ضحية رقم 815

8

من شفت ضل قصاد شباكي انا خلاص اعصابي باظت لا قادرة امشي علي الشباك لا قادرة اطلع ، مسكت راسي وقعتا في السرير وبقول عمر صح ، عمر حفتح ليك الباب بس عليك الله م تعمل فيني كدا انت قاعد تخوفني يا عمر ، عمر انا وريتك انا بحبك شديد شديد ، ممكن تظهرلي عايزة اتكلم معاك يا عمر ، قلتا بسري انا لازم اقوي قلبي قمتا مشيت اتجاه الشباك بطرف اصابعي لمن قربت من الشباك و مديت راسي و فكيت الصرخه لمن وقعتا في الارض بقيت بكورك زحي زحي ، امي جات جاريه يا بت مالك في شنو قلت ليها في كديسه في الشباك خلعتني ، مشت علي الشباك ما لقت حاجه ، قفلت الشباك وشغلت لي التكيف ، رقدتني في السرير و رقدت جمبي و بقت تقراااا لي حسيت بي امان ،
قالت لي نومي حبيبتي انا جمبك حصحيمي بدري بكرة ماشين لي ناس خالتك ، قلت ليها لا انا م بحبهم ولت حمشي ليهم ، قالت لي اقبال كدا غلط لازم تواصلي صله ارحامك احتمال في يوم تحتاجي ليهم علي اللقل يبقو ليكي سند الظروف ما معروفه ،
قلت ليها الله لا يحوجني لزول انا ما حمشي ، قالت لي نتفاهم بكرة ، اها ما قلتي لي انطباعك شنو عن اهل العريس لسه مصممة علي رايك ، قلت ليها مصممة جدااااً يا امي قالت لي عنيده ما عارفه طالعه علي منو انا بعد دا م عندي خيار يا اقبال ، انا ما حجبرك لا انتي لا اختك تتزوجو الانسان التختاروه ، الحصل معاي ما دايره يحصل ليكي ، قلت ليها انا مرتاحه ليهم ، قالت لي دا المطلوب يا بتي و ربنا يتم علي خير ..
صحيت الصباح بصداع رهيب اتفاجات ابوي قال لي لازم نعقد عشان يجهزو ليكي اقامتك في فترة العرس ، قال لي خلاص نتوكل علي الله ، قلت ليهو اتوكل علي الله يا ابوي ، عن كميه الفرح الجواي انتو ما حتتخيلوها ، عايزة اطير ، لكن كالعاده لازم حاجه تنكد علي فرحتي اصلا يا عمر يا جهاد ،
جهاد اتصلت علي قالت لي الظاهر انك حابه ابوكي يشوف الصور ، قلت ليها لالا القروش جاهزة ، قالت لي كلها ال50الف انا صبرتا عليكي كتير ، قلت ليها لالا ما معاي غير 6 قالت لي خلاص تشتغلي معاي ، قلت ليها طواالي وين اشتغل ؟ ( من جواي عارفه اني ما قاعده ليها بمشي فيها و استهرت بالموضوع شديد ) قالت لي في البيت البتجينا غيهو ، قلت ليها اخدمكم يعني ، قعدت تضحك قالت لي انتي ما عارفه البيت البتجينا فيهو دا بيت شنووو ؟
قلت ليها بيت صحبتك وكدا ، قالت لي دا بيت 🔞 واذا م جبتي المبلغ بالكتير بكرة اتاكدي اني ححاول بقدر الامكان ان ابوكي يعرفك علي حقيقتك ، انا اتجمدتا
انا كيف كنت بمشي بيت زي دا يا الله
طيب حتصرف كيف واجيب المبلغ دا من وين ؟ اووووووف يا ربي
بقيت ماشه وجايه في الغرفه ، يا ورطتك يا اقبال ، انا لو بعت تلفوني ، هي تلفوني شنو انا كان بعتني كلي م حجيب ليها المبلغ دا اووووف حسوي شنو يا رب ، بس جاتني فكرة .. نزلت تحت ، لقيت غيداء وامي وابوي قاعدين في الصاله بتفرجو التلفزيون
مشيت براحه غرفه امي فتحت الدولاب ضلفه ضلفه بفتش مالقيت مليم احمر ، يا رب اسوي شنووو ، حسيت بي حركة طوالي جريت غرفتي ، ااااخ يا اقبال معقوله توصلي للمرحله دي ، بقيت رابطه راسي و قاعده صداع داير يشق راسي نصين ،
نزلت المطبخ عملت قهوة .. وبقيت قاعده فيهو ، امي جاتني داخله قالت لي مالك رابطه راسك كدا ؟
قلت ليها مصدعه بس ما عارفه من شنو ، قالت لي خشي غسلي راسك بمويه بارده ، قلت ليها حاضر ، قالت لي احسن ليكي تمشي معانا بيت خالتك تغير جو ، قلت ليها لالالالالا
قالت لي خلاص خليكي ( دا الدايراهو انا )
غيداء قالت لامي انا بقعد معاها امشي انتي وابوي ، قمتا ناطه قلت ليها لالا ماف داعي اصلا انا حرقد انوم ، ابوي قالي خلاص تربسي البلب كويس قلتا ليهو اصلا ي ابوي لاني حنوم و لمن تجو صحوني بالجرس بفتح ليكم ، قال لي لا عندنا نسخه من المفتاح ّ
قلت ليها تمام ، نص ساعه او ساعه الا ربع كانو حاهزين و طلعو وعم صلاح مشا معاهم ، طواااالي جرررري علي غرفه امي
وبقيت بفتش في دولاب ابوي ما خليت حته اخر حاجه فضلت لي الخزنة ، قلتا مستحيل اقدر افتحاا ولا حاولتا ..
رجعت لغرفتي وبفكر يا ربي اعمل شنوووو
، بسسسسس اتذكرتا ، جري رجعتا غرفه امي فتحت الدولاب ، اتذكرت في خزنة حقت امي في الدهب حقها ، فتحتا فتشت الخزنة لمن لقيتا ، فتحتها و لقيت الدهب حق امي كلووو ، قلبي وجعني لكن م عندي حل غير دا و امي اصلا عندها ما حتلاحظ ، نقيت لي سلسل كبيييييييير ، شلتو و طلعتا ، وقفلت ورجعت كل حاجه في مكانها ، مشيت لبست عبايه و طلعت ونسيت ان مافي نسخه في البيت من المفتاح ناس امي شالو كل النسخ ، بعد وصلت الشارع العمومي اتذكرتا ، وهم الدنيا كلو فوق راسي ، قلت احل مشكله جهاد دي واتخارج ، مشيت الصياغ لفيت علي كم واحد قالو لي دا دهب بحريني و دقتو غريبه دايرين فاتورة ، قلت ليهم دا ما استريناهو من هنا و م عندي فاتورة ، بي جاي بي جاب كدا في واحد باع لي بي 65الف ،،
طوالي اتصلت علي جهاد قلت ليها انتي وين ؟ قالت لي في البيت تعالي ، قلت ليها لالا م بقدر تعالي في ال...... انا واقفه منتظراكي
، انتظرتا نص ساعه تقريبا لحد ما جات
بكيت ليها بدموعي ان القروش دي انا تعبت فيها و ورتني قدام عيوني حذفت الصور و سلمتها المبلغ بزياده .. طبعا فرحانه بالقروش ، رجعت البيت و بقيت في البدخلني شنو ؟
واااااقفه و ماسكة قلبي دا في يدي
يا ربي اتصرف كيف حتي كان تلبت السور دا البفتح لي باب البيت شنو ، وانحنا في اخر السور خاتين قزاز عشان الحراميه ،،
اخر م تعبت قلتا بس اقعد هنااا ، ولمن يسالوني اقوليهم صدعت و طلعت الصيدليه و الفلم الياباني دا ... و فعلا قعدتا
فجأة من حيث لا ادري احس بي زول خت يدو علي كتفي وفكيت الصررررررخخخخه ........

استككانة😪~

يتبع ........
توقعاتكم ، بس ما تتفائلو شديد ، لكن خلو شباك الامل متاكااا ... 👇