أعـــد لــــي حيــــاتي

الجزء الاول من البارت الاخير

كمت ع حيلي مرعوبة ورفعت البردة وجان اشوف الحديقة ماكلتها النار من كل مكان والنار ما بقة الا شويه وتوصل للبيت

شفت النار واحس نفسي تهسترت وما اعوف شسوي
انتبهت الخيال شخص طفر سياج الحديقة وما جان مبين منه شي

بس هيئته… عماد اي عماد اعرفة من بين مليون شخص

فتحت باب الغرفة وطلعت ركض اصرخ بكل صوتي

سرى: عمااااد… عماد حرگ البيت ..عماااااد

نزلو الدكتوره وزوجها يركضون شافو النار وما يكدرون يطلعون متحاصرين بالبيت

اني اصرخ وابجي والدكتورة تبجي والجيران بره يحاولون يطفون النار والاستاذ ثائر اتصل بالاطفاء

لحظات خوف وهلع ما تنوصف
متحاصرين جوه وما ندري شدا يصير بره

بقينه جوه الحد ما وصلت الاطفاء وطفت النار بصعوبة

طلعنه كلنه بره ونشوف كلشي مدمر وماكلته النار

البيت كلش متأذي من بره والحديقة معدومة

راحت الجيران بعد ما تأكدو مابينه شي ومحد متأذي ودخلنه واني ما اعرف وين اودي وجهي منهم

كلشي صار بسببي وصار لازم اطلع من هالبيت
لان لو ابقه بعد راح اجرجرهم بمشاكلي ومصايبي

دخلت للغرفة لبست وطلعت لكيتهم كاعدين بالصالة والاستاذ ثائر مدنك وصافن يهز برجله

سرى: دكتورة

رفعو راسهم وباوعولي شافتني الدكتورة وكامت اجت باتجاهي

نضال: سرى وين رايحة

سرى: دكتورة اني اسفة صار لازم اطلع منا شفتوا شنو صار بسببي دكتورة انتو ما قصرتو وياية وما اجاكم من وراية غير المشاكل خلص خلوني اروح

نضال: ثائر دا تسمع شدا تكول احجيلك شي

سرى: دكتوره ارجوج خلص اني رضيت بنصيبي راح اروح العماد واتنازل عن القضية وعن كلشي اهم شي محد يتأذه بسببي اني ماريد شي خلص

نضال: لا سرى ما توقعتج هيج ضعيفة

سرى: بس اني….

كام الاستاذ ثائر وكف كدامي وقاطعني

ثائر: قبل اني جنت ادافعلج فقط واريد اخذ حقج من عماد بس هسه اني صارلي حق يم عماد ولازم اخذه.. رجعي الغرفتج بنتي ماكو طلعه منا الا وانتي حره

عافنه وصعد فوك واني صافنة ومتفاجئة من كلامة

اي احد بمكانه بعد الي صارله بسببي يطردني وما يخليني لحظة وحدة كاعدة ابيته
شلون هالرجال عنده هالطاقة

مر الليل علينه بالگوة وطلع الصبح ومن الصبح راح الاستاذ ثائر وقدم شكوى ضد عماد وبحكم خبرته وعلاقاته گدر يحتجز عماد ويوقفه
اما قضيتي فأتجلت لبعد اسبوع