شمس

١٠

#شمس١٠
شهد السلمان

اخذت بطل المي حتى تشرب منة ايدها ترجف وقطرات المي  يتطاير من شفافها باوعتلي بنظرة محتارة شلون تكمل قصتها
مسحت وجهها بيدها واخذت نفس قوي يشبه جرة الحسرة وبدت تجاوبني على سؤالي وتكمل كلامها

- مكدرت اصبر على وضعي هذا اكثر وصار بداخلي شي يكبر مثل مشاعر انتقام لدرجة صرت اخطط انتقم لامي ولحياتي العشتها وياهم والجاية
قررت انهي كل هالمهزلة باي ثمن حتى لو جان المقابل حياتي
ردت اعيش بكرامتي واذا مصارت فالموت اهون
الناس اللي اشوفهم كل يوم وهم يتعاطون مخدرات يوجعون كلبي ادمانهم مانعهم يتخلصون من اهلي واللي يشابهون اهلي بس اني مو مدمنة واكدر اتخلص منهم واخلصهم الهم همين ..
و اول محاولة الي؛
جنت اتفرج على التلفزيون مطلعين النشرة ساعة ٨ بالليل واقرة شريط الاخبار وشفت الارقام الساخنة للتبليغ عن الجرائم اتسحبت منهم على كيف وصعدت بسرعة للغرفة
حفظت الارقام و كتبتهم بدفتري حتى اذا نسيت يبقون هنا
لبعد كم يوم جريت تلفون اخويا من غرفتة لان جان نايم و راجع سكران فمراح يحس علية  واني بحجة انظف الغرفة فتت واخذتة
صعدت لغرفتي وبديت اتصل على الرقمين بس اثنينهم يطلعلي مشغول
مرة على مرة لحد ما حصلت وحتى لا ينعرف صوتي غطيت حلكي بخاولي
جسمي يرجف حتى الكلام نسيتة شنو حكول وشون ارتبة واني اصلا خايفة كلش لان الكول مو مثل الفعل حاولت ابلغ بس مكدرت اتراجعت وسديت التلفون بلحظتها
بجيت هواية  لان احس نفسي فاشلة ما اكدر اسوي شي وبنفس الوقت هذولة اهلي ما اختاريتهم بس يبقون اهلي يعني صعب علية اسلمهم للشرطة بيدي ؛
عاطفتي غلبتني على الرغم من اجرامهم و رحت رجعت التلفون لغرفة اخوية وعفت الموضوع.
بس ورة كم يوم هم  حاولت وهالمرة شغلت عقلي بمكان كلبي تركت عواطفي على صفحة لان قريت ورقة مكتوبة ما اتذكر تفاصيلها بس جانت عن موعد تسليم شحنة او بضاعة بكمية جبيرة او
و استعملت  تلفون مرت ابوية جانت طالعة وناسيتة دكيت اكثر من مرة  وشالة علية واحد وطلب يسمع شنو الشكوى وبلغت عنهم و عن المكان والوقت مال تسليم و نطيتة الاسماء المكتوبة جوة التواقيع اللي بالعقد سالني منو اني وشسمي عبالة ولد لان هم غيرت صوتي بس خفت كلش و كلت اني فاعل خير وبسرعة سديتة ومسحت الرقم من السجل وتاكدت التلفون ما مسجل مكالمتي ورجعتة بمكانة مثل مجان
- و بعدين شنو صار يعني لزموهم !؟
- لا لان صار تغيير بالخطة هيج افتهمت بعدين
- حسو بيج لهذا غيرو الخطة ؟
- لا بس هم غيرو الموعد اجلو ومن رجع بالليل اخوية سمعتة يحجي ويا ابوية ويكلة همزين غيرتو موعد التسليم اليوم لان كالولي الجماعة هناك جانت اكو كبسة حكومة الظاهر عدهم اخبارية او حسو بشي فعرفت انه فشلت هالمحاولة وبصراحة مجنت متخيلة الوضع بهاي الصعوبة ،
كررت هالشغلة مرة لاخ بس اللي جان يحجي وياية كالي اذا هالمرة غلط او ماكو راح يحبسني بتهمة البلاغ الكاذب وازعاج السلطات واتعاقب اني ويعرف شلون يوصلني من خلال رقم التلفون خفت وسديتة
- يعني خفتي لا توصلج الشرطة وتنكشفين كدامهم ؟
- اي طبعا و بدل ما هم يتعاقبون اتعاقب اني والله اعلم شيسوون بية ..