The Lost City of Eriendelle

Chapter 6: Her Ability

CHAPTER 6: Her Ability

Celestine's POV

Kinagabihan ay pumunta kaming anim sa night market upang magliwaliw. Marami rin ang mga estudyante rito. Ang iba ay bumibili ng mga pagkain, samantalang ang iba naman ay naglalaro lang sa mga booths na may mga games. May mga gamit rin na binebenta kaya bumibili rin ako paminsan-minsan.

Nakakapit sa braso namin ni Elvira si Cosette habang ang tatlo naman ay nasa likod namin at nakasunod lang habang tumitingin-tingin rin. Huminto kami sa isang booth kung saan may nagbebenta ng mga necklace at singsing.

"Uy Creed! Diba naghahanap ka ng singsing para sa bagong fiancé mo?" Anunsyo ni Galen.

"May bago ka na namang fiancé, Creed?" Kunot-noong tanong ni Elvira kay Creed.

Tumango lang si Creed at lumapit na rin sa mga naka-display na singsing.

"Hanep ng tradisyon niyo. Pagkatapos ikasal ni Kuya Neo, ikaw naman ngayon ang puntirya." Natatawang sabi rin ni Cosette.

Tinignan ko si Creed. Seryoso siyang tumitingin ng singsing, tila binubusisi niya ang bawat detalye nito. Nagtatanong pa siya minsan sa nagbebenta tungkol doon. Mukhang kahit arranged marriage ay interesado siya doon sa babae.

Pagkatapos naming mamili ay tumambay muna kami sa isang bench habang pinapanuod ang mga estudyante na ine-enjoy ang gabi sa night market. Kumakain kami ng snacks at nagku-kwentuhan na rin, hanggang sa mapunta sa akin ang topic.

"Ikaw Celestine? May boyfriend ka na ba or kahit manlang ex?" Nanunuyang tanong ni Marshall.

Napatulala ako saglit at naisip ang taong naiwan ko sa palasyo. Ngayon ko lang rin naisip na kung anak ni Uncle Sandro si Britney, ibig sabihin kapatid niya si Nigel, ang taong tinutukoy kong naiwan ko sa palasyo. At isa pa, bakit hindi pinakilala sa amin si Britney noon?

"Wala pa. Pero may naghihintay sa akin." Ngiting sagot ko.

Hindi ko makakalimutan ang araw bago ako umalis ng palasyo. Iyon ang araw na nagpaalam kami sa isa't isa at nangakong hihintayin ang isa't isa. Wala kaming lebel, hindi kami o kung anuman. Ngunit alam naming mahal namin ang isa't isa.

"Pagbalik ko galing sa Oldia, papasok ako sa Academy upang makasama ka at pagkatapos no'n hihingin ko na ang kamay mo sa Hari at Reyna. Kaya hintayin mo lang ako."

Ang Oldia ay isang lugar sa Eriendelle kung saan ikinukulong ang mga makakasalanan at nakagawa ng matinding krimen. Kaya araw-araw akong nagdadasal na sana ay nasa mabuting kalagayan siya. Binigyan siya ng misyon ng kanyang ama sa Oldia upang bantayan ang isang importanteng bagay na naka-kubli doon.

Nang lumalim na ang gabi ay bumalik na kami sa mga dorm namin upang magpahinga. Naunang matulog sina Elvira samantalang ako naman ay gumawa muna ng mga assignments at iba pang pampa-antok na mga gawain.

Pagkatapos ko sa mga assignments ko ay naisipan kong magtimpla ng gatas at inumin ito sa terrace. Napayakap ako sa aking cardigan at nilapag ang baso sa katabing table. Malakas ang ihip ng hangin at kahit na halos patay na ang mga ilaw sa Eriendelle at sarado na rin ang night market ay nakikita ko parin ang pagsayaw ng mga puno't halaman sa tulong ng liwanag na nanggagaling sa bilog na buwan.

"Sigurado ka ba dito? Hoy!"

Napasandal ako sa railings ng terrace at sinilip ang ibaba kung saan nanggagaling ang tinig na iyon. Nagulat ako nang makita si Britney kasama ang isang hindi pamilyar na babae.