الجزء الرابع والاخير من *الغزاله والصياد*للكاتبة سناء عبد
Sanaa -abed
قصة أمل وحلم نائم أبت صاحبته إلا أن يستيقظ*
الكل ينتظر موعد اللقاء بين الغزالة والليله وأجى الموعد المنتظر .
الغزاله كيف انتظرت الموعد شلون حضرت نفسها لهذه اللحظه شلون استحضرت مشاعرها الله اعلم لكن اكيد الغزاله ايضاً كانت تحلم وتتخيل شلون الموقف راح يكون .واجى موعد اللقاء الموعود والمنتظر من ٤٥ سنه.! طبعاً اي احد مراح وي الغزاله من اولادها او راحوا وياها ما انذكرلي شيء بهذا الخصوص ولا اني سائله عنه لكن بنت اخو الغزاله تكلمتلي من موقع الحدث شافت اللقاء شلون كان بين الغزاله وامها واخوانها.
تگول طبعاً الكل منتظرها بشوق ولهفه ومحضرين البيت لاستقبالها . داخله الغزاله على امها وهذه اووووووول مره تشوفها حاضنه امها والبكاء من الجهتين طبعاً مجتمعين عليها اخوانها واطفالهم يبجون وكأنه يعرفوها وشايفيها من قبل لان الليله دائماً تحجيلهم عنها.!
والغزاله لگت امها بعد عناء طويل من البحث والشوق والقهر وطبعاً من فرط الشوق والاشتياق كانت الغزاله تروح على امها تبقى اسبوع وامها واخوانها هم يجوها يبقون عندها اسبوع .الي محيرني سبحان الله ان الغزاله عندها اخوات من ابوها وكانت تواصلهم وتروح عليهم وتحبهم كلش لكن اولاد الغزاله ما حبوهم مثل خوالهم الي من جهة الليله .!سبحان الله والى اليوم متواصلين مع خوالهم.
المهم بقت الغزاله على تواصل مع امها وإخوانها واستمروا على هذا الحال تقريباً سنه او سنه ونصف وكانت فرحة الغزالة بامها واخوانها متنوصف .
لكن تأتي الرياح بما لا تشتهي السفن ويا فرحة الما تمت على الغزالة المسكينه مگرود يا المالك بخت ومنين انجيب بخت للماعنده بخت في صباح احد الايام تستيقظ الغزاله وكانوا امها واخوانها واولادهم موجدين عندها صار وقت بعد الظهر ودعت اهلها وطلبت من بنتها الصغيره الي كان عمرها ٩ سنوات في ذلك الوقت تحضرلها الحمام اغتسلت الغزاله وتوضأت وصلت ركعتين لوجه الله تعالى ورفعت ايدها بدعاء لكن هالمره الدعاء يشوبه حزن اي نعم يشوبه حزن وحسرة وقهر ووداع .
هي كل مرة تصلي وتدعي لكن كانت دائماً الابتسامه ما تفارق وجهه ابد ابد كم مرت بيها ظروف صعبه وفقر وعوز وفراق امها لكنها كانت جباره قوية يا جبل ما يهزك ريح ومع ذلك الغزاله بقت محافظه على ابتسامتها .المهم .في ذلك اليوم الغزاله بيها شيء مو طبيعي حزن شجي يوجع الگلب مغطي كل علامات وجهه انكسار في شخصيتها القوية عيون ذبلانه دمعه حزينه محبوسه تحت جفونها عتاب شوق حنين .العجيب انه طفلتها الصغيرة بقت وياها ليش ما طلعت تلعب ما اعرف .المهم خلصت الغزاله صلاتها طلعت افترت بحديقة بيتها ومخليه ايدينها خلف ظهرها وتنظر لبيتها مره وللسماء مره ولطفلتها الصغيره مره ثم نظرت نظرة عطف ووداع الطفلتها الصغيره .وابتسمتلها ابتسامة غريبه وابتسامة الغزاله كان وراها ع بالك مثل السر حسته الطفله لان اول مره تبتسملها هيج ابتسامه وبقت هذه الابتسامة عالقه في ذهن الطفله الى اليوم وراحت الغزاله وبقى سر الابتسامه عند الغزاله .
.!دخلت الغزاله للبيت وفجأه صار الي لا على البال ولا على الخاطر .
سقطت الغزاله انهار هذا الصرح العظيم سقطت هذه الشخصيه القوية هوى هذا الجبل الشامخ اول مره توگع وهيج وگعه ضربتها جلطة دماغيه اودت بحياتها نعم مسافة الطريق للمستشفى بالطريق توفاها الله تعالى وذهبت الى رب رحيم ذهبت الى روح وريحان ورب راض غير غضبان ان شاءالله تعالى .ذهبت ولكن بريق قوتها لم ينطفى .ذهبت وَلَكِن ذكرياتها لم تذهب.
ذهبت هي والصياد لكن بذرة الاخلاق والقيم الي زرعوها في اولادهم لم تذهب بقت فيهم راحوا الصياد والغزاله لكن اورثوا لاولادهم الصيت الحلو والفخر صح الناس يجوز تورث لاولادها العزوه و المال لكن برأيي الغزاله والصياد ما اورثوه لأولادهم من اخلاق ودين وحياء وايضاً توفير الفرصه لهم في اكمال دراستهم يعادل المال وكل مكنوزات الدنيا .!ذهبت الغزاله وقد خلفت ورائها ايتام اكبرهم ٢٥ سنه واصغرهم ٤سنوات ذهبت الغزاله والصياد لكن الحياة بقت مستمرة .الحياة لا تتوقف بموت احد ولا بفراق احد ولا بأنهيار احد الحياة مستمره بينا او بغيرنه فهي مستمره لكن الحليم والذكي الي يعيشها صح ولا يستسلم لظروف الحياة الصعبة الظروف مختلفه وكل انسان عنده قصة لكن العبره كيف نوظف هذه الظروف والقصص الصالحنه.
وانطوت صفحة الغزاله والصياد وانطوت معاهم صفحات من الألم والمراره والفراق الي عاشوها وعانوها في حياتهم وَلَكِن بقوا عايشين بذاكرة اولادهم ما نسوهم ولو للحظه وحدة عايشين معاهم وارثوا حبهم في قلوب احفادهم ودائماً يتكلمون لاولادهم عن قصة اجدادهم الغزاله والصياد. ودائماً اولاد الغزاله والصياد ينتظرون اللحظه الي الله سبحانه وتعالى يجمعهم بيهم .صح الغزاله والصياد مو نجوم بالسما لكن همه نجومنا احنا منهم تعلمنه وعلى ايدينهم درسنه علمونه انه الحياة كفاح وعمل .وعلمونه ما يموت الامل . وعلمونه شلون ما نجامل احد على حساب اخلاقنه ومبادئنه. أكيد بقى تريدون تعرفون منو الغزاله ومنو الصياد كتبتلهم شعر دارمي ومن خلال هذا الدارمي راح تعرفوهم.!
الغزاله أمي ويظل عالي نجمها *بسماي
والصياد أبوي وبس اسمه محفور بگلبي*وسماي
بغياب الغزاله والصياد ظلت حزينة وظلمة الدنيا *بسماي
وبس كلمة ونظرة منهم يرجعون الروح اليه.
اتمنى عجبتكم القصة واستمتعتوا باحداثها البسيطه
نجوم #الامل *الغزاله *والصياد*
انتظروني في قصة واقعية جديدة تتكلم عن ايتام اثنان ووالدتهم والدجاجة ...#مع تحياتي #سناء عبد
YOU ARE READING
الغزالة والصياد
Short Storyالغزالة والصياد ..هي قصة حقيقة واقعية حدثت ابان اربعينيات القرن الماضي لفتاة كانت ضحية زواج الشغار فخسرت والدتها واضاعتها بسبب انانية الاهل فهل ستجد تلك الضحية والدتها أم تموت وتفارق الدنيا دون أن تراها .؟
