ولا تهددني برحيلك..اني ميت من عرفتك لا تخاف ،،
بابك من تسده ربك لا بد يفك ليه باب
يشهكة مستحه بزفة عرس مسجون
خذوهه الجانت بمگفاه تسد الباب
يشجرة وكاتب عليهه الكتبته عليك
بوكت يوصل خصرهه ويخجل الحطاب
مراد السيف رگبه النفس نص تابوت
دعاء الدم يأذي الغافي وسط گراب
الما ضايك لبنهه بواهس من يگود
ذبيحه ومن جدمهه يجرهه للكصاب
گلت بالريش ..بس كلهن ولا بالريش
بگلبي وچذبت من گلت ظلي انصاب
عاشرت الكرهني وجنت ازامط بيك
گلت لو عافني يتانيني وانطي اسباب
اول ما درت وجهي انته درت العين
ع اليكرهني والله وصرتو هسه احباب
وانا حته بحلم ما اعاشر الكرهوك
راعي بشوگي الك ما عندي وجه ذياب
ضوجني ..ارد اعوفك حته احس بالشوگ ،،
العشگ لوما مذلته لهسه ما ينهاب
وعاشر غيري ..وامشي گبالي..واضحك حيل
اريد احرگ بروحي بفشلتي وانعاب
وسهرني مثل ذاك البچفه يموت اخو
ود وبليل ما بي حته وجه غراب
انا استاهل لان وجه الگفه يرد روح
اذا طاري الاكرهه گبالي ما ينجاب
انا بحلگ الشمس جبت العمر بردان
بس احترگ لو گالو حبيبك ذاب
بحضن واحد بگصته چفوف اليغمون
وسطرات ورزايل من طلع لو طاب
ضميت وتعبتني واجرتلك بير
بي واهس نبي لو خوته كرهو شاب
وانه ارجع واگلك صوچ اليعزون
ما عرفوني واني بوجهي ماكو نگاب
وقروهه الفاتحه عله العرس..عل التشييع
ما ادري وبصدري حروره مال صواب
الرسايل من عفتهن يمك ادري تخون
مثل ما ادري وجهك يحله بس تراب
يالمبچيني ما تدري الحزن مو عيب؟
الجنازه التثگل عله الچتف تهوه عتاب
خذاك الجان يحلم عمره يمشي وياك
الجنت لو شفت وجهه بوجهه وتسد باب
الچنت ما منتبهله بحضنه هسه شلون
تنام الليل يالماتعرف السرداب؟
يتربيتي وتعب عمري ودمع جيلين
يواهس ضحكتي ويا گمر عيني الغاب
لتأذيني..اذيتك الغيره تريد
واحد من يحب لازم يأذي الحاب
