حليب اسود

البارت التاسع والعشرون

مساء الخيرااات احبتـي 🌷🌷
///// البارت التاسع والعشـرون /////
#حلـــيـب_أســـود
#الكــاتبة_شـمــس

ضرغام .. اهدي حور صيري قويه لاتخلين اي كلام يضعفج بنتج ارجعها الج لو اعرف ادخل وسط بيوتهم وحريمهم اجيبها الحظنج اجيبها ..

حور .. ضرغـام خايفـة هذا مبين عليه شيطان .. اخذ بنتي مااعرف وين .. واكيد راح يبقى ينكر ..واحنه بولايتهم ومانعرف احد هنا ..

ضرغـام .. والله لو مو ولايتهم لو اعرف اجرجر حريمهم كلها للمحكمه واخليهن يعترفن . لان هذا ماعنده غير وناموس واذا اريد اوگعـة اتصرف بمثل عقلـة ..
ويلـة انتي اقفلـي الباب عليج ونامي ..والصباح رباح .
نمت وماگدرت بس اتگلب .. قيس وينك تعالي يحبيبي شوف شصار بينا من بعدك ..
اعذرنـي يروحـي ماردت بگبرك تتعذب بسببنا .. بس ابنك مايشبهك .. مايشبه طبعك وحنيتك .. انت نسمـة الكل الموجودين حولك .. وهو نقمـة وحلت علية ..

غفيت شوية .. وسمعت صوت مسرة تبجي طفرت من مكاني اريد ارضعها .. انتبهت ع المكان واني وحدي وبنتي ماكو وقيس ماكو ..
شحصلت منج يادنيا كل الي احبهم اخذتيهم منـي ..
ااااه ياربـي رحمتك ..

ضاعن سنين الفرح وجيت ادور ع السنين
لكيتهن خرزات سبحة تطشرن والدنيا طين ..
ثانـي يوم ..
گلت الضرغام ياخذني البيت قيس ..
وصلنـي يمهم وراح هو وصديقه للمركز ..

دگيت الباب طلعتلي هدى .. من شافتنـي صفنت حسيتها خجلانـة رحبت بيه ودخلتني ..

شفت ام هدى دتطبخ .. گالت هلا بريحـة الغالي ..
دموعي نزلت وگلتلها .. لعد هيج تسون بريحة الغالي تاخذون بنتي مني وتخلوني تايهة ومااعرف شأسوي .
لو قيس هنا جان صار هيج .

ام هدى .. تعاي يمه هنا اگعدي وجهج اصفر وعيونج حمر ادري بيج الليل كله گلبج ماكلج على ضناج ..
واكيد مامتريگة ..
گومي هدى سوي ريوگ المرت خالج ..
لزمت ايدها واحجي بتوسل .. كلشي مااريد انطوني بنتي وهاهي .. اترجاج خاله دليني عليها ..

ام هدى .. والله يمة ماادري انشدي هدى البارحة لعبت بي فلك لمجيدان . بس هذا ولد عاق ومايخاف ربه ..
اخذ البنيه وطلع بسرعه ماخلانه نحجي .
وحتى سعد تهاوش وياه وامجد هدده وگاله اذا صرت ضدي اخليك تندم ..

يمه امجد مايسمع الواحد راسه يابس .. حتى اني مايهابنـي ..

اخذت حسرة ..
حور .. يعني هو قابل ع روحه يدخل السجن واخوي هم داخل بسببه ..
كل هذا علمود الفلوس والطمع ..
واثنينهن يدري بيه مااسويهن . لا انطيه بيت قيس والي بي ذكرياتنا ..
ولااتزوج غير قيس ..
ام هدى .. ادري بيج بنت اصول وتحبيه .. لو ماهيج مااختارج قيس مرة ..
بس امجد ييمة اعرف طينته .. يريد يذل ابوه ويذلج ..
شلون ابوه عاف امه وخطبج ..
وبيومها تعاركوا والمرحومه تخربطت وحالتها زادت وماتت..
هو ماگدر يلوي ذراع ابوه وهو عايش ..
راد يذل ابوه ويزوجج وياخذ البيت الي جان يحلم بي ..

حور .. هذا مريض مو صاحي ..
ام هدى .. اي مريض بطمعه وجشعة ..
ومايخاف بس من خواله روحوا الخاله الجبير هو هم ابن عمي . واحجو وياه اكيد مايرضى عليه ..

باوعت الهدى .. گلتلها جنطة مسرة هنا اريدها بيها موبايلي  ..
هدى .. اخذوها وياهم ..
حور .. زين تگدرين تنطيني موبايل بس اخابر ..
انطتني هدى موبايلها .. اتصلت ع ضرغام وفهمته ..

گال هينه هسـا رايح ..
دخلت وفاء .. شافتنـي دنگت ..
حور والله مااعرف اودي وجهي عنج وين .. والله حتى حلمت ببوي يعاتبنـي وگامت تبجي ..

گمت حضنتها .. وفاء انتـي مالج دخل بسوالف اخوج ..
لاتلموين روحج ..

وفاء .. اتصلت بمرت امجد وشگد حاولت اعرف وين همه ماگالت .. تگول امجد اذا درى يموتنـي ..
حور .. زين وفاء بس خليني اسمع صوتها .. خابريها خلي تسمعني صوت بنتي ..

طلعت وفاء موبايلها واتصلت ..
حجت وياها وگالتلها خلي السماعه ع اذانها ..
وربي اول ماگلتلها ماما مسوره حبيبي .. هي ماتت من البجي .. وعبالك تعرف صوتـي ..

رجعت توسلت بمرت امجد .. گلتلها انتي هم ام تقبلين احد ياخذ ولدج ..
گالت .. اني عبد المأمور ومالي دخل . مال اطلگج اذا عرف واحد ومابيدي شي ..

غلقت الموبايل واني اختنگت من البجي ..
مسحت دموعي بعد مادخل سعد ..
كافي حور اهدي لاتخليهم يشوفوج ضعيفه ..
باوعتله بس ماسلمت ..
سعد .. شلونج ام مصطفى.  والله خجلان منج .
حور .. معقوله كلكم ماتگدرون توگفون بوجهه الكل يگول خجلان وماشفت واحد بيكم سوه شي .
هذا حبكم الابوكم ..
كان دوم يسولف بيكم ويگول ماحسيت بالابوة وحب اولادي الي ..
انتو لا هو عايش حسستوا بحبكم ولاهو ميت ..

سعد .. والله رحت الخوالي وحجيت وياهم .. وهذا ابن عم ابوي الضابط هم رحتله ..
وگال اني اشوف السالفه وارجعلك خبر ..
صاح ع وفاء وهدى . گومن اخذن ام مصطفى خلنها تسبح وترتاح وانتي احسبيها عليه وان شاء الله اليوم بالليل تبات بحضنج ..
ولاتصدگين احنه مانحب ابوي . عدنا الهوا الي نشتمه ومن مات حسينا روحنا صدگ ضايعين . صح هو جان بعيد عنه بس دايما نحس بأمان انه ابونا عايش ومن نحتاجه نلگاه يمنا ..

ماحجيت شي وياه ودخلت وي البنات . لان مابيه بعد اححي واگول ..
انطتنـي وفاء دشداشه من هدى .
دخلت سبحت وارتاحيت . جابلي غدا ..
اكلت شويه لان فعلا محتاجه قوة ..
احس جسمي تعب ومايتحمل بعد ..
#بقلمـي_الكاتبة_شمس
…………………………………… ..
اخذتلي غفـة وفزيت ع صوت هدى .. هذا الرقم الي دگيتي عليه اتصل بيج ..
فتحت خط ..
ها ضرغام بشر شسويتوا ..
ضرغام .. لاتخافين . اجو خواله وابن عمهم وضغطوا عليه يتنازل .
واحنه هم تنازلنا ..
وراح نروح البيت خالهم الجبير ونحل المشكله ..

حور .. يعنـي بنتي ترجعلي ..
ضرغام .. ان شاء الله ترجع مااجي اذا مااجيبها وياي .

حور .. ان شاء الله..  ان شاء الله.

حسيت بفرحة شويه ..
بشرت وفاء وام هدى وهدى ..

وفاء .. مدام الاخبار زينه . اروح للبيت اجيب جهالي واجي وحدهم بقوا ..
سعد .. اني رايح البيت خوالي يردوني هناك . خليني اوصلج بطريقي ..
گمت صليت ودعيت ربي .. يرجعلياها ويهدي امجد ومايعاند ..

للمغرب واني منتظره وقلقه واروح منا واجي منا .
والبنات يهدان بيه ..
حتى نجلاء موجوده اجت العصر ..
بس سلمت وگالت . والله اني من امجد ماارجعها . البنيه من لحمنا شلون ننطيها الهاي تربيها ..

حور .. يابنيه .. شتصير منج . حتى ماكلفتي نفسج تگولين اسمها لو اختي .  يعني ممعترفـة بيها بعد بأي حق ترديها ..
وبعدين انتي ماتفرقين عن اخوج نفس الطينه . حرامات انتو ولد قيس ..

نجلاء .. احترمي نفسج گاعدة ببيتنا وتغلط ..
حور .. احترِم تُحترَم ... وبعدين هذا بيت قيس يعني زوجي وابو بنتي ماگاعدة ببيت غريب .
ولاتنسين البنتي حصة بي هم ..
من گلتلها هيج شاطت وگامت تحجي وتغلط . سدت حلگها وفاء ودخلتها للغرفـة ..

ماقصدي اقهرها واحجي وياها هيج بس هي استفزتنـي وتعبت من هيج نماذج بحياتـي ..

اجو اولاد وفاء يركضون .. اجت مسره اجت .
رجف گلبي وطفرت ..

شفت سعد شايلها ودخلوا للبيت ..
اضحك وعيوني تجري ..
اخذتها منه واشمشم بيها وهي تباوعلي وتبجي ..
بوستها بكل مكان واحضن بيها ..
گال ضرغام يله حور خلينا نروح ..
سعد .. وين ابو نور الدنيا ظلمت ابقوا اليوم هنا. 
حور .. لا هسا نروح بعد ماامن ابقى هنا واني مااعرف امجد شمخبي اليه سالفه ..

وفاء .. يعني بعد مانشوفج ..
حور… بيت ابوكم مفتوح الكم هناك . بأي وقت تجون البغداد او للامام .  تجون يمي.  اذا متشيلكم الگاع اخليكم بعيونـي ..

سعد .. رحم الله والديج واعذرينا ع الي صار .
حور .. معذور بس اخوك بحياتي ماراح اسامحه.
حضنتني وفاء وبوستنـي ..
رحت بدلت ملابسي واخذت بنتي وجنطتها وطلعنا ..
وعينـي على بيت قيس .. اعذرنـي حبيبي بس هذا البيت يحرم عليه ..

شفت امجد نزل من سيارته ..
هالمرة خوالي خلصوج المرة الثانيه محد يخلصج مني .
راد يروحله ضرغام لزمتـة ..

گتله عوفـة خليه ينبح ويسكت .
اتقربت منه .. گتله حرام انت طالع من ظهر قيس . بس مااگول غير الله يراويك اللوعـة الي لوعتنـي بيها .
يجي يوم وحبوبتي تطلع بيك ان شاء الله.
راد يرفع ايده ..

لزمة واحد وياه .. گال امجد عيب مو من شيمنا هاي .
وحسيته اكلني من فوگ لجوه ..
وگالي .. اعذرينا ست حور وان شاء الله نلتقي بضروف احسن ..
حور .. مااعتقد وتركتهم ومشيت ..

صعدنا بالسيارة ومشينا .. ومسرة حاضنتني ونايمه ويمكن عيونها ماشافن النوم واني بعيده عنها ..

طلعت موبايلي من الجنطه لگيته مغلق ..
فتحته واتصلت ع ماما ..

-هلا ياامي گلبي نار عليكم واتصل عليج مغلق ليش هيج - هلاو ماما الموبايل كان بجنطه مسره وهمه الي غالقيه ..
-ضرغام گلي اخذناها . شلونها مسره زينه .
-اي ماما زينه وهياتها حاضنتني ونايمه عبالك راح انركها مرة ثانيه ..
-اااه ياامي ربي يحرمج منها ولايحرمها منج .. والله الليل كله اصلي وادعي الج وذولي اولادج بس يبجون عليكم ..
-خلصت يوم خلصت ان شاء الله وهسا راجعين بالطريق .
بوسيلي صفاوي ورضاوي وطمنيهم .
الطريق كان شطوله البغداد ..
اريد بس اوصل البيتي واحضن اولادي وانام .
تعبانه حيل ..
زياد كان داير وجهه عني ويمكن زعلان .. ماحجة ..
گتله اسفه خليتك بهيج موقف ..
زياد .. تعودت من زمن محمد . ودار وجهه للشباك ويمكن نام خطيه اكيد مانام بالسجن ..

حجيت وي ضرغام ..ضرغام صدگ شگالوا خواله عليه ..
-شگالوا الناس مارضوا ولعبوا بي جوله . وگالوله لاابوك ولاامك هيج عليمن طالع ..
وبهذلوا . بس هو كل ساعه ويطفر ويگول قشمرت ابوي واخذت البيت ..
خاله گاله .. ولك ابوك زعطوط وتقشمره مرة . قاضي ويحكم للناس شمالك ماتعرف تحجي ..

بس الي ماعجبني هذا ابن عم ابوه الضابط الي شفته واگف يمه ..
هذا گاله امجد اهدأ والي تريده يجرالك بس موهيج . رجع البنيه الامها ولكل حادث حديث ..
هو هذا الي قنعه يرجعها .

تذكرت شكله وهو يباوعلي من فوگ لجوه هو متوسط بالعمر بس ماارتاحيتله وعينه زايغه ..
يمكن هذا الي مطلگ ويريد يجبرني عليه امجد .. ماتلام مرته تركته يمكن كل يوم وي وحدة ..
ااااه واني شعليه بيهم .. المهم خلصت منهم وبعد حلم ارجع لهناك بعد ..
وصلنا بغداد ..
واني ممصدگة عبالك كنت مسافرة خارج البلد ورجعت ..
وصلت البيت اهلي تعبانه .
حضنت ماما وفروحة هناك ..
گلتلها يلـة يوم خلينا نمشي لان حيل تعبانه .

گالت ماما .. خليج اليوم هنا باتي . هسا ليل . عود باجر ونرجع ..
رادوا يسون عشا . گلتلها لا مااريد نعسانه حيل ..
فرشت وخليت جهالي بحظني ونمت . ويمكن صار هواي منايمه هيج . من التعب ماحسيت ع روحي.  للعشرة الصبح يله گعدت ..
وحتى الدوام ناسيته . اكيد هسا غيبونـي ..
تريگت وكملت اني وجهالي بدلتلهم . والغريب ايمان ابد ماأشوفها سألت ماما ..
گالت من انتي هددتيها وگلتليها اذا اشوفج جوه ابيع البيت خافت ..
وحتى رادت تعزل الفوگ عن الجوه . وتطلع درج لبرة من فوگ ..
#بقلمي_الكاتبة_شمس
……………………………… ..
حور .. ياليت والله تسوي فضل ومانشوفها ولاالقال والقيل مالتها ..
بس اولاد زياد اشتاقلهم تدرين روحي بيهم ..

لميت غراضنا وطلعت فرح وضرغام رايحين من الصبح حتى ماشكرته الضرغام .
وشما اشكرة قليل . فعلا اخو ونعم الاخ الي ..
اجرت تكسي ورحنا البيتنا ..
وصلت وتفاجأت ..
هذا شجابه لهنا ..
ماما .. شلون ياربي جا احنه نخلص من واحد يطلعنا واحد ..
نزلنا من السيارة ..
اتقرب محمد النا ..
اولادي راحوا يركضون الابوهم ..

حاسبت التكسي وراح ..
شلونج حور ..
هلا محمد خير من الصبح ..
البقيه بحياتج ..
شكرا ..
عندي حجي وياج ..
شنو الحجي الجهال وجاي تشوفهم بالموعد المحدد .
يعني راح نبقى واكفين بالشارع. .
تدري اني ارمله وماكو رجال بالبيت والافضل انه تروح .
شبيج حور همه كلمتين واذا تردين بالحديقه ماادخل جوه. احجي الي عندك محمد وروح ..
حور اني محتاجج .. اني ندمان .!!
مو اتأخرت هواي الهذا الحجي ..
محمد ..اني حسيت بفقدانج من تزوجتي ..
حسيت ضيعتج من ايدي..
صحيت ع روحي وشفت شلون خسرتج وخسرتي اولادي وبيتي .. رباب مو مثلج انتي تحبيني وكنتي تنطيني كلشي من غير ماتنطين .
رباب تاخذ ماتنطي .. حتى الاولاد طلع مايصير عندها وهي مخبيه عليه وماتگول وتگلي روح انت راجع اني مابيه شي ..
وهسا راح نتطلگ ..

حور .. هذي خصوصياتكم ومالي دخل بيها .. ويمكن عقاب الله لان ظلمتنـي وكسرتني ..

محمد .. والله اعرف الله عاقبنـي . واريد اكفر عن ذنوبي وارجع كلشي المكانه . مستعد اسوي كلشي حتى ترجعيلي . حتى بنتج اعتبرها بنتي واربيها وي ولدي .
وكل الضمانات الي ترديها اسويها اني بعدني احب ورايدج وانتي هم تحبيني نسيتي حبنا حور..
حور .. لامانسيت .. فعلا كنت احبك بس لما كنت ماشايفه رجال مثل قيس بحياتي ..
اتعلقت بيك واتحملتك وانت ماغزر بيك .
بعدك كرهت كل الرجال بس قيس خلاني احب رجل واحد بالدنيا .. ومن بعدة مااحب ولايحلالي رجال غيرة .
وهسـا لازم ادخل .وگفت وياك هواي ومالي خلگ حجي الناس ..
محمد .. حور فكري لاتستعجلين خلي اولادنا نربيهم سويه ..
حور .. مالي خلگ اضحك . وين كنت عن اولادك من تزوجت لو لمن تركتها تذكرت ..
اولادي مابحاجة اب مهمل وصاحب نزوات مثلك ..
تركتة ودخلت .. صارت عينـي ع الحديقة ابتسمت ..
حبيبي ذولي مايفهمون حبنا .. لان ماعيشين الي عشناه .. راح تبقى حبيبي .واحبك في حظورك وغيابك ..
#بقلمي_الكاتبة_شمس
يتبع…… ..