عوجات فمها و غمضات عينيها بيأس و بكبرياء مجروح ...ضحك زياد حيت وصل ليها الميساج وقال ممازح :"" خودي الفلوس من عند ماماك ...و باباك ماتقلقيش منو راه ماباغي غير مصلاحتك .. و الى ماضربتيش على راسك من دابا غايسالي بيك الطريق كاتربي الدراري وكل شوية تطلبي فلوس التقدية و فلوس الحمام و الى طحتي فشي زقرام غايعطيهم ليك بالشحيف و بالنغير ... اما الطريق الاخرى غاتبقاي تدوري من خدمة للاخرى و مافيهم غير تماارة و الشقا لي ماكاتحمليهش و لي بووص لي يظلو ينقصو من خدامينهم بحال الى كايخلصهم بالدوفيز .. ياله تخيري اشمن حل اهون ليك ؟""
شافت فيه عاقدة حواجبها و قالت :"" انا ماغاديش نولي هكا .. ""
تبسم و قال :"" عارف .. عارفك واخا كسولة و لكن ذكية .. غير هو ماتضيعيش الوقت .. مهم دابا هاكي ها هما لي طلبتي و حاولي تنقصي الخسران و اقتاصدي و رحمي خوك راك قهرتيني اختي .. شوفي البيت عامر شراوط و عامر تخربيق فين غاتزيدي مزال .. "
شافت فيه و قالت :"" وا ايدي متقوبة اش غاندير ... "
شاف فيها بعتاب و قال :"" الى متقوبة عمريها ... و لا غانحيد عطيان الفلوس و غاتولي تطلبي اشنو خاصك انا نجيبو ""
جاوبتو قائلة :" اويلي ماشي لديك الدرجة ""
ضيق عينيه :"" اوى هاني علمتك .. ياله نوضي تعشاي .. ""
تبسمات و عنقاتو :"" كنمووت عليك اخوويا ""
بادلها العناق مربت على كتفها ، بعدها لقدامو و شاف فيها :"" كنتي غاتنعسي بلي لونتي تاني .. شحال من مرة كانقول ليك تدخلي للدار فالعشية حيديهم ... خلي عينيك يتنفسو شوية .. ""
ناضت جلسات و قرمات بصباعها على العدسة جبداتها و دارتها فبواطتها جنب سريرها و جبدات الاخرى حتى هي .. غمضات عينيها .. حلاتها و شافت فخوها .. تبسم كايتطلع ليها و قال :"" و هاد الجويهرات شحال غزالات ""
تبسمات و قالت :" واش بالصح زوينين ؟ انا كايجيوني فشكل و كايخلعو ""
غوبش باستغراب و قال :"" علاش كايخلعو .. عيونك ما شاء الله ماكاينش بحالهم .. هاد الصفاء فيهم عاطيك واحد الجاذبية ماكاينة فحتى وحدة .. دايرين بحال بحر المالديف ... فيروزي صافي كايبري ... ""
جاوباتو مستغربة متسائلة:"" و لكن علاش انا دايرة هكا اخويا ؟علاش انا ماشي بحالكم شهبة عادية و عيوني زرقين بحالكم ؟""
دور وجهو مضيق عينيه بغموض و رجع شاف فيها وهو يقول :"" شحال من مرة شرحت ليك بلي عندك طفرة فالجينات ديالك .. ماعندكش الميلانين لي مسؤول على الصبغة لي فينا حنا .. داكشي علاش شعرك و عينيك و جلدك هكاك .. ""
دور وجهو كايعض على شفايفو .. عارفها غاتبدا فسلسلة ديال الاسئلة ديالها لي ماكيساليوش .
أنت تقرأ
▪ آلاء و المنحوس | مكتملة
Romance🔹الجزء الأول من سلسلة : أسياد فوق الطبيعة 🔹 🔸سحر اسود و واقع بمزيج خيال ... فاش كانت آلاء كاتكبر قدامو .. ماكان زين العابدين كايشوف فيها غير بنت مدللة .. طايشة و قليلة الادب .. و ماكانت عندو حتى فكرة عن حقيقتها ..شكون هي ؟و اشنو كاتملك ؟ كانت كا...
