عشق في بلاد حروبها لا تنتهي

عشق في بلاد حروبها لا تنتهي.باللهجه الليبيه

_ستكونين يوما يابلادي زاهرة كما كنتي لا تحزني ، فبتأكيد كما يوجد بيك الحمقه والناهبين مجردين القلوب ، بك ابطال حاملين المجد براياتك العاليا بفتخار
.
وقف قدام الباب بتبات وهوا يتلفت لمجموعة الشباب لوراه وقال بصوت اجش غليط متعصب:حوطو الحوش كويس
رد واحد منهم:اي يافندي
تلفت للباب وخبط بيده عليه ودفه برجله بالقوه لين كسره وخش وهوا يطلع ف سلاحه ووراه زوز شباب ملتمين وجوهم زي باقيتهم خشو معاه اللي رفعو سلاحهم اول ماشافو مراة كبيره ف العمر ولد واقف قدامها وباين علي وجهه الصدمه وقال بخلعه:شن فيه هدي حرمة حوش م...
وقبل مايكمل كلامه قرب الأفندي منه و شبحله بعيونه الباينات من إلتام وضربه بالمسدس من التالي ع جبهته لين طاح لوطه عيطت لمره وخبطت ع وجها وهيا تبي اطبس للولد بس بحركه سريعه من الافندي طبس قبلها وشده من شعره وقامه وهوا يقول بصوت عالي:خدوه
عيطت لمره بالقوه وهيا تخبط ع خدودها وتبكي وكانت تبي تشد الولد بس دفها الافندي التالي وقبل ماطيح طلعت بنت من الدار بسرعه وشدتها وقبل مايركز فيها الافندي عيط الولد عليه:ياحيوان ماتمسهاش
تلفتله الافندي بكل قوه وزاد ضربه بالمسدس من التالي من قوتها لين طاح هوا والشاب اللي شاده من ع يمينه وقال:خودوه خير تو مانقتله قدام امه
قاموه وهوا شبه فاقد للوعي وقبل مايطلع وقفاته كلمه:حسبي الله ونعم الوكيل فيكم الله لا تربحكم ولا تختم عليكم حسبي الله ونعم الوكيل فيكك انت
تلفتلها وشبحلها بنظره لين خلت قلبها يوقف للتواني من النبض وقال:خيطي فم بنتك ياحاجه خيرلك وخيرلها
وطلع بخطوات سريعه تابته وركب السياره لمصفحه الكحله وتحرك وتحرك وراه رثل من السيارات لمصفحه
طاحت لمره من طولها وقعدت تخبط ع راسها ورجلاها بالقوه:واااه عليا وليدي واااه عليااا كبدي خدوه خدوه ياأمنه خدو ولدك ياأمنه
خشت البنت بسرعه وهيا تجيب ف طاسة لميه وجت قعمزة جنبها وهيا تبكي:يمه مش هكي مديريش ف روحك هكي ضغظك يرقي حسبي الله ونعم الوكيل فيهم الله لا تختم عليهم
شبحت أمنه لبنتها وقعده تخبط ف رجلاها:بيقتلوه حي عليا حي من بيقعدلي ماعندي سند غيره وااه سندنا يا غاليه خدوه خدو خوك مشي فيها
خدت غاليه نفس كبير وهيا تحضن ف امها بالقوه تحاول تهديها وتخليها تبطل تخبيط ف وجها..
__
وقفت قدام شاشة التافزيون وفتحت يداها الزوز باش تخفي التلفزيون بيهم:والله ماتتحشم هي تي نوضو هيا
نفخ وهوا يحدف عليها ف لمخده لشدتها ف حضمها:حولي يادراه وقسم بالله نوضلك نمرجك ضريحه
رفع الولد لمقعمز بين رجليه راسه وقال بكلمات متعثره :امجها تبي تيحه ماما(امرجها تبي ضريحه ماما)
فتحت فمها ع وسعه وهيا ترد تحدف ف لمخده لجت ف وجها وهوا يضحك ع كلام الولد الصغير ويسمع ف عياطها:والله ماتتحشم يافارس هي وقسم بالله شوف تعلم ف الولد ف لكلام هدا
سيب فارس يد لبلاستيشن وقعد يبوس ف الولد ومداير ودن طرشه ع تنقريزها لين تلفتلها وعيط عليها:وااااااك يادراه واااك اسكتي اس اس اهو نضنا
ضيقت عيونها وضرباته برجلها ع ضهره ومشت وخلاته يضحك ويبوس ف الولد:بطل بابا انت وله
وقف فارس وهوا يقيم ف ولده ف حضنه وقبل مايتلفت ويمشي سمع صوت تليفونه يشرين نزل ولده لوطه لمشي يدبدب بشويه للمظبخ وطبس جبد تليفونه واول ماشاف من بتسم ورد وهوا يسمع ف صياحها:الو خالي
جاته وهيا تنفخ:تي هيا يافارس لعشي برد
زمط ريقه وهوا يتلفتلها وقال وهوا يرد ع خاله:خير خالي حسه دوشه جنبك شن صاير معاد فيه حاجه
ضيقت عيونها وقربت منها وهيا تشبح ف ملامح وجهه شحبت وتغيرت ، قعمز ع الكرسي وطبس راسه وهوا يحط ف يده ع شعره وقال بصوت رفعه العبره:ماتت
جاه صوت خاله من التليفوه وهوا يتحمحم وصوته باين عليه لبكي:الله يرحمه اي ماتت الله يصبرك ياولدي
طح التليفون من يد فارس وهوا يحط ف يديه ع وجهه . حس بيها قربت عليه وهيا تمس ف شعره وتقول:فارس خير شن فيه من لماتت فارس
رفع راسه فيها واول ماشفاته كيف عيونه حمرررر ودموع بين رموشه لين قلبها وجعها وماعاش عرفت شن تسأل لين قال بروحه:امي ماتت ، ماتت امي امي يانادين ماتت
شد ع سنونه وضرب بيده المزهريه اللي ع طاوله بقوه لين نادين نخلعت وهيا تشوف ف دم لنزل من يده قربت منه ع طول بس فارس وقف وهوا يطلع وخلاها حاطه يداها ع فمها من الصدمه ومش قادره حتي تمشي لولدها لعيط ع طول حسه ف المظبخ.
__
#نادين..
من صدمتي ماعاش عرفت حتي نتحرك ونمشي لزيد لعيط .تفكيري نشل انا مش عارفه نبكي نعيط ولا شن ندير بضبظ ، تلفتت لزيد لجاي يعيط من المظبخ يمرد طبست رفعته ف حضني وحضنته وقعدت نبكي انا وياه نبكي ع ماما ماجده نبكي من الغربه لقتلتني نبكي ع حضي ع كل شي ونبكي ع بلادي ، وقفت بكي لما سكت زيد ف حضني وحسيته غفي ورقد رفعته لداره ورقدته ع سريره وانا طلعت قعمزة ف صالون وقعدت نبكي ونفكر ف فارس وين مشي وخلا تليفونه ف الحوش وخلاني بروحي . اكيد يبكي اكيد مجروح هلبااا ياربي صبرك ورحمتك ربي مايدوقني شعوره .