البارت٦
دهاليز القدر
للكاتبة
Nuha-d-h
عبرت على عملية بابا ١٣يوم وخلصت عطلة نصف السنة ورجعنا للدوام وفي يوم كنت مشغولة بالادارة اصحح دفاتر الطالبات ويمي تبارك كاعدة تكتب دخلت علينا طالبة ايدهة مجروحة وتنقط دم ترست الارضية بالدم
اني وست تبارك اخذناهة لصيدلية المدرسة طلعنا قطن وشاش ولفيناهة
تبارك-هاي شنو وكعتي
الطالبة وهي تبجي-لا هاي ست رفل ضربتني بالمسطرة الخشب والمسطرة بيهة مسمار طالع وجرح ايدي
تبارك😱-عزة العزاج رفيلة شمسوية بالابنية
زهراء-استغفر الله ادري هاي هم يسموهة معلمة
اجت المديرة ودزت على رفل بالادارة
والطالبة صارت حمرة من البجي
دخلت علينا اخت الطالبة هم طالبة عندنا بس بصف السادس
الطالبة٢-هاي منهي مسوية هيج باختي احجن كولن منهي
زهراء وتبارك صرنا صنم عبالك احنا الطالبات وهي المعلمة صار تبادل بالادوار -
الطالبة ٢-والله الا اجيب اهلي وعمامي عليكم اخليهم يفلشون المدرسة على روسكم
اخذت الابنية اخته وراحت لبيتهم بعد ما اخذت اذن من المديرة والمديرة طلبت من الفراشة توصلهن لبيتهم
المديرة رزلت رفل ذيج الرزالة الناشفة ورفل كامت تبجي
واتصلت على ابوهة واجة عليهة بالدوام واخذهة وراح
واحنا كل وحدة راحت على درسهة وست فوزية ظلت تحجي على رفل
ست فوزية-مايصير هيج تضرب الطالبة هي مو حيوان عندهة والله حرام بيهة يصيحولهة ست
يعني المعلم عندة رسالة كلش مهمة يوصلهة لتلاميذة حتى الرسول الف الصلاة والسلام عليه وصل مقام المعلم لمنزلة الرسل (كاد المعلم ان يكون رسولا )
ورة ساعة من الحادثة
مانسمعلك بس صوت رمي وصياح بباب المدرسة واني متت بدمي وطالبات صفي ظلن يعيطن ويبجن خطية من الخوف
اني بكل عقلي كلت دخلو علينا داعش ماتقبل غلط
صحت على الطالبات وكلتلهم نزلو جوة الرحلات خاف تجيهم طلقة تايهة من الشبابيك
بس عودك اني شنو اتمنى ادخل وية الطالبات جوة الرحلة من الخوف ظل الرمي نص ساعة يرشك فوك روسنة
شوية توقف الرمي وصار هدوء
وما احس الا سبع نسوان ضخمات لابسات عبي مبينات حزانة لان كلة اسود باسود لبسهم
وحدتهم تكول عبالك بات مان الرجل الوطواط
اني طلعت من الصف ردت اعرف شنو الصاير حتى بقية المعلمات طلعو من صفوفهم بعد ما توقف الرمي
اني طلبت من طالباتي محد تطلع من الصف
فرحت على الادارة اشو هذني شافني وهدن علية
اني ظليت مصنمة من الخوف وحدة بيهن سئلتني انتي المعلمة الجديدة اني انشليت ودائما مثل كل مرة بهيج موقف اصير خرسة اني بس هزيت براسي بمعنا اي اني المعلمة الجديدة
ما اشوف الا اجاني راشدي على خدي خلة اذني تصفر
واجت وحدة ثانية جرتني من حجابي وكامت العيطة
طبعا من صار الرمي وهدو علينا ست فوزية راحت اتصلت على الشيخ عمار-
عمة عمار الحكنا هدو علينا بالمدرسة زلم همة وسلاحهم ونسوانهم
عمار واني بالشغل قريب على المعمل والمعمل مو بعدة عن المدرسة
اجاني اتصال من عمتي فوزية تكول هدو علينا بالمدرسة زلم مسلحين
اني اتخبلت شلون يهدون على نسوان لوحدهم بالمدرسة
اتصلت على اولاد عمي وكلتلم يحضرون عتادهم واسلحتهم وركبت البيكم دبل قمارة السودة واخذت سلاحي الرشاشة الموجودة عندي بمكتب المعمل
احنا هنا ماخذين احتياطنا بالاسلحة لان عشاير وطلايب ماتخلص
والله اول ما وصلت طبكت. سيارات اولاد عمي واخوي محمد هم وياهم اولادنا الله يحفظهم واحدهم جنة ذيب امعط عيونهم تلمع بالهدات
نزلت واسمع صياح بباب المدرسة عاد اولاد عمي وظلو يتلاوون يتدافعون وية الرياجيل الواكفين برة وشفت من بعيد رجال داخل جوة بالادارة واني تخبلت رحت ركض. سحبت رشاشتي ودخلت عليهم بالادارة شفت وحدة ضخمة سحبت شال ابنية ما عرفتهة منو بس من انجر الشال من عليهة شفت زهراء وهي خدهة احمر وشفتهة مشكوكة وهذا العار كاعد يباوع عليهة اني ما ظل براسي عقل كمت ما اشوف ضربت الرجال على خشمة بالاخمس مال السلاح (يعني بكعب السلاح)
ووكع هو من طولة ورحت على زهراء سحبتهة من ايدهن وخليته ورة ضهري وهي خطية من خوفتهة صارت وراي ولازمة دشداشتي من ورة بوية كلبي احترك حرك والله لو ما عيب وهنة نسوان جان مثلت بيهن بس طلعت حركتي بهذا الشفية الواكف هناك
النسوان من شافني خنسن من الخوف
صحت بعالي صوتي بخشونة -اريد واحد يفهمني شنو الجاي يصير هنا
ست فوزية -عمة عمار عندنا طالبة ضربتهة معلمة بالمسطرة والمسطرة خشب بيهة بسمار من ضاربتهة جاي البسمار على ايدهة وجارح ايدهة
عمار صارن عيوني بكصتي من العصبية درت وجهي على زهراء شفتهة لابسة شالهة وتبيجي عمار بصوت يرعد -اكو معلمة تسوي سوايتج
زهراء بس ترجف مثل السعفة كلشي ماحجت بس تهز براسهة بمعنا لا لا
ست فوزية -استغفر الله ياربي حتى انت هديت على المكرودة يابة مو هي الضاربة الطالبة ترة ست رفل ضربتهة وهاي المكرودة اكلت الكتلة من هذني اصيح اريد افهمهن مو هي الي ضربت بنتكم
هنة ماكو ما يسمعن ضلن بس يعيطن
المديرة -والله اني رزلت المعلمة الي تسببت بضرب الطالبة وفصلتهة كم يوم وكتبت عليهة انقطاع كعقوبة
بس همة الله يحفظهم ما انطونة مجال انفهمهم
وحدة من النسوان -شيخنا الله وكيلك اني سئلتهة انتي المعلمة الجديدة كالت اي اني المعلمة الجديدة وبتنا كالت. المعلمة الجديدة هي الضربتني
يعني لاتلومنا ياشيخنا يعني ضاربة بنت المرحوم اخوي وهي يتيمة وخالة ايدهة تصب دم هذا ياهو اليقبلهة
عمار وهو يجر حسرة -هسة هاي المعلمة الي ضربتنهة وسيحتن دمهة وهي مالهة ذنب منو ياخذلهة حقهة بالله فهموني
يعني هم لازم يجون عمامه وابوهة ويهدون عليكم بالسلاح ويحركون بيتكم على روسكم لو شنو
حسيت
زهراء شدت على دشداشتي درت وجهي عليهة وصارت عيوني بعيونهة متت قهر شلون هيج عيون حلوة تخاف
اتمنيت اخليهة بين ظلوعي واداوي شفايفهة وخدهة المضروب
من كسر ان شاء الله للايد اللي انمدت عليهة
المرة ظلت ترجف شيخنا احنا بركبتك نرجو السموحة منك
درت وجهي على زهراء-السماح طلبو من اصحاب الحق هي الي انظلمت
