه وكمت
صار الضهر واحنه ماسوينه غده
ننتظر بابا
والجناين اكلو كلبي