#الياسمين8
Shahd Alsalman
صار الصبح وكالعادة ياسمين مبدلة وماخذة كتبها وتمشي على كيف حتى لا تكعدني برغم اني كل يوم كاعد واحس على حركتها اصلا دا انتظر الصبح حتة يكون اول شي اشوفة هي احس بنشاط وطاقة بمجرد ما تمر من يمي بس ما ابينلها اني كاعد
ورة مطلعت بساعة وشوية كعدت امها وشافتني محضرلها ريوك ومسوي سفرة تفتح النفس وكعدنا ناكل سوة ونسولف
- اكلج يوم صارلكم شكد بالمنطقة
- والله يمة هواية ما اتذكر بس تقريبا 9 سنوات هيج شي او اقل
- مرتاحين هنا
- اي يمة الحمدلله خوش منطقة وخوش جيرة مثل اهلنا
-اكو هنا اسواق
- اكو بس شوية تتمشى ليش محتاج شي
- اي عبالي اشتري مكينة حلاقة لازم احلق لحيتي
- ليش تشتري اني انطيك مال ياسين
- منو ياسين ؟
- ابني الله يرحمة
- الله يرحمة يا رب ما اريد اضوجج اني اشتري
-لا يمة بالعكس بعدين ياسمينة مرح تقبل تنزل مو زين عليك وخطر مشفت بارحة شون عصبت علينا اني وياك
- مو قصدها تتعصب غير خايفة علينا
- لا هي خايفة من شي ياسمين من تصير هيج معناها شي ماذيها ومخوفها بس ملحيت عليها لان ما اريدها تتعصب اكثر بس تهدى احجي وياها
- يعني عصبية دائما هي ؟
- ياسمينة مو عصبية ابد بس من هلكد ما تكتم وتخلي بكلبها تنفجر بلحظة واني اعرف اكو شي صاير وياها
من هي وصغيرة تتحمل مسؤولية وتشيل كل شي على راسها بس دائما تكون كدها وتداريني ضحت خطية علمود تبقى وقت اكثر وياية وتشتغل وتلم فلوس لعمليتي والظروف عكسها دائما
- زين هي وين تداوم اقصد دراستها
- هي تداوم معهد ادارة واقتصاد
- الله يوفقها ويخليها الج
- تسلم يمة ويكومك بالسلامة
انت اليوم شكلك احسن
- اي الحمدلله
ولو حتعبج تجيبيلي غراض الحلاقة
- اي يوم هسة اكوم
-رحم الله والديج
- ووالديك
بعد ما اخذت منها ادوات الحلاقة حسيت بيها تتاملها ومقهورة كتلها اذا يضايقج استعملها حروح واشتري والله بس لا تنقهرين كالتلي لا وفهمتني انه هي دائما تشتاق لابنها وراحت لغرفتها ترتاح
كملت حلاقة وسبحت وانطتني ام ياسمين هدوم ابنها اول مشافتني بقت مبتسمة
- تعرف شكد بيك شبه منة وشكد ذكرتني بي من لبست هدومة وحتى من حلقت
- الله يرحمة
- الله يسلمك
دكت علية ياسمينة وسالت عنك كتلها زين وسلمت عليك
- وصل خالة
هي بالدوام ؟
- اي بشغلها وبعدها تروح الدوام
- تتعب هيج
- تعودت وكتلك هي تتحمل ومن اكللها بطلي وكافي عليج دوامج تكول انام وارجع مصحصحة و اني شابة عادي اذا تعبت مو مشكلة
الله يرضى عليها
-امين ونيالج عليها
- اي والله رب العالمين عوضني بيها والله يعوضها كل خير
- ان شاء الله
اندكت الباب وفزيت اني وهي وبصوت ناصي واشارات من ايدها كالتلي اختل بغرفة ياسمين واقفلها عليك
رحت وسويت مثل مكالتلي بس قلقت كلش خفت لا احد من ذولة لاحكني وخفت لا اعرضهم لخطر او شي مو زين لا سمح الله
سمعت صوت مرية وام ياسمين ترحب بيها ووياها بنات اسمعهم يسلمون
كعدو وظلو يسولفون ويحجون ووحدة من البنات كالت اني حروح اشوف غرفة ياسمين ذيج المرة كالت عندي سيديات موسيقى ونسيت اخذهم وديقترب صوت حجيها من الباب والظاهر مدتلحك ام ياسمين عليها فتحت الباب وظلت تحرك بي كالتلها خالة مقفول الباب فجاوبتها انه ياسمين قافلتها وطالعة استغربت البنية من قفلها كالتلها خالة هي قافلتها لانه هوسة ومتريدني افوت اعزلها حتى لا اتعب رجعو كعدو بس طولو وبعد كمت ما اركز بكلامهم ..
بديت اتأمل غرفتها واشوف كتبها وميز الدراسة اقلام ملونة هواية وكمية قصاصات كاتبتهم ملاحظات مواعيد امتحانات واشياء لازم تراجعها
وانتبهت لكتب طبية ومعاجم بالانكليزي استغربت شنو طبية و هي تدرس ادارة بعدين اتذكرت موضوع جرحي ومداواتها الي ما خطر ببالي اسالها على موضوع نص دكتورة كلت من ترجع اسالها
عفت كتبها وانداريت شفت كنتورها وفراشها وميز تواليت ما بي مثل ما اعرف عن البنات عطورات ومكياجات وكريمات جانت مرة اخوية تارسة ميزها ترس من هيج شغلات بس ياسمين يا دوب شغلات بسيطة حمرة كحلة و مشط وقراصات بسيطة تقربت من الفراش وكعدت بعدني اتفرج وشفت البوم صور على طبلة قريبة منة سحبتة وكمت اكلب بي
صور لاطفال اثنين وخالة ام ياسمين واعتقد ابوهم وياهم واكلب واضحك ع الصور لان جانت عفوية وياسمين ما اتغير شكلها عن هي وطفلة نفسها و ضحكت على سنونها المكسورة ...
