عشق البدوي

27

عشق البدوي
27

بيومها ركاد جان حيل ضايج على شووگ حجي عمي ياسر مامبرد گلبه الظاهر
لأن كال عمج ماعنده عذر
يكول وديتها ترتاح
الحاله الي هي جت فيها ادل على راحة ؟
يجي بكرا ويصير خير
بيومها شوك للصبح مانامت تبجي تركتها وحدها ترتاح
ثاني يوم الصبح گالت
حته اتصال مااتصل عليه ولا بررلي اذا هوه صدك رايدني ارتاح ليش مافهمني
ضجت عليها وضجت من تصرف عمي شبي هيج هاي عود هوه العاقل صدگ جذب لو اني مو يمهم ماأصدك هذا سبب
ركاد بيومها طلع الشغله ورجع الضهر صاح شووگ گالها
..الحگيني الوحدك
رغم مامحلني ذنب بس اتحسست من الموضوع لان اني فعلا طرف صح مالي علاقة بالسواه بس حيل اخجلت مهما يكون همه اهلي
بقوو ساعه وحدهم طلع ركاد كال عمج جاي حضريله ضيافه
صدگ شويه ودخل عمي ياسر عاگد حاجبه ومبيين تعبان الظاهر هوه هم سهران
الموضوع حساس ماگدرت ابقى وعمي سلمت عليه وطلعت عينه ع الباب ابالة تدخل بس هيه اصلا مااهتمت لو ادري ع شنوو اتفقوو ركاد وشوك جان ارتاحيت لان جانت حيل مرتاحه
بقيت يم الباب اريد افهم
ركاد سأل
..مولاي اريد اعرف شو سبب طردك الشووگ
..ماطردتها ردتها ترتاح
..انا جدامك صريح واعرفك انت مثل طبعي خلنه من المراوغ
ماكو شي يسموه ترتاح..  المره مالها الا بيت رجالها
يسندها ويوگف معها متى صارو الاهل راحة للحرمة
الاهل يربون يتعبون ويعطون ويبون يشوفون ارباهم
ان كان عدل حمدو الله وشكروه وان كان بي عوج اعدلوو
كولي عوجنه وين وشو  لنعدلوو
سالفة وديتها ترتاح ماتمشي عندي انا حرمتي راحتها جنبي لون جنبي ماترتاح اجل من يريحها
ومن يعرف من شو تشكي غيرك
انت الي خابرها عدل
گولي عوجنا لنعدلوو وان مافي عووج
العووج فغيرها اذا كان في غيرها
ماترد بنتنا الا لما ينعدل هوو
شفتوو عيونو نطت يبا يتكلم. اشرتلوو خلني اكمل
انا ماكعدت معاك ولا تكلمت بحس عالي الا وانا خابر اختي ماتطلع منها العيبه
ولو اطلعت حگك تاخذه مثلث.
هساع سمعنّي
ياسر..
حيل ارتبكت لان اني غلطت غلطة عمري هيه هاي الخطوة ماادري شگالي عقلي من كتلها روحي بس جنت خايف عليها خفت اذيها فقدت اعصابي من كمية المشاكل كل مااجي تصير مشاكل لاهية الي تسكت ولاذيج الي تگعد تريد تطلع لو احنه نطلع زين رجلها مايكدر الطلعه مايسمحله ظرفه

اني مااكدر اطلعها محد يبقه يمها جان اتزوجت ابيت من البداية
والوكت يخوف وهيه شابه حلوه وع نياتها هم اخاف عليها من الناس
بس اني غلطت المفروض اني اطلع وارجع واحل الامور ردتها تطلع حته احاجي احمد وامي واشوف حل بعيد عنها خاف يلوحها مني شي بوكت عصبيتي اعرف نفسي مااسيطر ع اعصابي
والموضوع الحجت بي جرحني بس اعرفها بس السان الضوجني ميادة جانت تباوع وشافتني من فتت وسمعتها  تكلها تقصدين السبب من ياسر
وكتها ردت اكلب البيت بس مااريد اخسر اخوي وحته لو غلطت هوه الي يحاسبها اني مالي سلطه عليها
الي عقد الامور علية اخوها
منين مااجي يطلعلي اني عود كتلها لترحين الاهلج روحي البيت اخوج عبالي لأن نسيب وراح يفهمني ويسهل اموري بالرجعه وخلص الظاهر مصعبها السالفه
كال سمعنّي
كتله
..اختك بنت اوادم واصيله وماعدها اي غلطه ابد الغلط بيه يمكن حملتها ذنب مو ذنبها وصارت بعد
بس اني هم ردتها ترتاح الله يشهد
..بوو عمار خلينه فاهمين على بعض
انت طردتا لاتگلي ترتاح گتلك ماكو راحه الحرمه غير بيتا وزوجا
گولي حرمتي تحت يدي وطلعت گهرتي فيها
گولي حرمتي مالها ذنب ذنبها اتحملت كلام زايد شغل زايد
ملامه منك بعد فوگ ماتخلص مغثتها من حرمة اخوك تعگب عليها انت اتحملي واهدي
هذا كلوو مايصرفلي انت اخ غالي وعزيز ع گلبي الله يشهد وگفتك ماناسيها
والا والله والله مانامت عيني ليلة البارحه وتمنيتك ماواكفلي يوم لنشف دموعها بعلومك
..ركاد لاتهدد
..حنا مانهدد انفذ ومانگول نفعل ..انا گلت لو غيرك..  للاسف الجميل ماننساه وانا مكتف بجميلك ذاك
..الحل شنوو مرتي رايدها
..بهذا الوضع مالها ردة
..ركاد لاتصعب الامور خلينه نتفاهم
..وانا والله جالس اتفاهم ومفضيلك خلگي ع الاخر انا يوم عطيتك اختي لاتصدگ ارضالا تكون بدل
ولاتصدگ ابني سعادتي ع احسابا
انا عطيتا لك وانا مغمض عيوني اعرفك رجل ابن رجال ماينخاف عليها يمك ولساع ع رايي
بس انت رجال تعز هلك وماتبا تخسر هلك
لاكن عادي تخسرها
..مو هيج الحجي ركاد شلون اخسرها
..خلني اكمل ..لاعادي تخسرها يوم طلعت من بيتك وعيونا تدمع ومااهتميت وظليت ماسك ارضك وجالس في بيتك شو معناه معناه انت مفضل اهلك عليها ومستعد تخسرها لجلهم
..شلون يعني انطي باهلي
..لا تعطي باهلك الدنيا ماهي اسود وابيض والمافي خير لهلوو مافي خير الحد
في حلول تكدر ترضي الاثنين وانت اخترت الطريك الاسهل ترضي اهلك ع احساب حرمتك
حته يگولون ماطخ الحرمتتوو صح والا لا
ماتعرف ان الاهل مسؤلين من بعضهم
بس حرمتك مسؤولة منك انت وحدك جدام الله وخلگه
..ركاد اني كاعد وياك وهادئ ولو مااعترف بروحي غلطان مااسمع منك هالگد تره هواي دست بكلامك انت ماكاعد بكلبي وتعرف الاقصده
..في قانون عنا مظمونو يگول العايل شايل
يعني انت لو ماتعرف روحك غلطان ماكعدت تسمع مني ولا ترضا بكلمه حته بس انت تعرف البيه
بنت اخوك عندي روح اسألها
اذا يوم واحد عطيت فيها والا هنتا والا علا صوتي عليها
معززها مكرمها حافظ كرامتها بغيابها وبحظورها
وماارضا لخويتي اگل من معاملتي مع حرمتي
من الاخر
شووگ ماترجع الا وانت شايف حل الكل شي في بيتك
مو من حكي ادخل واملي عليك شروط كيف تتصرف بس انا ابا نتيحه وخلص
..عكدت حاجبي متعجب كل هالكلام واني متمحل وماكو شوك ماترجع
كتله شنو النتيجه مثل شنوو
گلي بشروطك
..مااشرط عليك غير حفظ كرامتها ترجع عزيزه بدل ماطلعت مذلولة
شغل البيت ماتگوم فيه وحدها لو بس الحجية في بيتكم مالها حگ تشكي
هي حرمه ومعاها حرمه كلمن اتعرف شغلا
ماحد احسن من احد
..سحبت نفس قوي كوه جاي اتمالك اعصابي المشكله يحجي بهدوء مامنطي ع نفسه لزمة وكلامه منطقي حاصرني
كتله هنه شغلهن مقسم بس البنيه مرت حماها حامل ومريضه وماكدرت بهاي الفترة
..كتلك انا مااتدخل بس اخوك عندوو اربع عيال اسمعت
كنتو تجيبولها خادمة  گبل ؟
سوالف الحريم هاي انا خابرها
شووگ ماترجع معاها البيت واحد
تبي مرتك جهز بيتك وتاخذها من اعيوني
وخلها ترجع الدوامها ماكاعد تفهم من محاظرات وبس،
..يعني هسه ماترجع
..حرمتك لك كل وكت بس لما ترتاح وتخلگ لها أجواء الراحه انت..  راحتها مسؤوليتك
انت اتصرف واذا عطيتني ظمان برجعتها ماترجع مشاكل واهم في بيت واحد انا اگولك خذها
وتاخذها من عيوني والحين بعد بس عطني ظمان.
..هذا هوو حقك اتصرف والله كريم
طلعت بس صاير نار
حيل ضجت منه بس الصراحه بكلشي يگوله ماغلطان
رحت للبيت حاجتني امي وسالتني احمد كاعد كتلها بشروطهم شفته نصه راسه من. البارحه هوه وده مرته الاهلها بس مايطول يرجعها ويمكم هوه منتظرني ارجع شووك ويرجعها بس من شافني مامرجعها وكتلهم اخوها ماقبل وشاكيتله كلشي وكل المشاكل الصارت حته ع الشغل وكال ماارجعها الا شايفلك حل
شفت احمد دنك خجلان وجهاله عايفتهم ورايحه
متأكد يريدها ترجع
كالت امي وهسه شنو الحل
..ماكو حل هسه ماادري حلها نستقل ابيت
..تعوفني يمه ياسر صدك عود
..لو الله يهديج يمه وتسهلينها علية وانتي اطلعين وياي تعبت اريد استقر زواج انجبرت عليه ولمن حله بعيني وعجبتني حياتي من اجي تنخلقلي الف مشكلة
..يممه ولا اطلع اعوف بيتي واطلع ليش يمه واته هذا مجاني مااعرفه اتذكر بي قراية اخوك من يكعد ويمه الفانوس حته يشوف
لو ابوك لو شبابي وبيتي شلون تكول هيج
..حلها شنو كليلي
..حلها انه اروح ارضيها وترجع والمشاكل تصير
..اخوها  مو سهل يمه  وحيل ضايج حقه هوه مامقصر وي مرام حته نلومه لو نكول ماله حق
كال ماترجع الا وكلشي محلول
وهاي كدام احمد مرته اني شكم مره حاجيتها وماكو فايده
مايرهمن ابيت ومرتي هم مر خيره ادري ترادد بس ماتعيل
شكد ردت اجنب روحي هالطلايب بس طحت بيها
وانتي هم الله يهديج شفتيها تسكت تتحمل مثل البردتي بعدين ماوكفتي وياها مو مثل اول شفتيني اني ضاغط عليها وكلتي تتحمل
هذا هوو خلو كلشي مثل ماهوه خلوها ترتاح وانه افكر اشوفلي حل بس بعد لحد يجيبلي سيرة هالموضوع ابد
..جا شوكت ناوي ترجعها
..ماادري بشنو ارجعها شسويت هسه اني
…… ..
مرام اول ثاني يوم ركاد كال العمي واجه عمي شافها وجراح وامها
انخبصوو واني اطرافي ترجف من الموقف
احس نظراتهم كافي الي ماادري اني اخذ ع روحي
عمي گلها مدام الولد لاغالط عليج لاطاگج
تصير المشاكل بس مال تخدمين طول الوكتووتنظفين حته غرفة حماج وحرمتوو هاي مانرضاها مامعطيهم خدم حنا
بناتنا بنات عز اذا كان عندنا او عند رجولهن
يحاجيها وهيه تبجي اخذها الحضنه باسها وامها هم كالولها تعاي ويانه راحت شوك
بقيت متوترة اليوم كلة حته ركاد مااباوع بوجهه
جنت ارتب بالجربايه بكنتوري اعلك ملابسي مال الدوام جنت كاويتهن وره ماجهزت ملابسة
حسيت ايديه حاوطت خصري
غمضت عيوني فرحه برهبه شي غريب خايفه يحملني مسؤولية. واخاف المشاكل تأثر عليه
اتذكرت ولد عم امي اتزوجو كصه بكصه وهاي كل ماوحده زعلت الثانيه يطردها رجلها
غنضت عيوني حسيت انفاسه ع رگبتي تنفست براحه وعيوني مغمضه
همسلي بصوت كله حنيه
..فديت انفاس حوريتي توو يلله حسيتك انتي
ليه يالحبيبه متضايگه واحسك خايفه
دارني عليه وباوعلي
..شو الي مخوفك يالعمر
..خفت من المشاكل خفت اروح بالرجلين بس والله اني وي شوك اصلا عني غلطان
..تخافي مني بعدك مو عارفه حبي لك ولا عارفه اني اهد الدنيا واهلها ومالها لجز نظرة عيونك وانتي مبتسمه
عوفك من كل شي وخليك معاي
اخذني الحضنه وهدأ خوفي وحسيت بحبه اكثر
....
مرام
جاي ارضع ابنتي الي متعبتني وحارمتني النوم اني وابوها رغم ياخذها عني الفجر حته الحك انام قبل الدوام يساعدني بيها
منتظرة هالايام تصير احسن لان الطبيب كال ٦ اشهر ويروح المغص الولادي منها
وعدنه خطار خوات ركاد تلاثتهن
منتظره الاكل يتهدر وانوم بنتي واروح يمهن
نامت ورحت اطفي النار عن الاكل
واسمع عذاري تكلهن
..انتن غشيمات ماتفهمن امي شافتها تتگرب السجاد وكالت الركاد وشيلها لانو مالو ثقه فيها
ماتشوفن حارمها طبت بيتنه وحته اخوياي مايخليهم يوصلون بيتوو ولو رادو يشوفونه ويشوفون بنته ياخذها ويروح لهم
سمعتهم واتخبلت
سهله ركاد
انت ع حجايه من عمي بساعة عصبيه شهرين مخلي شوك ابيتك واني هيج يشوفوني اهلك من وراك وصدك هوه يشوفني هيج
اتذكرت من اجه عمي ياسر مرتين وركاد اصر على ظمان الراحتها وعمي يوميه يعارك شوك يريدها وهيه صارت تريده بس ركاد اصر انو يحل مشاكله وشرط الاستقلال اهمهن
عاد عمي وره شهر يلله قرر يبني بالحديقه مال بيت جدوو  وبنيانه طوول شهر لان بس باجازته يشتغل بقت شهرين شوك يلله رجعت العمي بس بعديش بعد ما يوميه هوه وياها يوم خلصها غزل يوم عرك
زعل اول اتصال بيها كوه جاوبت وهوهرخلصها عتب شلرةون هيج تحرميني
والثلة ظلت تتعذر
ومن سدته ظلت تلطم نسيت هوهرالسبب مو اني
يعني هيه مسامحته وركاد طلع روحي عمي
واحد وضربني براسي
وصرت اعيد ذاكرتي والمواقف
ترضا ع اختك هاي الحجايه انت
سويت نفسك ماكو منك وانت سامع كل هذا ومثبت التهمه عليه
هذا حبك طلع جذب اكول يربي. ليش بس اني حارمني الروحه الهم
ليش مايخليني اروح اني مامعاركتهم
يارب بس قويني اصبر لمن يروحن يلله احاجي حته اطلع كل الي بكلبي
ظليت اعيد المواقف عفت بنني النامت وكمت للمطبخ اكمل شغلي
نزلت دموعي واني اثرم البصل اجت شووگ
خليتها تعارك عذاري هيه وهند
سالتني بشك كتلها من البصل
اتذكرت شوك من جانت زعلانه يمنه
اجت متخبله من مهرة كاعده يمهم طول الوكت واهلها مسافرين الاخوها الي بالخارج ومخلينها يم عمتي
بوكتها ضجت من عرفت بكعدتها وسويتلي سالفة وي ركاد ومثل كل مرة باسلوبه قشمرني
يكلي وانتي عندج عكل وتغارين من مهرة هي عيوني تشوف غيرج والا هالكلب الي مايخفگ بس لچ
تنهد واخذني بحضنه
..يبنت انا حبيتج لو ابتليت
والله شليف جثير يعشكون وياخذون الي يحبونها
ويرتاحون. ويعيشون عادي مافيه فرط محبه
الي وياج ماهوو حب انا عندي فرط باحساسي معاكي يعني احساس ماهو معكول
ليه انتي يمي واشتاكلك ليه اجيك من الباب ملهوف
انتي مثلي والا لا
خلك من زفته وكوليلي
..نسيت كلشي واخذته بحضني مثلك واكثر
بوكتها نسيت الزعل والعتب وكلشي
اني هذي تاليتي تربية اهلي وتعبهم وي سجاد انوب شكد ميستحن
شووك حسيتها جايه تراقبني شافتني مشغوله ورجعت الهن فضولي خلاني اتبعها
سمعتها تكل العذاري
..قسما بالله ياعذاري الا هذا الموضوع والله والله تتندمين عمرج كله لو طلعت الحجايه
ولج انوب ع اخواتي ليش مو صوجج صوج ركاد اذا صدك
صبيتلهن الغده توسلت بيه اكل  كتلهن ماريد الف عافيه
وعيني ع ركاد الي كرهته عمري مامتخيله اشوفك بهاي النظرة
كال كولي
..اشرتله مااريد يريد يفهم مني سمعت
مريومه كعدت
سوتلي فرج اخذتها وبداحلي اگول عفيه قوة
ماتاخرن وره الغدة راحن
هوه وصلهن ورجع صاحني يريد ينام
كتله تعال ركاد خلينه نحجي
بس شنوو سيطرت والرجفه ع صوتي هوه ارتبك من شافني
انت ليش طلعتني من بيت اهلك
ركاد اني هاي تاليها اني اطلع وحدة أدب سز اتحرش بأخوك لك ليش لك شلون ساكت
..مرام بلا حس عالي عيب منا عالم والسانك هذا احفظي شو لزمة. هالكلام
..صح هذا الحجي
..انسي الموضوع خلي يولي
..انهاريت ودموعي نزلت
صح هذا الحجي
..ماعليك من الكلام العليك انتي شو عندي
..لطمت وحهي بقهر اول مرة احس روحي اتخبلت
هيه هاي المشكله اني شنو عندك
اني اريد اسألك اني شنو عندك
..انتي دنيتي كلها الله يشهد بس اهدي وخليني اكلمج
مين الي كالج كيف وصلتلج السالفه
..ركاد اني اكتشفت روحي ماكو اغبه مني لك مافاهتمك مافهمت اهلك
سويتلك عركه وهمية. وطلعت بيه لان مصدك كلام امك
صاح بصوت ووكف يريد يسكتني عيونه حمر من العصبيه
..شوو مصدك كلام امي واخليج ع ذمتي لو كنت مصدك شفيج انت
..لك اي مصدگ حارمني من طبة بيتهم وانت وياهم صلح
اخوتك يجون وتطلعلهن لك وبعد وبعد ذكرياتك كلها مرت عليه مالها غير تفسير
..انتي انهبلتي بالله العظيم .. اذا كنت شاكك في اخلاقك اطلعك ابيت وحدك
بس كوليلي منو الي كال هالكلام
..بجيت بقوة لك انت شاك مو شاك ثبتت التهمه عليه بتصرفاتك هذي لك الكل تدري بيه وعبالهم صح مستغله غيابك
لطمت وجهي والنبي لو دروو اهلي تحلم. تشوف اضفري
وحته بنتي يحرموني منها
حضنتها وبجيت بقوة قرب عليه
كال والله جنبتك المشاكل كل هذا حته اجنبك المشاكل وماخليتك ترحين اعرفهن يكيدلك من جديد وانا كل وكت يمج واحميج
..انت دمرتني ماحميتني دمرتني الحجي اذا طلع اني انتهي
انت مصدك. حجيهن والدليل حته بعد ما جبت اتوسلت اروح وياك ماقبلت واخذت البنية وهيه بنت انفاس
شكد مريض انت
من حاجيته هيج تحولن نظراته من عطف الى عصبية وقهر
..چب ولا كلمه اششش اياج اسمع منج صرتي تخربطين لهان وكافي هذ حدج والا السانج اكصوو
رنا لو شاك فيج اخليج جنبي يالغبيه اصحي عاد
..اني صاحيه انت اصحه اصحه عيب عليك حته اخوانك محرم عليهم بيتك اني ماتامن بيه صاير تراقبني وبعدتني
اخوانك يستاهلون من تشك بيهم ولك سجاد يفديك بعمرة شلون تشك بي
انت مصدك اعرض نفسي عليه شنوو اتخيلك كدرت اغري وانطه… ..اريد اكمل واكله انطه بيك
بيدة تليفونه عيونه صارت نار جان يريد يخابر
شمر التليفون بقوته عليه
..كافي..  چب
لاتحچين سكتي
..الضربه اجت ع صدري احس شاغت روحي من الألم
گتله والله ماابقالك بعد
..جربي تطلعين والله والله لخليك تشوفين النجوم بعز الضهر اصبريلي  ويصيرلك خير يامرام
اشوف شغلي معاهن وراجعلك وانا احاسبك ع هالكلام
..تحاسبني اني فوكاها لك بسببك صرت حجايه بلسان العالم
..اكص السان كلمن يتطارل بكلمة واولهن السانك
واذا لكيتك رايحه بيت اهلك
اذا گبل اخذت الكفن ورحت بيت اهلج
هالنوبة البسكياه وادفنك هنا وجدك محمد
ماخدا يوكف بوجهي لاتكبريها زيادة
تره بعدك انتي ماتعرفيني عدل والله
كلشي منك يطلع اسامح عليه الا هالكلام
انتي تعلميني العيب لا وبعد بعلوو صوتك تكوليلي كدرت اغري انا شاك فيكي تكدرين تغرين..
واخليك صاحيه وخشمك يشم الهوا
كل هذا من خوفي عليك
مع الاسف ماتستاهلين حبي انا اخاف عليك من ضيكة الخلگ شوفي تفكيرك معي وين وشو گلتي
كل الي ساويتوو ماجاي في عينك مامبينلك صدگ نيتي معاج
..شمسويلي انت متكلي شمسويلي
حجيتها واني ميته قهر اتذكرت سوالف مرام وامه وعذاري وكلهن واخرهن هالمصيبه هاي
..مامسوي شي هذا هوو
بس اذا طلعني لخلي راسك بالوحل والله
ماتطلعين من هالبيت الا بمزاجي
وانتي الي خسرتي بكلامك هذ.
ركع الباب بقوة وطلع
ظليت للعصر وهوه مو راجع لميت هدومي كلها
بس متاكده اذا اطلع وعرفو السبب ماكو رجعه بعد
واخاف حته بنتي يحرموني منها
واخاف منه ينفذ تهديده وهذا يسويها والله
بجت مريومه رحت احضرلها ممه رفعت ايدي صدري
وحعني حيل
تلمست المكان ارعبت من الكتله الي لمستها
فتحت الدگم اشوفه
فحصته والخوف اتسلل الگلبي
يمكن من الضربه تروح ماتبقى

يتبع ..

……… مقتطفات
شووگ ..
رحت بيت اهلي واني صايره نار وعذاري تنافخ ماقابله لان دافعنه المنار دفعت الباب وحايرة اسكت لو كل الامي
هند قنعتني اسكت
بقينه جوه ردت اكوم من يمهن اخابر الحب
واكله بشكوكي هالمرة. يمكن يطلع صح
حسيت ع صوت عالي وبيتنه انكلب صياح وهسه المطبخ احسه مابقه شي سليم
طلعت وصار بوجهي ركاد
مثل الاسد الغاضب يدمر كلشي كدامه
اول مرة. نشوفه هيج
اتصلت امي بجراح
…
سجاد
الموقف الي صار وعرفته بعدين مااثر ع خوتنه اعرف ركاد واعرف قصده والي سواه صح
جنت جوه وفكري يم زوجة ابوي وين تريد توصل بهاي مشاكلها
اندفع الباب وفات ركاد
تعبان يجر التفس كوه ورجل تتقدم وترجع
جر نفس عبالك مخنوك دخل وبالي يمه
اليوم. هوه بالناصريه عنده مراجعه الاهله
فرحت من كال الصبح ماخذها للطبيبه معناها اتصالحوو
ربكتني حالته تقدمتله وسألته
..ركاد شفيك
اتعداني ودخل للبيت فتت وراه
امه كاعده بالصالة والكل مجتنعين ماعدا امي الي زعلت ع ام ركاد من سمعت بالحجايه
وابوي طرد مهرة وكلها خل يجون اهلها لو انتي ترحين وياهم مالها ظله
لس راحت الخالتها الثانيه من سمعت كلام ابري واني اصلا ماارتاحلها ارتاحيت من طلعت
فات ركاد بدون مايسلم نزل يم رجل امه
دنك عليها باسها
انصدمنه من الموقف همه متزاعلين وجان يتهدد
بصوت تعبان اترجاها ودموعه نزلت
..سحبي دعاويك يايمة كولي الله يريحوو لو تكولين الله بياخذ عمروو كولي الله يطير رزكوو بس لا راحتي ييمه لاتمتحنيني فيها
بموت انا والله
والي يسلمج سحبي دعاويك عني
… .

يُتبع...
عشق البدوي