هدية عمر

9

#هدية_عمر_ج١
بقلم اوتار حزينه
#بارت٩
التاسع

ثاني يوم صفاء ترخصت من رضا علمود انروح للصالون
رضا قبل بس كال لاتكصين شعرج
ولا شويه
رحنه للصالون وويانه بس سيوفي
لان سنا بقت وي ابوها ورضا
طبيت للصالون واستلمتني تنظيف
وحف كلبت شكلي قلب
وصلت لشعري كتلها لاتكصين منه 
لا عيوني شعرج حلو ويخبل بس
حسرحه واخصله ثلجي وهو بي شكار
يطلع يخبل
صدك لزمتني  وسوتلي شعري حتى صفاء تعجبت بي
كملنا واشترينا منها كم ثوب نوم وعطور
وغسول مال حمام اشتميت ريحته وعجبني اشتريت منه اربعه….  لبنات سميه اثنين والي اثنين
كملنا ورجعنا للبيت  طبينا جوه سمعت رضا يصيح وهو عصبي
انه ركضت عليه وقلبي نغزني خاف صاير شي بأهلنا
لكيته يحجي بالتليفون  ويصيح ويأشر بأيده
ولك شلون هيج يسوون وانتو وينكم
منهم وانه موكلت عيونكم عليهم ذوله مو راحه
جايه هسه مااطول والله اليوم اديرهم
وانه  الشيخ رضا
سد التليفون بعصبيه وهو يسب
ببيت عواد
انه ظليت واكفه يم صفاء وساكته
خير شيخ شمالهم بيت عواد
العارات الكوو…… متحارشين ببنات بشارعهم…. البنات رايحت لاهلهن
واهلهن  هادين عليهم   وهم العارات
حاطيهم وكاتليهم وضاربين الولد سجين
بصفحته وهسه بالمستشفى
لطمت خدي وكلت خوما حالته خطره
لا الحمد لله بس الدنيا مكلوبه بديرتنا
ولازم اروحن
فهد هز براسه وكال اجي وياك
لا ابو سيف اكعد انته الولد
هناك مايقصرون
يله ليله امشي حضري غراضج
خلنا نتوكل
اي رضا هسه 
اتغدو بالاول وبعدين روحوا حجت صفاء هيج وراحت للمطبخ 
تعالي ام سيف ماأريدن شي ومنو بعد يشتهي الزاد
ميصير شيخ تطلع والوكت غده
بيتك عامر ياخوي ماتقصر بس والله
ماأكدر اظل لان ظل بالي من الي صار

طلعت ليله شايله غراضها من شافها رضا اخذهن منها وخلاهن بسيارته

صفاء طلعت وراهم شايله لفات ومي وقواطي وانطتهن ليله
هاج حبيبه هاي لفات لحم ومي خاف تاكلون بالطريق
انه خذيتهن وخليتهن يمنه ودنكت بوست جهالها وهي هم وكتلها تعالي
علينا لاتطولين بالغيبه
اي ان شاء الله اجي اسبوع الجاي لان  عرس اخته لفهد  وراه بأسبوع
اي صدك الله يهنيها ويسعدها
امين يارب
يل ليله مشينا
اي رضا
هو حضن فهد وبوسه
واندار عليه وكال يله حبيبه اصعدي

ركبنا  السياره ورضا اشر بأيده الهم وطلع
انه نسيت احط البوشيه
حسيت بي دغني  من جتفي انه عاينت عليه
ها رضا
حبيبه البوشيه
اي والله نسيتها حجيت هيج ونزلتها
اخ من غيرتك يارضا حتى وانته ملتهي بطلايب العالم بالك يمي
الطريق كله  يحجي على بيت عواد وهو عصبي
وانه اهدي بيه  بنص الطريق طلعت اله
لفه بس هو ماقبل يأكل
أكل قلبي
والله ماأشتهي ليله انتي اكلي
رجعت اللفه بمكانها وسديت العلاكه
ليش ماأكلتي
ماأكدر اكل لان تلعب نفسي
هو سكت وعيونه على الطريق ظليت
اعاين من الشباج  الما وصلنا لبيتنا
شفنا ولد عمومته واكفين بره
ومتحزمين  وينتظرو
هو فوت السياره لجوه يم باب البيت الداخلي وكال
طبي جوه وعوفي الغراض هسه اخلي
علي يجيبهن
انه هزيت براسي باي ونزلت طبيت
جوه
تلكتني ام رضا وهي تبوس بيه
ها يمه الحمد لله على السلامه
الله يسلمج يمه شلونج انتي وشلون جده رازقيه والبنات احجي وانه اذب بعباتي والبوشيه
الحمد لله يمه زينين رضا وينه
يم الولد
سوده عليه يمه حتى ماتهنه بطلعته 
اي والله يمه من سمع بالسالفه صار عصبي والكاع بعد ماتلمه و كال خلنا نرجع
اي يمه ابني واعرفه مايعوف السالفه تبرد
واصلا هو متحلف بيهم من زمان