القاضي و الشاهدة

16

ما گدرت اتحمل طلعت گالت بالليل امر يمهة خاليهة نايمة طلعت وقفلت البيبان ...

رغد فتحت عيوني وصوت التليفون ثولني موتني گمت بابة ايدگ علية رفعت الخط واني بالگوة احجي من النوم صالي اكثرمن١٨ ساعة نايمة خرب

- هلة بابة اشلونك..
- هلة بوية اشبيچ صوتچ تعبان كلش ؟
- جنت نايمة وانت گعدتني.
- بوية من البارحة ادگ عليچ ما حصلتچ.
- اصدگ التليفون يمي واني ما گعدت چانو بيت ابو علاء يمي وتعبت فنمت من راحو.
- والله رفعتي راسي بوية علاء بس ايسولف بيچ من رجع هوة والحجية والحجي .
- تربيتك 😭.
- علاء ايگول بطلتي من الشركة اتريدين اسافرين قبلنة صدگ هذا الحجي؟
- اي صدگ بس ارد ارتاح اشوي احتمال احجي لو باجر لو عگبة للبصرة وبعدهة ارجع لبغداد واشوف سالفة البيت وشنو اسوي بالغراض واسافر .
- ايولن بوية لا اتعبين روحچ علمودهم .
- لا بابة هذول كلهم جدد اشتريتهم اول ما گعدت بالبيت حرامات.
- على راحتچ تجين بسيارة لو طيران ؟
- طيران اامن من السيارة ولو المطار يشلع الگلب بس شسوي اخاف من السواق واني بحدي .
- هانت هسة انسافر ونرتاح اهناك.
- انشالله.
- بوية صاير شي وياچ ليش احسچ تعبانة اكو احد مضوجچ؟!
- لا بابة مابية شي بس لان جنت نايمة لا اتخاف علية جني صل هههه.
- انشالله مابيچ شي يلله گومي سبحي علمود اصحصحين .
- اي والله ويرادلهة گهوة تعدل المزاج شكلي راح اطلع اليوم بالليل.
- على راحتچ بس بوية لا تتأخرين.
- انشالله .. مع السلامة بابة.

گمت اتمغط سبحت ولفيت حجابي وطبيت على المطبخ لان ميتة جوع عندي لحم مفروم طلعتة اخذت سطل المسح وگعدت امسح البيت نضيف بس بالگاع اشوي اتراب ما اعرف اشلون افارگ بيتي اشگد احبة من چنت بيتنة چنت اكثر شي اكرهة التنضيف بس من گعدت بيت وحدي ظليت بس انضف ارتاح من اشوفة نضيف دخلت للمطبخ امسح سمعت صوت الباب انفتح عرفتة قيصر اجة سويت روحي ما سمعت الباب وبقيت بالمطبخ هوة دخل للصالة اني طلعت اللحم من المي و سلگتة دخل للمطبخ وگال :

- الله ايساعدچ.

درت علية جنت كلش ظايجة منة بس من شفت ضحكتة بوجهي ضعفت گتلة .

- الله ايساعدك .
- استوچ گعدتي؟
- لا قبل اشوي اشلون عرفت جنت نايمة؟!
- چنت مساع اهنا شفتچ نايمة ما هان علية اگعدچ.
- اها .
- جوعان رغد سويلي لگمة اي شي ميت جوع.
- حتة اني ميتة جوع هسة اسوي عشة ونتعشة سوة اذا اتريد اتغير اهدومك تتعشة وبعدين من اتروح تلبسهم .
- ابات اهنا اليوم .
- صدگ!! اذا لان حچيت وياك فأنسة الموضوع.. لان راح اسافر اول وتالي مراح اغير قراري فلا اتعب نفسك وبعدين جنان بغداد خاف تعرف .

گعدت على كرسي مال ميز الطعام فهية اجت يمي شلتهة وحطيتهة على رجلي

- ايهون عليچ اتعوفيني ؟
- مثل ما هان عليك وعفتني .
- ولچ والله ما اگدر اعوفچ آنتي ليش ما تفتهمين اني احبچ اموت اذا اشوف الصد بعيونچ رغد آنتي اغلة شي الي بالدنية و اذا رحتي بعد شلي بهل الدنية ...
- قيصر ما اشوف بعيونك ذاك الي حبيتهة انت صاير ما اتفكر بس شلون راح تصعد.. المناصب عمت عيونك ونستك كلشي ومن ضمنهم اني انت لو اتخيرت بيني وبين الانتخابات فاكيد راح تختار الانتخابات امة اني لو خيروني بينك وبين الدنية كلهة چا اختاريتك .
- هيچ ضنچ بية والله غلطانة آنتي اني ما انحمل افراگچ والدليل هذا اني گدامچ وجاي اعتذر منچ مو علمود ما ترحين لان اني مراح اجبرچ تبقين بس على الاقل تبقة بينة ذكرة حلوة قبل ما تعوفيني خليلي اخر ايام وياچ حلو .
- قبلت اطلگني قيصر!؟
- لا ما اطلگ لو تطلع براسچ نخلة اتريدين اسافرين آنتي لو اتعرسين ؟
- بس سألتك اني مراح اجبرك اطلگني راح اسافر من اتشوف الموقف ملائم انو تعترف بزواجنة اني موجودة .
- رغد اموت عليچ اني .
- انت لو ما متأكد اني احبك ما هيچ ضليت اتهين بية .
- ليمتة هنتچ اني ؟
- البارحة اگبال اهلك ومرتك تطعن بشرفي ليش قيصر اكو يوم طلعت العيبة مني من عاشرتني وليهسة هم شفتني سويت مكسورة غلطة وتاليهة اتگلي اهلچ متحررين وعادي عدهم كلشي اسوين
قيصر من اباوع بوجهك اشوف انسان غريب علية ولا چنك قيصر الي صارلي تقريباً سنتين ويا نضراتك الي صارت باردة وحجيك جارح وجياتك قلن اصلاً احس روحي عليك ثگل اتريد تخلص منة بس ما تعرف اشلون...
- ولچ اشلون آنتي ثگل واني لو ابقة وياچ العمر كلة ما امل الساعة وياچ احسه دقيقة رغد ومعزتچ عندي الضروف جاي تحكم علية واني اخاف اعلن زوج منچ بس خوف عليچ مو خوف على شي ثاني اخاف اخسرچ وهذا الي ما اتحملة واني اتوقع جنان شاكة بشي لان اسلوبهة كلش متغير وياي وصايرة عود طيبة ومسوية روحهة اتحبني وحتة تعاملهة وية اهلي زين بس جنان ما اسوي هيچ شي الة اذا اكو شي براسهة واني كلش خايف منهة ...