روما

جزء ١

الحلقه ١

فى فيلا ضخمة اشبه بالسرايات القديمه , الساعة 10 الصبح , عربية ملاكى شيك بتدخل جنينة الفيلا جواها شاب لبس شيك جدا وبيوقف العربية فيقرب منه بواب الفيلا ويكلمو
_____________________
البواب : اهلا يا مراد بيه
مراد : صباح الخير يا عم حامد , رشوان بيه صاحى ؟
حامد : معرفيش والله يا بيه
مراد : طيب خلى حد يبلغه انى جيت
حامد : أومرك اتفضل يا بيه
يروح حامد يخبط على باب الفيلا تفتحلو واحده من الخدامين
حامد : رشوان بيه صحى يابت
الخادمه : ايوه صحى من بدرى
حامد : طاب اجرى بلغيه ان مراد بيه وصل
الخادمه : حاضر , اتفضل يا فندم
يدخل مراد ويقعد على كرسى , وتروح الخادمه تخبط على باب اوضه براحه , يجى صوت من جوه الاوضه
رشوان : ادخل
الخادمه : صباح الخير يا فندم , مراد بيه وصل
رشوان : خليه يتفضل
يدخل مراد الاوضه ماسك فى ايده مجموعة اوراق ويوقف قدام راجل كبير اوى فى السن قاعد على كرسى متحرك
مراد : صباح الخير رشوان بيه
رشوان : صباح النور , اقعد يا مراد
مراد : معلش جاى لحضرتك بدرى , بس سعدك عارف مواعيد البنك
رشوان : ولا يهمك , فين الاواق
مراد : اهى يا فندم
ويبدء رشوان يمضى على الاوراق ال مع مراد , لحد ما يخد باله من حاجة
رشوان : ايه ده يا مراد , ال 50 الف دى اتسحبت ليه ؟
مراد باحراج : دى سحبتها مدام شاهيناز يا فندم
رشوان بعصبيه : شاهيناز وازاى تعمل كده من غير اذنى , وخدتها ليه اصلا ؟
مراد : عشان تجهيزات فرح الانسة نيللى
رشوان : فرح نيللى فرح نيللى , ايه هى هتعمل ايه فى الفرح ده بالظبط , ده لحد دلوقتى سحبت اكتر من ربع مليون فرح ايه ده
وفى نفس اللحظه دى تدخل عليهم ست شيك جدا رغم سنها الكبير وال هى شاهيناز , تفتح الباب بقوة وتوجه كلامها لرشوان
شاهيناز : فرح بنتى , يعنى فرح لا اتعمل قبلو ولا هيتعمل بعده
رشوان : تقومى تسحبى كل الفلوس دى , ومن غير اذن كمان
شاهيناز : دى فلوس جوزى يعنى فلوسى وفلوس ولادى يعنى مش محتاجه اذن وخصوصا منك
رشوان : دى فلوسى انا مش فلوس جوزك لما ابقى اموت تبقى فلوسك وفلوس ولادك لكن انا لسه عايش
شاهيناز : عادى يعنى عايش زى الميت مش فارقه كتر , على العموم انا مش هرد عليك , بردو اسمك راجل كبير وابو جوزى
رشوان : مهو لو كان عايش , كان عرف يقطع لسانك ده ال طول عليا
شاهيناز : هههههههههههه ده لو
تخرج شاهيناز وتسيب رشوان دمه بيغلى ومراد قاعد مكسوف من كل ال حصل قدامه ومكسوف اكتر انه معرفيش يعمل حاجة فى الموقف ده
رشوان : شايف يا مراد , شايف بقيت بتعامل فى بيتى ازاى , هى صح بقيت عايش ميت
مراد : بعد الشر عليك يا فندم ربنا يديك طولت العمر
رشوان : هه اعمل بيه ايه ؟ الواحد يموت اكرام ليه , قاعد مشلول مرمى على كرسى مش عارف حتى اوقف شاهيناز عند حدها
مراد يوطى راسه وهو مش عارف يرد على كلام رشوان ال فجأه يبص لمراد بنظره غريبه
مراد : فى حاجة فى فندم ؟!
رشوان : انت متعرفيش طريق روما يا مراد ؟
مراد : انا ! ابدا والله يا فندم انا اخر مره شفتها من 10 سنين يوم ما حضرتك فاكر طبعا اخر مره شوفنها فيها
رشوان : مهو المشكله انى فاكر
مراد : طب هو حضرتك بتسأل عنها ليه ؟ انا اسف يعنى
رشوان : اسمع يا مراد , قدامك اسبوع مش اكتر من اسبوع تتشال تتحط , تجبلى روما
مراد : اجبها ! اجبها ازاى يا فندم هو حد عارف ليها سكة
رشوان : تتصرف , تضرب الودع تفتح البخت تتصرف , تلاقيها , وتقولها ان جدك عايزك ان شاء الله تقولها بيموت وعايز يشوفك لاخر مره , تتصرف يا مراد فاهم
مراد : فاهم
وسكت وهو مش عارف هيتصرف ازاى او هيعمل ايه
_____________________
وفى حى راقى , فى شقة فخمه جدا صوت اغانى اجنبى عالى بشكل رهيب مسمع العماره كلها , وبنت فى نص الصاله واقفه بترقص على الاغانى ومش واخده بالها من جرس الباب ال عمال يرن فى الاخر تاخد بالها فتوطى الصوت وتروح تفتح , تلاقى بواب العماره
البواب بخوف شديد : لامؤأخذه يا ست روما , بس اصل يعنى صوت الاغانى عالى شويه والسكان اشتكو فالو يعنى ممكن تقفل الصوت شويه شويه بس
روما تبصلو بنظره مرعبه وتقرب منه
روما : كنت بتقول حاجة يا أبراهيم
البواب : ها والله يا هانم ماانا دول السكان
روما تمسكو من هدومه وتقولو بصوت عالى : روح قولهم ال مش عاجبه يرزع دماغو فى الحائط , سامع
البواب يهز راسه بـ اه وينزل بسرعه على السلم , وروما تدخل تشغل الاغانى تانى وتعلى الصوت اكتر واكتر
____________________
مراد قاعد فى كافيه مع واحد وبيتكلمو
مراد : يا هانى وفيها ايه ياااخى
هانى : بقولك ايه , دى بيانات سريه انا مقدريش اطلعلك العنوان مهما حصل
مراد : ياعم الله يخليك مفيش مخلوق هيعرف هى بيناتها كلها عندكم فى البنك مش طالب منك غير العنوان لازم اوصلها
هانى : متحاولش مش هينفع بقولك بيانات سريه امال لو مكنتيش محامى وعارف
مراد : يووووه يا هانى امال لو مكنتيش صاحبك يا ااخى ده انا ليه 3 ايام هلكت لحد ما عرفت هى حسابها فى انهى بنك وحمدت ربنا انه فى البنك ال انت بتشتغل فيه , فى الاخر تعمل معايا كده
هانى : خلاص خلاص انا عارفك هدودينى فى داهيه , هات الاسم عشان اطلعلك العنوان وربنا يستر
مراد : روما محمود رشوان
هانى : هجبهولك بكره
مراد : الحمد لله , هانت
_____________________
شاهيناز قعدة فى البلكونة على كرسى وبتقرا فى مجلة تدخل عليها بنتها نيللى
نيللى : مامى انا خرجة
شاهيناز : على فين يا روح مامى ؟
نيللى : خرجه انا وعمر نتمشى شويه
وهى بتتكلم يجى صوت من وراها ,
_ هو كل يوم فسح
نيللى : اولا يا ست ندى بلاش تلعمى اوكر , ثانيا دى حاجة متخصكيش
ندى : انا مش بلمع اوكر انا كنت دخله صدفه وبلاش غلط فى الكلام , وعلى العموم انتى حره
شاهيناز : خلاص انتو الاتنين بلاش خناق , ندى شريف جيه ولا لسه
شريف وهو بيدخل عليهم : انا اهو , صوتكم عالى ليه ؟
شاهيناز : لا دى نيللى وندى بيتخانقو زى العادة , سيبك منهم تعالا انا عايزك تظبط معايا شوية حسابات
وتخرج شاهيناز مع شريف وندى تقعد مكانها , شويه وتلاقى حد بيقولها
_ قعدة لوحدك ليه ؟
ندى : كاميليا , تعالى اقعدى معايا ماما وجوزك بيعملو شغل يعنى انا وانتى لوحدينا
كاميليا : عادى ماانا على طول لوحدى , اصلا اخوكى متجوز الشغل مش متجوزنى انا
ندى : متزعليش يا كاميليا كل الرجاله كده اهم حاجة عندهم شغلهم
كاميليا : لا مش زى شريف ابدا , ده الشغل عندو اهم من نفسو
ندى : معلش يا كاميليا متزعليش
كاميليا : هه عادى متفرقيش
_____________________
نيللى قاعدة مع عمر خطيبها فى مطعم على النيل
نيللى : ممكن تسيب الموبايل شويه وتخليك معايا
عمر : سورى يا روحى , بس فى حاجات بخلصها
نيللى : ولما انت مش فاضى قولتلى نخرج النهارده ليه ؟
عمر ساب التلفون : اهو الموبايل يا ستى ادينى فاضى اهو حلو كده
نيللى : على فكره انت الظاهر مش واخد بالك ان فرحنا قرب ومش بتجهز معايا اى حاجة
عمر : يا حياتى بجد انا مشغول
نيللى : مشغول عن فرحنا يا عمر
عمر : لا يا قلب عمر , حاضر هاخد اجازه من الشغل واجهز معاكى للفرح انا تحت امرك
نيللى بدلع : لما نشوف
_____________________
روما بتقوم من النوم تلاقى نفسها نايمه على الكنبه فى الصالة والتلفزيون مفتوح تبص حواليا زى متكون بدور على حاجة , بعدين تاخد علبه السجاير ال على الطربيزه وتطلع منها سيجارة وتولعها , وتقوم تاخد دوش وتلبس وتنزل , وهى طلعه من مدخل العماره واحد من السكان يكون داخل وبعد ما يعدى من جنبها يرجع تانى وينادى عليها
_ مدام روما
روما تلف وتبصلو من فوق لتحت وتقولو : أنسة , أنسة روما
_ خلاص أنسه روما , انا جارك ال ساكن فى الشقه ال جنبك , حضرتك لليل نهار مشغله اغانى بصوت عالى جدا وكده مينفعش وامبارح بعتلك البواب وانتى بردو مش همك , انا بكلمك بالأدب , المره الجايه انا هعملك محضر أزعاج
روما بكل هدوء : وماله اعملى محضر , وانا كمان اعمل محضر , اه مستغرب ليه , هقول يالهوى ياخرابى الحقونى يا ناس بيتهجم عليا ونطلع على القسم , ونشوف محضر مين فينا ال هيمشى , محضر الازعاج , ولا التهجم على أنثى
وسابت الراجل واقف ومشيت خطوتين وبعدين لفت تانى وقلتلو
روما : اه نسيت , بالنسبه للأغانى والصوت لو عامله ليك دوشه , عزل وتمشى وتسيب الراجل مصدوم من الكلام

يتبع ✍️✍️✍️