حين يزهر الحجر

٢٦

مساء الخير

حين يزهر الحجر
الجزء ٢٦

واني ابجي بالغرفة فات ارفد بس بسرعة طلع...
اني مسحت دموعي ..
وجاي اعدل نفسي ع المراية حتى اطلع...
فاتت رحاب بقلق..
شبيج مهرة ارفد كال جاي تبجي؟؟
رجعت نزلت دموعي..لج رحاب مشتاقة لامي اريدها...
شبكتني وكالت..
لج كلنا بالاول هيج صعب علينا بس شنسوي نتعود...

مسحي دموعج يلا وعدلي وجهج..
ترى فد شوية وتجي وجبة مال حياية وجان مفلفلات ع رجلج...
اني من حجت هيج مسحت دمعتي وكتلها...
عزا منو ذني الله ياخذهن !!
اخوات مرت مؤيد ثنين ولج وحدة بالثالث متوسط..
ووحدة يمكن ثلاثين عمرها..
بس رادت اختهن تلزك وحده منهن بيه وكم مرة يكلوله عليهم..
عزا اشو مادري اني!
مو هو ميهتم يعني معتبرها خطبة عادية ولان هم من نفس العمام ...
بس انت هسه عدلي نفسج وطلعي حتى ينضغطن...
منو ميعدل نفسه اويييلي الا اجلطهن...

طلعت ولكيت شجاع بالصالة متربع يم خالة امه الله يرجمها..
كلش تحب شجاع لان امه جانت علاقتها قوية بيها...
هم بالارض كاعدين...
والبقية شي كاعدين ع القنفات وشي وبالارض..
صاحت عليه تعاي جدة يمي وطبطبت بيدها بالارض...
رحت كعدت يمها ..
شجاع يباوع ومبتسم ...
هي باوعتلي وكالت...شلونج جدة خو ما مالومة !
شوي ركزت عرفت قصدها موجوعة يعني...
كتلها لا الحمدلله ..
عساج انشالله..ربي يرزقكم بوليد يترس حضنكم...

كلها شجاع ..انشالله بيبي وتشيلي بيدج وانت التسمي...
هي نصت صوتها وحجت..
بيبي ماعلمج اني بس اريدج تستفادين..
واريد افرح بفريخ لشجاع لني اعرفه يحب الجهال..
تدني مني بعد ..
وانت شجاع تدنى ..
مدينا راسنا ثنينا والبقية يكولون ها بيبي فليحة دخلت العرسان باجتماع مغلق...
هي كالت انجبو خفى هالحلك..

ورجعت حجت ويانا...
شوفو يمه تردون خلفة من اول نوبة لازم تسوون فوكة فوكة..
اني نطيت بوجه شجاع مصدومة وحصرتني الضحكة...
هو اشرلي بعيونه بمعنى انتبهي الها ...
وهي كالت شوف يمه انت ماحاجة اعلمك بعد زلمة حوك وسيف مجرب..
وتعرف سالفة المخدة ورا الظهر بعد ..

بس انت مهرة بنيتي من يفكج ضلي على حطتج لا تنهضين ...
عزا اني بقيت اسحب الوان..
كتلها ها بيبي انشالله انشالله ..
انت بس ادعيلنا...
وهذا شجاع بس مبتسم وشامت بية لان منحرجة...

بقت تسولف وياي كالت انت ماتعرفيني..
كتلها لا بيبي اعرفج يحجي بيج شجاع دائما...
بس يكول متقبلين تجين هنا هواي..
اي يمه بعد المرض والسوفان والحيل رايح...
وهالفرخة رحاب ملتهية بابنها وشوفيها تلهط بالمطبخ وي ذيج مرت حماها..
لا بيبي بعد تعاي واني موجودة واحطج بعيوني...
الله يسلم عويناتج حبيبة مرت الغالي ...

واني احجي اندك الجرس ورا شوية صاحو عليه اجو اهلي...
طفرت بسرعة للاستقبال...
امي وورد وزهرة وصبا  ...
حضنت امي وماريد اتركها ..
كوة شلعتني ورد وشبكتني وياها زهرة وصبا...
احس مفاركتهم صارلي عمر مو يوم....
بعدها كعدت وامي تتطمن والبنات يسالن...
فاتت رحاب جابت ضيافة ..
وجت مرت ابو شجاع و..
بيبي فليحة جايبها شجاع...
بقو شوية يسولفون وشجاع طلع...