جنة فؤادي

الجزء التاسع عشر

#جنة_فؤادي
الجزء التاسع عشر

#zainab_alnajar

لا احلل ان تقرأ بدون تصويت
لن تكلفك الكثير ضغطه فقط ☺

لازلتُ أحمل تلك الفكرة في روحي، أن السرّ في ديمومة أي علاقة هو الأمان
ولم اعد اشعر انك اماني .. بل غريب اكتشفه لأول مرة

*** حارث
من دخلت وشفتها نايمة يم الجهال وعايفتني شگد كرهت نفسي .. ما اعرف اوصف كرهي لنفسي .. وماجاي اصدگ اني ضعفت بهاي الطريقه...
ضلت سمر على مدى ايام تغريني صدگ ابينلها ما اهتم بس انا رجال غريزتي حكمتني وحكمت عليه اتذوق الي متاح گدامي .. بيومها جانت لابسة تيشيرت احمر مبين مقدمة صدرها منه وتنوره قصيرة .. طلعت بره الغرفة رحت يم الولد دخنت جگاره ردت اتغاضى عنها شوية .. وراها رجعت فتت اروح لمكتبي هي سوت نفسها تفوت وجتي انلزكت بيه باوعت عليه عيونها ذبلانه .. باوعت حمرتها لون احمر وشفايفها مليانه بدون شعور بديت اتذوقها هي خلت ايدها على رقبتي والثانية على صدري بس فتحت عيوني شفت مو هي حبيبتي كل شيء يختلف كرهت حتى ريحة انفاسها دفعتها عني گلتلها _ شسويتي
_ اني ماسويت شي انت سويت .. حارث اني احبك
_ اش ولا كلمة .. اخذت كلينكس مسحت شفتي وطلعت رحت للحمامات اغسل وجهي وايدي بالصابون حيل مثل واحد الي لازم شئ نجس بس بالحقيقة ماكو شي ينضف بعد صرت نجس مثلها .. يمكن لو ما متزوج جان اگضي وياها وكت لأن هي تريد تلعب .. بس تزوجت وزبيدة اول شي طلبته ما اخونها ... گلت اسكت وهو اني شسويت هي بوسة وبعد ما انطيها مجال... وراها اتضح اني لعبة بأيدين عاهرات .. امي الي كل الي سوته دينا بيه ماسويتها بيوم
باوعت لزبيدة لازمة ايدين حمودي ونايمة باتجاهه .. صرت ما اگدر انام بعيد عنها رحت جبت فراش الي ونمت يمها بس خفت امد ايدي عليها خاف تگعد وتروح بغير مكان اكتفيت اباوع عليها من نايمة .. صح صار مده من تزوجنه بس والله بعدني ماشبعت منها
گعدنه الصبح هي نزلت قبلي نزلت سمعت امي تگولها على ابن عمها تخبلت ليش ماگالتلي وشلون بقت هناك يومين وهو حاط عينه عليها .. اعترف اني اشك ومرات افتش بتلفونها بس كله هذا من وره دينا ومخلفاتها اني ماكنت هيج
من سألتها وجنت عصبي جوابها منطقي تقدم ورفضت ليش دا اغثها وهم امي تحقق مرادها وتخلق مشكلة جديدة .. هدأت نفسي ودخلنا الشركة اني وياها .. تمشي بركوز وراسها مرفوع .. يحقلها .. مرات احس كل الموضفين يباوعولها بعيون جبيرة زبيدة مو بس جمال اكو شخصية قوية بداخلها احسها رب العالمين منقيها تجبر الواحد يحترمها برغم كلامها قليل وياهم على گد سلام وابتسامة بسيطة .. هذا يخليني اغار عليها كلش اريد اغمض عيونهم هاي مالتي والي .. بس شوكت تغفر لي مشتاقلها كلش
***** زبيدة دخلنا الشركة سلموا علية واخذوا من خاطري عرفوا عندي حالة وفاة واني هم جنت لابسة اسود
دخلت للغرفة سمر گامت وگفت سكتت شوية يمكن تنتظر ردة فعلي .. بعدين سلمت وعادي رديتلها ولا كأن شي صاير .. بس بداخلي بركان كل ما اباوع عليها وحتى المكان الجانوا بي بالغرفة .. بس مو زبيدة الي تخلي مشاعرها تسيطر عليها
التهيت بالشغل راسي مارفعته لحد ال 12 جتي وفاء هاي البنية سبب برسم ابتسامتي جرت كرسي وگعدت يمي وصارت تحجيلي كل تفاصيلها هي وعلي حتى الخاصة من صدگ ضحكتني
_ اگولج ما اعرف هيج البوسة طلعت بلاوي
_ لج اسكتي عيب ههههه خرب ببليسج
_ زبيدة حبي طلعي ويايه للسوگ حبابه حبابه مو جنت اروح وياج اني اريد شغلات وحدي اشتري وذوقج احبه
_ شوكت تريدين نروح
_ هسه نطلع من وكت بالوحدة شتگولين
_ غير اگوله لحارث
_ اني اگوله معليج
_ استاذ حارث .. عفية اريد زبيدة تروح وياية للسوگ
_ شوكت
_ هسه نطلع بعد شوية
جر نفس وباوع علية _ علي يأخذكم
_ لا نروح بتكسي
يحجي وعيونه علية _ هاج هاي سويج سيارتي اني ارجع ويه الولد
اخذت السويج منه طلع فلوس ينطيني _خاف يعجبج شي بالسوك
_ لا مايحتاج شايله
_ اخذيهن .. بخزره حجه
اخذتهن واستأذنه وطلعنا واعرف بي غصباً عنه قبل .. يمكن انا جنت محتاجة اشغل نفسي وابتعد اكثر من حاجة وفاء للسوك
افترينه هلگد ونستني وفاء لوحدنا لا رجلي ولا خطيبها
بس حاولت ارجع من وكت علمود الجهال .. هذوله خطية كلش يقهروني
****
حارث .. من راحت ويه وفاء وعافتني ويه سمر .. كأنما تگولي سوي الي يعجبك وياها بعد ماتهمني
زبيدة شگد هادئة .. ابد ماتصيح ولا تعصب ولا تحاجيني بصوت عالي بس عدها اسلوب يشعلني شعل من تعاملني ببرود وتهملني وتحقرني .. هذا الاسلوب هسه عرفته بيها وسلاح قوي هد حيلي ياريتها تصيح وتعيط .. ياريتها عاركتني مثل باقي النسوان هم لو صيحت عليها يصير لي حگ بس هي هدوئها الذبحني .. وانا اعرف هي مقهورة بس قوتها2 بتحكمها بعصبيتها
ضليت افتر بالشوارع .. ارجع على منو بالبيت .. امي هسه تستلمني والجهال هسه بيت سجى من ترجع يالله اجيبهم صاير مابيه حيلهم هي متكفله بكل شئ يخصهم
صارت الساعة 5 واني افتر مشي حتى غده ماتغديت رجعت للبيت گعدت بالحديقة هم زين امي ماموجودة جانت .. بعد شوية انفتحت باب الگراج ودخلت السيارة .. جايبة الجهال وياها فتحوا الباب ونزلوا عليه شايلين ايس كريم
_ شوف ماما اشترتلنا موطا .. ونزلت هي شايله حمودي وبأيدها كيس مبين اكل
_ السلام عليكم .. تغديت
_ لا بعدني
_ تعال نأكل ..
فاتت خلت الاكل بالمطبخ والجهال يگمزون يمها اخذتهم غيرت ملابسهم وهي هم بدلت واجوي بالمطبخ
صافن عليها وعلى حركاتها شلون رتبت حياتي الي جانت مو بس مخربطة مبعثره كلها
صارت عندي عائلة من صدگ زوجة واطفال .. بس بعدها ما تباوع علية توكل الجهال وتسولف وياهم عبالك كبار دلو تسولف عن مدرستها وحسوني يسولف عن اصدقائه ويسولفون الها .. شگد احتضنتيهم لعد حمودي يمسح حلگه بردان ثوبها وهي تضحك حتى ماصاحت بي .. سكوتها خلاني انتبه على كل تفاصيلها .. شگد مشتاق لضحكتج بوجهي
ايام مرت عاقبتني بيها اسوء عقاب .. لحد يوم طلعت من الحمام بالمنشفة .. هي جانت دتاخذ ملابس من الغرفة وتطلع وگفت بالباب ماخليتها تطلع
_ وين .. ماتطلعين
_ اتركني حارث
_ اريد حقوقي مو الله هم مايقبل ماتخافين منه
_ وحقوقي وين لعد هم الله يرضى .. اعرف الله اكثر منك
_ زبيدة كافي والله محتاجج ومشتاقلج هواية .. حضنتها هي جامدة.. بستها مابدر منها اي تفاعل .. صرت عصبي دفعتها .. هسه شسويت ماتگوليلي لو نايم وياها جان شسويتي
_ عدكم الخيانة هي بس الفراش .. بس الخيانة تبدأ منا .. واشرت على راسها .. ومنا .. واشرت على گلبها
شوف حارث اسألك سؤال جاوبني علية
_ اممم احجي
_ دينا جانت تعوفك ايام وتروح لأهلها واتذكر اني من جنت تحجيلي اذا ناسي
_ اي
_ ليش ما فكرت تخونها ؟ .. ليش خنت زبيدة ؟ ..
جاوبني !! سكتت ما اعرف شأگولها
تعرف ليش... لأن زبيدة مطلقة قبلك اذا تطلقت النوب الناس الف سالفه راح يحجون عليها وتضطر تسكت وتتحمل .. وتعرف بعد شنو زبيدة عقيم .. وزبيدة اكبر منك .. كل هاي تبيح لك تخونها ومحد يلومك كلها تگول حقه خطية
بس أگولك شي اني ماغصبتك اذا هيج ماحابني
_ شنو هالتفكير الي براسج .. اي شي منه ماكو .. انا حبيتج وسويت كل شيء علمودج... ماوگفت على غلطة وگتلج غصب عني صارت
_ خلاص حارث تريدني انام بغرفتك... مثل ماتحب بس ماعندك سلطان على احساسي
ضربت المراية حيل بأيدي وشكو عطور دفعتها بأيدي بالكع ماعرفت شصار بيه من،العصبية .. اباوع ايدي تجري دم .. وزبيدة واگفه بمكانها ماطلع منها اي ردة فعل ساكته بعدين حجت
_ هذا الگدرت علية !! تكسر وتصيح وتهجم .. !!
هذا جنون ..
تركتني وطلعت .. والله خجلتني من نفسي .. ضنيتها راح تجي وتداوي ايدي او يمكن تتجنب عصبيتي .. بس هذا هدوئها موتني .. گعدت على الجرباية خليت راسي بيت ايدية منصي راسي
جتي گعدت يمي .. جرت ايدي مسحتها بتعقيم وبدأت تضمدها ماتباوع بعيوني تشتغل وهي ساكته .. كملت وگامت تعزل بالغرفة الهوسة الي سويتها .. وانا اتابع كل خطواتها .. اخير شي كملت اجتي تطلع من الغرفة لزمتها من ايدها وفريتها علية
زبيدة كافي بعد مابيه اتحمل .. باوعت بعيوني .. عيونها بيها انكسار وخذلان
_بدل هالهوسة الي سويتها واذيت نفسك جان فرشت سجادة وصليت حتى صلاتك تاركها عبالك مامنتبها عليك
_ سامحيني وانسي
_ سامحتك .. بس ما انسى والثقة مثل هاي المراية الكسرتها .. تگدر تجمعها من جديد !! واذا جمعتها ولزكتها .. راح تشوف صورتك بيها حلوة لو مشوها .. سامحتك لخاطر جهال مو جهال من دمي بس مشو بدمي .. ولأجل مواقف سويتها وشفعتلك
اخذتها لحضني عقابها جان شگد قاسي .. حرمتني منها .. اشوفها گبال عيني وهي طبعها تلبس بالبيت ملابس حلوة واتحسر عليها
يارب ما اريد ااذيها
***
زبيدة
گلبت صفحة بس مطبوعة بگلبي .. هاي الحياة لازم تستمر
مرت سنة بنفس الروتين .. دلو طلعت اولى وهسه بصف بالثاني .. وحسوني سجل اول .. حمودي عمره سنتين ولسانه عسل اعشقة يركض وراية ويصيح ماما متعلق بيه هواية .. عمتي بعدها تغثني بس هي مرتاحة شلت المسؤولية عنها وماتعرف طبعاً.. صارت تطلع وتروح زيارات وسفرات ما وراها شي
وفاء وعلي تزوجوا وهسه حامل حبيبتي الله يگومها بالسلامة
بس الي قهرني واذاني هو فراق بابا
البيت بعته وراح بديالى يم بيت عمي ونطيته لفلوس گلتله اخذ بيها بيت اذا عجبك اثثه وخلي اكعد بي واذا ماتريد اجره .. اقلها يعتبر عنده بيت هناك .. طبعاً عمتي مافاتها هذا الشي وضلت تحجي وحاولت تحرك حارث علية بس هو گلها مالها وحره بي
والسيارة جبتها خليتها بالكراج بعدها جديدة واني مامتعبتها گلبي ماينطيني ابيعها وحتى هاي هم سمتني بيها تگول ليش خالتها ماتبيعيها .. اكتفي بالسكوت
وصفيت ببغداد لا اب ولا ام ولا اخت مرات اروح لبيت حسان .. وبيت حسام قليل كلش
بيوم طلعت بالحديقة اخذت الجهال سويت كيكة العصرية دزيتهم على حارث ولعبنا كلنا طوبه .. يمكن الهوسة مالتنا وصلت لراس الشارع صرنه فريقين وحمودي يروح ويجي منا ومنا .. عمتي جانت طالعة ورجعت فتحت الباب وگفت تباوع علينا.. ودخلت وحدة وراها .. حلوه كلش عيونها زرق لابسه بنطرون جينز وعلية قميص احمر والحجاب هيج رادته مو مضبوط
اجتي ركض على الجهال باست داليا وحسوني هم صافنين بدون ردة فعل واجتي شالت حمودي گام يدفع بيها جان يستغرب من غريب
باوعت لحارث
ساكت بدون حركة
رجعت نزلت حمودي وحضنت داليا وحسن حبايبي ماما اشتاقيتلكم
جريتهم من ايديهم كلهم خليتهم يمي ..
_ ماعندك اطفال هنا ذوله جهالي .. تفضلي منا
_ مو من حقج تحرميني منهم .. اني امهم .. وهذا بيت عمتي شوكت مايعجبني اجي
حجه حارث _ لا مو امهم حبابه .. بالمحكمة تنازلتي عنهم اولا .. وثانيا عفتيهم لا حول ولا قوة هسه جاية تسألين عنهم
_ انت حرمتني منهم
_ اها تحبين احجي ليش
_ كذب انت اتهمتني .. وهسه اني تطلگت ورجعت اريد جهالي
_ ماعندج جهال عندي وهاي امهم.. الي ربت وتعبت وهذا البيت بعد ماتدخلي
حارث اخذ حمودي واني اخذت داليا وحسن ودخلت جوه
جسمي كلة يرجف منين طلعتلي هاي .. خاف صدك تاخذهم مني غير اموت وراهم
صعدنا فوك واسمع صوتها تبجي وعمتي تحجي وتصيح وتدعي علية الله لاينطيج تحرمين ام من جهالها جعلج بمرض يكون ماتگومين منه
نزل حارث
واسمع بس الصايح لا ارادي دموعي تنزل حضنت الجهال حيل وكعدت ادعي .. داليا تگول هاي ماما مو گلتلها اني ماما حبيبتي .. جبيرة وتفتهم وحتى حسوني .. سديت باب الغرفة فتحتلهم كارتون وعليت الصوت حتى ما يسمعون شي
شينتظرج بعد يا زبيدة

يمتــه تغفــه بعيني فرحه ومايفززها بچي
وذيج هي . . .
شـمـا تـحـط
بحـلـوگـهـم وتـسـوي #زيـن
تطلع من الـسانـهم . .
مـطـلـوب. ديــن !!! ...

لاتنسون الضغط على نجمة 🌟 التصويت
رأيكم وتوقعاتكم
واشكر تعليقاتكم الحلوه ..وكل الي صوتولي
هاي هديتي الكم لان ماقصرتوا جنت ناوية ما انشر ☺😘
احبكم
#zainab_alnajar